ގޭންގުތަކުގެ އެހީގައި ހެއިޓީގެ މައި ޖަލު ފަޅާލައި 4،000 އަށްވުރެ ގިނަ ގައިދީން އިއްޔެ ފިލައިފި އެވެ.
ހެއިޓީގެ ވެރިރަށް ޕޯޓް އައު ޕްރިންސްގައި ހުންނަ އެ ގައުމުގެ މައި ޖަލަށް ހަތިޔާރު އެޅި ގޭންގުތަކުން ވަދެ ބޮޑެތި ކުށްވެރިން ހިމެނޭ ގޮތަށް ގިނަ ބަޔަކު މިނިވަން ކޮށްފައި ވަނީ ޖަލު އޮފިސަރުންނަށް ހަމަލާދީގެންނެވެ.
ރިޕޯޓްތައް ބުނާ ގޮތުން ޖަލު ފަޅާލުމުގެ ތެރޭގައި ހަތަރު ޖަލު އޮފިސަރުން މަރުވެފައި ވާއިރު، ފަސް އޮފިސަރުން ވަނީ ޒަހަމްވެފަ އެވެ. އަދި ތިން ގައިދީއަކު ވަނީ ފިލަން އުޅުމުގެ ތެރޭގައި މަރުވެފަ އެވެ.
ރިޕޯޓްތައް ބުނާ ގޮތުން ޖަލުން ފިލި ގައިދީންގެ ތެރޭގައި 2021 ވަނަ އަހަރު ހެއިޓީގެ ކުރީގެ ރައީސް ޖޮވެނެލް މޮއިސް އަވަހާރަކޮށްލި ކަަމުގެ ތުހުމަތުގައި ހައްޔަރުކޮށްފައި ތިބި މީހުން ވެސް ހިމެނެ އެވެ.
މޮއިސް އަވަހާރަކޮށްލުމަށްފަހު ހެއިޓީގައި ބޮޑެތި ހަމަނުޖެހުންތަކެއް ހިންގަމުން އަންނައިރު، އެ ގައުމުގައި 2016 ވަނަ އަހަރަށްފަހު މިހާތަނަށް އިންތިހާބެއް ބާއްވާފައެއް ނުވެ އެވެ.
ހެއިޓީގެ އިންތިހާބު ފެބްރުއަރީ 7، ގައި ބޭއްވުމަށް ތާވާލު ކުރި ނަމަވެސް، ގައުމުގައި ހިނގަމުން އަންނަ ހަމަނުޖެހުންތަކާއެކު އިންތިހާބު ބޭއްވިފައެއް ނުވެ އެވެ.
