ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 ގައި އިތުރަށް ކުރިއަށް ދިޔުމަށް ލިބޭނެ އެންމެ ބޮޑު ހިތްވަރަކީ ހިތަދޫ ބަލިކުރުން ކަމަށް ވިލިމާލޭގެ ކެޕްޓަން އަލީ ޝިޔާޙް (ޝިޔާ) ބުނެފި އެވެ.
ގޯލްޑަން ފުޓްސަލް ޗެލެންޖުގެ ގަދަ 16 ޓީމުގެ ބުރުގައި ވިލިމާލެއިން ވަނީ ޕެނަލްޓީގައި ރ. ދުވާފަރުގެ މައްޗަށް 5-2 ގެ ނަތީޖާއަކުން ކުރިހޯދައިފަ އެވެ.
އެ މެޗަށް ފަހު "އަދަދާ" ވާހަކަ ދައްކަމުން ވިލިމާލޭގެ ކެޕްޓަން ޝިޔާ ބުނީ އެ މެޗުގައި ވިލިމާލޭގެ އަޒުމަކަށްވީ ދުވާފަރުގެ ކެޕްޓަން ޝަންޓޭ ހިފެހެއްޓުން ކަމަށެވެ. އެކަން ވިލިމާލެ އިން ވަރަށް ރަނގަޅަށް ކުރި ކަމަށް ޝިޔާ ބުންޏެވެ.
ޝިޔާ ބުނީ ވިލިމާލެ ޓީމަށް ދިމާވާ އެންމެ ބޮޑު މައްސަލަ އަކީ ގިނަ ފުރުސަތުތަކެއް ލިބި ލިބޭ ފުރުސަތުތަކުގެ ބޭނުން ނުހިފުން ކަމަށެވެ.
"ދެން ކުރިއަށް މިޖެހެނީ ހިތަދޫ. ޓީމެއްގެ ގޮތުގައި މި މުބާރާތުގައި އެންމެ ޓަފް ކޮށް ކުޅޭ އެއް ޓީމު އެއީ. އެ މެޗު ނެގުން އެއީ އަހަރުން ތައްޓާ ހިސާބަށް ކުރިއަށް ދާން ލިބޭ އުންމީދަކަށް ވާނީ" ޝިޔާ ބުންޏެވެ.
ޝިޔާ ބުނީ މިއީ ހުރިހާ ކުޅުންތެރިން އެކެއްޗެއް ކިޔައިގެން މަސައްކަތް ކޮށްފިނަމަ ނުވާނެ ކަމެއް ނޫން ކަމަށެވެ. އަދި މިއީ ވަރަށް މަސައްކަތް ކަމަށާއި, އެކަމަކު އެކަން ކުރަން ކުޅުންތެރިން ތިބީ ތައްޔާރަށް ކަމަށް ޝިޔާ ފާހަގަކުރި އެވެ.
ވިލިމާލެ އިން ޒޯން ބުރުގައި ޕެނަލްޓީ ޖަހައިގެން މާފަންނު އަތުން ވަނީ ބަލިވެފަ އެވެ. އެކަމަކު އެ ޓީމުން ވަނީ ގަދަ 16 ގައި ޕެނަލްޓީގައި ދުވާފަރު ބަލިކޮށް ކުއާޓާ ފައިނަލަށް ދަތުރުކޮށްފަ އެވެ. އަދި ކުއާޓާގައި ވިލިމާލެ ނުކުންނާނީ ހިތަދޫއާ ދެކޮޅަށެވެ.
ގޯލްޑަން ފުޓްސަލް ޗެލެންޖް ކުއާޓާ ފައިނަލް
20:00 ލ. ގަން - އއ. މަތިވެރި (ގްރައުންޑް 1)
20:00 ވިލިމާލެ - ސ. ހިތަދޫ (ގްރައުންޑް 2)
21:30 ކ. ގާފަރު - ދ. ކުޑަހުވަދޫ (ގްރައުންޑް 1)
21:30 ބ. އޭދަފުށި - ތ. ތިމަރަފުށި (ގްރައުންޑް 2)
