ބ. އޭދަފުއްޓަކީ ފުޓްސަލްގައި ވެސް ވަރުގަދަ ރަށެއްގެ "މާކު" ޖަހަން ކުޅުންތެރިން ބޭނުންވާ ކަމަށާއި, އެކަން ކުރުމަށްޓަކައި، މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖް ކާމިޔާބު ކުރަން ކުޅުންތެރިން ތައްޔާރުވެގެން ހުރި ކަމަށް އޭދަފުށި ޓީމުގެ ތަރި، މުހައްމަދު ފާސިރު (ފާއްޓެ) ބުނެފި އެވެ.
ގޯލްޑަން ފުޓްސަލް ޗެލެންޖުގެ ކުއާޓާ ފައިނަލުގައި ތ. ތިމަރަފުށި ޕެނަލްޓީގައި ބަލިކޮށް އޭދަފުށިން ވަނީ މި މުބާރާތުގެ ސެމީ ފައިނަލުން ޖާގަ ހޯދައިފަ އެވެ. އެ ޓީމުން ވަނީ މީގެ ކުރިން 2019 ވަނަ އަހަރު ފައިނަލް ކުޅެފަ އެވެ. އެކަމަކު އެ ފަހަރު 5-3 ގެ ނަތީޖާއަކުން އޭދަފުށި ބަލިކޮށް ޗެމްޕިއަންކަން ހޯދީ ތިމަރަފުށިންނެވެ.
"އަދަދު"އާ ވާހަކަ ދައްކަމުން ފާއްޓެ ބުނީ އޭދަފުށިން މީގެ ކުރިން 2019 ވަނަ އަހަރު ނުކުތީ ވަރުގަދަ ސްކޮޑަކާ އެކު ކަމަށެވެ. އޭގެ ފަހުން މި އަހަރު އަނެއްކާވެސް ވަރުގަދަ ސްކޮޑެއް އެކުލަވާލައިގެން، އޭދަފުށިން މި މުބާރާތައް ނުކުތީ ބޮޑު ކާމިޔާބީ އެއް ހޯދަން ކަމަށެވެ. އެކަމަކު، އަތޮޅު ބުރުގައި މެޗުތައް ނުލިބުން އެއީ ލިބޭ ގެއްލުމެއް ކަމަށް ފާއްޓެ ވަނީ ފާހަގަކޮށްފަ އެވެ.
"ގަޑި ހުއްޓައިގެން މި ކުޅެނީ ސެމީގައި އަދި ކުރިން ގާފަރާ އެކު ރަނގަޅު ދެ މެޗު ކުޅެން ލިބިފައި މި އޮތީ. އޭގެ ފަހުން ޓަފު މެޗުތަކެއް ކުޅެ ސެމީ ފައިނަލަށް މި ނުކުންނާނީ. ގަބޫލުކުރަނީ އޭދަފުއްޓަށް އެޑުވާންޓޭޖް ތަކެއް ހުންނާނެ ކަމަށް" ފާއްޑެ ބުންޏެވެ.
ފާއްޓެ ބުނީ ޓީމުގައި މިހާރު ކަންބޮޑުވާން ޖެހޭ ބޮޑެތި މައްސަލަތައް ނެތް ކަމަށާއި, ސެމީގެ ކުރިން ވަރުގަދަ މެޗުތަކެއް ކުޅެން ލިބުން އެއީ އެޑުވާންޓޭޖެއް ކަމަށެވެ. އެ ގޮތުން، ޒޯން ބުރުގައި ގާފަރާ ދެކޮޅަށް ދެ މެޗު ކުޅެފައި، ގަދަ 16 ގައި މާފަންނާ ބައްދަލުކޮށް، އަދި ކުއާޓާގައި ތިމަރަފުށި އަތުން މޮޅުވެ، މިހާރު އޭދަފުށްޓަށް މުބާރާތުގައި ވަރުގަދަ މެޗެއް ނުލިބުމުގެ ކަންބޮޑުވުން ނެތް ކަމަށް ފާއްޓެ ފާހަގަކޮށްފައިވެ އެވެ.
"އަސްލު އޭދަފުށި މަޝްހޫރު ވެފައި މި އޮންނަނީ ފުޓުބޯޅައިގެ ރަށެއްގެ ގޮތުގައި. ދެން ފުޓްސަލްގައި އަޅުގަނޑުމެން ނަގަން ޖެހޭ މާކު ހަމަ ޔަގީނުންވެސް ނެގޭނީ މިކަހަލަ ބޮޑު ތައްޓެއް ހަމަ ޔަގީނުންވެސް އޭދަފުށި ނަގައިގެން ކަމަށް އަޅުގަނޑު ގަބޫލު ކުރަނީ" ފާއްޓެ ބުންޏެވެ.
މި ފަހަރުގެ މުބާރާތުގެ ސެމީ ފައިނަލަށް އޭދަފުށިން ނުކުންނައިރު, އެ ޓީމުން ޒޯން ބުރުގައި ކ. ގާފަރާ ދެކޮޅަށް ކުޅުނު ދެ މެޗުން ވެސް ވަނީ ބަލިިވެފަ އެވެ. އެހެންވެ ސެމީ ފައިނަލަށް އޭދަފުށިން ގާފަރާ ދެކޮޅަށް ނުކުންނަނީ އެ ދެ މެޗުގެ ނަތީޖާގެ ބަދަލު ހިފުމަށެވެ.
