ދިވެހިމަޔަކާ ބަފައަކަށް އުފަންވެ، ދިވެހި އައިޑީކާޑެއް އޮތަކަސް އަދި ދިވެއްސަކަށް ނުވާނެ ކަމަށް މޯލްޑިވް ގޭސްގެ މެނޭޖިން ޑިރެކްޓަރު އަބްދުﷲ މުހައްމަދު ވިދާޅުވެއްޖެ އެވެ.
އޭނާ މިހެން ވިދާޅުވީ، ކުރިއަށް އޮތް މަޖިލިސް އިންތިހާބާ ދިމާކޮށް ސަރުކާރުގެ އިސްވެރިންނާއި ރައީސް ޑރ. މުހައްމަދު މުއިއްޒު ކުރައްވަމުން ގެންދަވާ ރަސްމީ ދަތުރުތަކުގެ ތެރެއިން މިއަދު ޅ. ކުރެންދޫގައި ހުންނަވާ ވާހަކަދައްކަމުންނެވެ.
އެގޮތުން މީހެއްގެ ނަމާއި ޕާސްޕޯޓު ނުވަތަ އައިޑީކާޑުގަ އެއީ ދިވެހި ރައްޔިތެއްކަން ބުނުމަކުން އެއީ ދިވެހި ރައްޔިތަކަށް ނުވާނެ ކަމަށާއި މީހަކީ މަސްވެރިޔެކޭ ބުންޏަސް މަސްވެރިކަމުގެ އުސޫލުތަކާއި ވައްޓަފާޅި ނޭގެންޏާ އޭނާ މަސްވެރިޔަކަށް ނުވާނެ ކަމަށް އަބްދުﷲ ވިދާޅުވި އެވެ.
"ހަމައެހެންމެ، ދިވެހި ރާއްޖެއަށް މީހަކު އުފަންވުމުން ދިވެހި މަންމައަކަށް މަންމަ ކިޔާ، ދިވެހި ފިރިހެނަކަށް ބައްޕަ ކިޔުމަކުން އަދި ދިވެއްސަކަށް ނުވާނެ، ދިވެއްސަކަށް ވާނީ ދިވެހިންގެ ތާރީހާއި، ސަގާފަތާއި، އާދަކާދަޔަށް އިހުތިރާމުކޮށް އެ އަސާސްތަ ނަގަހައްޓަން ކެރޭ ދަރިޔަކަށް [ވެގެން]" އޭނާ ވިދާޅުވި އެވެ.
އަދި، ރާއްޖޭގެ ޒައާމަތުން މިއަދު ފެންނަނީ އެފަދަ ދަރިއެއް ކަމަށާއި ސަރުކާރުގެ އިސްވެރިން ތިބީ ރައީސް މުއިއްޒުގެ ޒައާމަތުގައި ދިވެހިންނަށް ލިބޭނެ ކުރިއެރުން ގެނައުމުގައި ކަމަށްވެސް އަބްދުﷲ ވިދާޅުވި އެވެ.
މި ވެރިކަމުގައި ފެންނަމުން ދަނީ ދިވެހިންނަށް ދިވެހީންގެ ރާއްޖެ ހޯދުމަށް ވަރަށް ބޮޑެތި ގުރުބާނީތަކެއް ވަމުންދާ މަންޒަރު ކަމަށާއި ދުނިޔޭގެ ނުފޫޒުތަކުގެ ކުރިމަތީ، ރައީސް މުއިއްޒު ދަނީ ދިވެހިންގެ ކަރާމާތް ހިފަހައްޓަމުން ކަމަށްވެސް އޭނާ ވިދާޅުވި އެވެ.
ދިވެހި ގައުމިއްޔަތު ފާހަގަކުރުމާއި ގައުމިއްޔަތަށް އެކި ގޮތްގޮތުން ހިތް ޖެއްސުމަކީ ރައީސް މުއިއްޒުގެ ސަރުކާރުގެ އެންމެ އިސް އެއް ސިޔާސަތަށެވެ.
