މެކްސިކޯގެ މަރަވާޓިއޯގެ މޭޔަރުކަމަށް ކުރިމަތިލާ ދެ ކެންޑިޑޭޓުންނަށް ބަޑިން ހަމަލާދީ އިއްޔެ މަރާލައިފި އެވެ.
ރިޕޯޓްތައް ބުނާ ގޮތުން ބަޑިން ހަމަލާދީ މަރާލީ މޭޔަރު ކަމަށް ކުރިމަތިލައްވާ ނެޝަނަލް އެކްޝަން ޕާޓީ (ޕީއޭއެން) ގެ ކެންޑިޑޭޓް އަރްމާންޑޯ ޕެރޭޒް އަދި މޮރޭނާ ޕާޓީގެ މިގުއެލް ރެއިސް އެވެ.
މި ދެ މީހުންވެސް މަރާލީ ދެ ހިސާބެއްގައި ކަމަށާއި، މަރާލާފައި ވަނީ ކާރުގައި އިންނަވަނިކޮށް ކަމަށް ރިޕޯޓްތައް ބުނެ އެވެ.
މެކްސިކޯގެ މޭޔަރުން ހޮވުމަށް ބާއްވާ އިންތިހާބު ޖޫން، 2 ވަނަ ދުވަހު ބޭއްވުމަށް ހަމަޖެހިފައިވާއިރު، ޕީއޭއެން އަދި މޮރޭނޯއިން ވަނީ މި ހަމަލާތައް ކުށްވެރިކޮށްފަ އެވެ.
މީގެ އިތުރުން މެކްސިކޯގެ ރައީސް އެންޑްރޭޒް މެނުއެލް ލޮޕޭޒްވެސް ވަނީ މި ހަމަލާތައް ކުށްވެރިކޮށް، ފުރިހަމަ ތަހުގީގެއް ހިންގާނެ ކަމަށް ވިދާޅުވެފަ އެވެ.
މި ހަމަލާތަކާ ގުޅިގެން އެ ގައުމުގައި ސަލާމަތީ ކަންކަން އިތުރަށް ވަރުގަދަ ކުރާނެ ކަމަށް އެ ގައުމުގެ ސެކިއުރިޓީ މިނިސްޓަރު ރޯޒާ އިސެލާ ރޮޑްރިގޭޒް ވަނީ ވިދާޅުވެފަ އެވެ.
މެކްސިކޯގެ އާންމު އިންތިހާބުގައި 100 މިލިއަނަށްވުރެ ގިނަ މީހުންނަށް ވޯޓުލުމުގެ ހައްގު ލިބިފައިވާއިރު، އިންތިހާބުގައި 20،375 މަގާމަށް ކެންޑިޑޭޓުން އިންތިހާބު ކުރާނެ އެވެ.
