ރާއްޖޭގެ ހައިކޯޓުގެ މަސައްކަތްތައް ޑިޖިޓަލައިޒްކޮށް، އީ-ހައިކޯޓަށް ބަދަލުކުރެއްވުމުގެ ތަސައްވަރު ގެންގުޅުއްވާ ކަމަށް އެ ކޯޓުގެ އިސް ފަނޑިޔާރު ހުސައިން ޝަހީދު ހާމަކުރައްވައިފި އެވެ. ފަނޑިޔާރު ހުސައިން ޝަހީދު މިހެން ވިދާޅުވީ ހައިކޯޓުން ބޭއްވި ރަސްމިއްޔާތެއްގައި ވާހަކަ ދައްކަވަމުންނެވެ.
އެގޮތުން އޭނާގެ ތަސައްވުރު ހާމަކުރައްވަމުން ޝަހީދު ވިދާޅުވީ ހައިކޯޓުގެ މަސައްކަތްތަށް ކަރުދާހުގައި ކުރުން ދޫކޮށްލައި ޒަމާނާ އެއްގޮތަށް ހައިކޯޓުގެ މަސައްކަތްތަށް ޑިޖިޓަލް ކުރަން ޖެހޭ ކަމަށެވެ. އަދި އެންމެ ބޮޑު އުއްމީދަކީ ހައިކޯޓުގެ މަސައްކަތްތައް އީ-ހައިކޯޓެއްގެ ގޮތުގައި ފުރާފުރިހަމަވެ، އަދުލު އިންސާފު ގާއިމު ކުރުމަށް މިކުރާ މަސައްކަތް އަވަސްވެގެން ދިއުން ކަމަށް ވިދާޅުވި އެވެ.
"މިއަދު އަޅުގަނޑުމެން ގެންގުޅޭ ލޮގު ފޮތްތަކާއި އެނޫންވެސް ފޮތްތައް ދޫކޮށްލާފަ ޒަމާނާ އެއްގޮތަށް އަޅުގަނޑުމެން ކޮންމެ ތަނެއްގަ، ދަތުރުމައްޗެއް ކަމުގައިވީނަމަވެސް އަޅުގަނޑުމެން ގެންގުޅޭ ސްމާޓް ފޯނު ނޫނ/ު ޓެބްލެޓުން އަޅުގަނޑުމެންގެ މަސައްކަތްތައް އަބަދުވެސް ކޮށްލަކޮށްލާ ތިބެވޭނެ ތަނަކަށް ދިވެހިރާއްޖޭގެ ހައިކޯޓު ހަދަން ބޭނުންވަނީ،" އޭނާ ވިދާޅުވި އެވެ.
ހައިކޯޓުގައި ހުރި ހަތަރު އަހަރަށް ވުރެ ގިނަ ދުވަސްވެފައިވާ މައްސަލަތައް ނިންމުމުގެ މަސައްކަތްތަކެއް އެކި ފޭސް ތަކަކަށް ބަހާލައިގެން ކުރިއަށް ގެންދަން އެ ކޯޓުން ވަނީ ދާދި ފަހުން ނިންމައިފަ އެވެ.
އެގޮތުން ފުރަތަމަ ފިޔަވަހީގައި މަސައްކަތް ކުރަނީ ހަތަރު އަހަރަށް ވުރެ ގިނަ ދުވަސްވެފައި ހުރި މައްސަލަތައް ނިންމުމަށެވެ. އެއީ 2017، 2018، 2019، އަދި 2020، ގައި އެ ކޯޓަށް ހުށަހެޅި އަދި ނުނިމި ހުރި މައްސަލަތަކެވެ.
އިސްތިއުނާފުގެ ފުރަތަމަ މަރުހަލާގެ ކޯޓު، ހައި ކޯޓުން ބުނި ގޮތުގައި އެ މައްސަލަތައް ނިންމުމަށް ކޮންމެ ދުވަހަކު ވެސް މިހާރު ރަސްމީ ގަޑި ނިމިގެން އެ މައްސަލަތަކުގެ އަޑުއެހުން ތާވަލުކޮށްގެން ކުރިއަށް ގެންދަން އެ ކޯޓުން ވަނީ ނިންމައިފަ އެވެ.
