މި މަހު 22 ވަނަ ދުވަހު ބާއްވަން އިއުލާނުކުރި ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ އިންތިހާބުގެ ކަންކަން މަޑުޖައްސާލަން ކޮމިޝަނާ އޮފް ސްޕޯޓްސް މުހައްމަދު ތޮލާލް، މިއަދު އަންގައިފި އެވެ.
ބެޑްމިންޓަން އެސޯސިއޭޝަނުން އިއްޔެ ގެޒެޓްކޮށްފައިވާ ގޮތުން، މި މަހު، 22 ވަނަ ދުވަހު އައްޑޫ އިކުއޭޓްރަލް ވިލެޖްގައި އެ އެސޯސިއޭޝަނުގެ އިންތިހާބު ބާއްވަން ވަނީ ނިންމައިފަ އެވެ. އަދި ކުރިއަށް އޮތް ހަަތަރު އަހަރަށް ބެޑްމިންޓަން އެސޯސިއޭޝަން ހިންގާ ކޮމިޓީގެ މަގާމުތަކަށް ވާދަކުރާ ފަރާތްތަކުން، މި މަހު 18 ވަނަ ދުވަހުގެ 14:00 ގެ ކުރިން އެސޯސިއޭޝަނަށް ލިޔުމުން ހުށަހެޅުމަށް ވަނީ އަންގައިފަ އެވެ.
އާ އިންތިހާބެއް ބާއްވަން ބެޑްމިންޓަން އެސޯސިއޭޝަނުން އިއުލާނުުކުރިއިރު، އެ ޖަމިއްޔާގެ ރައީސް، މޫސާ ނާޝިދު (މޫސަ) އަށް ތުހުމަތުވާ ގިނަ ކޮރަޕްޝަންގެ މައްސަލަތަކެއްގެ ޝަކުވާތަކާއި، ބެޑްމިންޓަން އެސޯސިއޭޝަންގެ އަސާސީ ގަވާއިދުގައި ހުރި މައްސަލަތަކެއް ވަނީ ރަސްމީ ސިފައެއްގައި ކޮމިޝަނާ އޮފް ސްޕޯޓްސް، ތޮލާލް އަށް ހުށަހަޅައިފަ އެވެ.
މި ހުރިހާ ކަމެއް، ކުޅިވަރާ ބެހޭ ވަޒީރު، އަބްދުﷲ ރާފިއު (ރާއްޕެ)، ސްޕޯޓްސް ކައުންސިލް އަދި އޮލިމްޕިކް ކޮމިޓީގެ ސަމާލުކަމަށް ވެސް އެކި ފަރާތްތަކުން އަންނަނީ ގެންނަމުންނެވެ.
ބެޑްމިންޓަންގެ ގިނަ މައްސަލަތަކެއް ފެންމަތިވެފައި އޮއްވައި، އިންތިހާބެއް ބާއްވަން ތައްޔާރުވަމުން އަންނާތީ، އެކަމާ ގުޅޭގޮތުން، "އަދަދު" އިން ސުވާލުކުރުމުން، ސްޕޯޓްސް ކޮމިޝަނަރު ތޮލާލް ވިދާޅުވީ، އިންތިހާބު މިހާރު އޮތް ތާރީހުގައި ކުރިއަށް ނުގެންދަން ބެޑްމިންޓަން އެސޯސިއޭޝަނަށް އަންގާފައިވާނެ ކަމަށެވެ.
"ހަގީގަތުގައި ވަރަށް ގިނަ ޝަކުވާތަކެއް އެބަހުރި އެ އެސޯސިއޭޝަނާ ގުޅޭގޮތުން، އަމިއްލަ ފަރާތްތަކުން ވެސް، ކުޅުންތެރިންގެ ފަރާތުން ވެސް، ދެން، އަސާސީ ގަވާއިދުގައި އެ ހުރި ކަންތައްތައް ރަނގަޅުނުކޮށް، އިންތިހާބަކަށް ދިއުމަކީ އެންމެ ރަނގަޅު ގޮތެއް ނޫން،" ތޮލާލް ވިދާޅުވި އެވެ.
"އެހެންވީމަ، އަޅުގަނޑު އެދިފައިވަނީ، އަޅުގަނޑުމެން، ސްޕޯޓްސް މިނިސްޓަރު، މޯލްޑިވްސް އޮލިމްޕިކް ކޮމިޓީ އަދި ސްޕޯޓްސް ކައުންސިލުން މިކަމާ މަޝްވަރާ ކޮށްފައި، ދެން، ބެޑްމިންޓަން އެސޯސިއޭޝަނާ ވެސް މަޝްވަރާ ކުރުމަށް ފަހު، ކަންކަން ރަނގަޅުކޮށްގެން ކުރިއަށްދާން،"
ތޮލާލް ވިދާޅުވީ، ބެޑްމިންޓަން އެސޯސިއޭޝަންގެ އަސާސީ ގަވާއިދުގައިވާ ބެޑްމިންޓަން ޑިވެލޮޕްމަންޓް ކޮމިޓީ (ބީޑީސީ) ތަކަކީ އަތޮޅުތަކުގައި މަސައްކަތްކުރާ ފޯކަލް ޕޮއިންޓްތަކެއްގެ ގޮތުގައި ފެންނަން އެބައޮތް ކަމަށެވެ. އެ ކޮމިޓީތަކަކީ ސަރުކާރުގެ އެއްވެސް މުއައްސަސާއެއްގައި ރަސްމީކޮށް ރަޖިސްޓްރީ ނުކޮށް ހިނގާ ކޮމިޓީތަކަކަށް ވެފައި އެ ފަދަ ކޮމިޓީތަކަށް އިންތިހާބެއްގައި ވޯޓުލުމުގެ .ހައްގު ދިނުމަކީ އެންމެ ރަނގަޅު ގޮތް ކަމަށް ބެލެވެން ނެތް ކަމަށް ތޮލާލް ވިދާޅުވި އެވެ.
ބެޑްމިންޓަން އެސޯސިއޭޝަންގެ ގަވާއިދު އޮންނަ ގޮތުން، އެސޯސިއޭޝަނުގައި ރަޖިސްޓްރީކުރާ ބީޑީސީތަކުން އިންތިހާބަށް ވޯޓުލާއިރު، ކޮންމެ 10 މެމްބަރަކަށް 15 ވޯޓު ލެވެ އެވެ. ބީޑީސީތަކަށް މެމްބަރުން ނެގުމުގައި ވަކި އަދަދެއް ބަޔާންކުރާ ވަކި އުސޫލެއް ނެތެވެ. ބީޑީސީ އަކީ ފުރިހަމަ މެމްބަރެއް ކަމަށްވާތީ، ވަކި ފީއެއް ދައްކަން ވެސް ލާޒިމެއް ނުކުރެ އެވެ. އެކަމަކު، 18000 ރުފިޔާ އަހަރަކު ދައްކަން ޖެހޭ، ބެޑްމިންޓަން ކްލަބްތަކަށް އެންމެ ގިނަ ވެގެން ވެސް ހިމެނެނީ، 15 މެމްބަރުންނެވެ. އެ އަށް ވުރެ އިތުރެއް ނުކުރެވެ އެވެ. އެހެންކަމުން، ފެންނަން އޮތް ހަގީގަތަކީ، ބީޑީސީތަކަކީ، އެސޯސިއޭޝަންގެ އިންތިހާބަށް ނުފޫޒު ފޯރުވައި، މަގާމު ދިފާއުކުރަން އެސޯސިއޭޝަން ރައީސަށް ކޮށިފައި އޮންނަ މަގެއް ކަމެވެ.
ތޮލާލް ފާހަގަކުރެއްވި ގޮތުގައި، ބެޑްމިންޓަން އެސޯސިއޭޝަންގެ އަސާސީ ގަވާއިދުގައިވާ ކަންކަމަކީ، ބައިނަލްއަގުވާމީ ޖަމިއްޔާތަކުގެ ގަވާއިދާ ގުޅޭ ގޮތަށް އެކުލަވާލައިފައިވާ އަސާސީ ގަވާއިދެއް ކަމަށް އެސޯސިއޭޝަނުން ބުނާ ކަމަށެވެ.
އެހެން ނަމަވެސް، ބެޑްމިންޓަނާ ގުޅޭ އެކިއެކި ބައިނަލްއަގުވާމީ ޖަމިއްޔާތަކުން (ބެޑްމިންޓަން ކައުންސިލް އޮފް އޭޝިއާ/ ބެޑްމިންޓަން ވޯލްޑް ފެޑެރޭޝަނުން) ހޯދުނު މައުލޫމާތުތަކަށް ބަލާއިރު، ރާއްޖޭގެ ބެޑްމިންޓަން އެސޯސިއޭޝަންގެ ގަވާއިދުގައި ކަންކަން އޮތީ އެހެން ނޫންކަން ސާފުވާ ކަމަށް ތޮލާލް ވިދާޅުވި އެވެ.
މީގެ އިތުރުން މިދިޔަ ހަތަރު އަހަރު ބެޑްމިންޓަން އެސޯސިއޭޝަނުން އެ ޖަމިއްޔާގެ އޮޑިޓް ރިޕޯޓް، ކުޅިވަރު ޖަމިއްޔާތައް ރަޖިސްޓްރީކޮށް ހިންގުމާ ބެހޭ ގަވާއިިދުގައިވާ ގޮތަށް ފޮނުވާފައިނުވާ ކަމަށް ވެސް ތޮލާލް ވިދާޅުވެފައިވެ އެެވެ.
"މިއީ ރަނގަޅަށް ކުރަން ޖެހޭ ކަންކަން ކަމަށްވާތީ، މި ހުރިހާ ކަމެއް ބަލާފައި، އިންތިހާބަކަށް ދިއުން އެންމެ ރަނގަޅު ގޮތަކީ،" ތޮލާލް ވިދާޅުވި އެވެ.
ބެޑްމިންޓަން އެސޯސިއޭޝަނުން އިންތިހާބަކަށް ދިިއުމުގެ ކުރިން އެންމެ ފުރަތަމަ އަސާސީ ގަވާއިދުގައި ހުރި މި ފަދަ ކަންކަމާއި ހިންގުމުގައި ފުރިހަމަވާން ޖެހޭ ކަންކަން ރަނގަޅުކުރަން ޖެހޭ ކަމަށް ތޮލާލް ވަނީ ވިދާޅުވެފަ އެވެ.
