މެންޗެސްޓާ (ފެބްރުއަރީ 27) - މި ސީޒަން ނިމުމުން މެންޗެސްޓާ ޔުނައިޓެޑަށް ގެންނަ ބަދަލުތަކުގެ ތެރެއިން އެ ކްލަބުން ވިއްކާލާ ކުޅުންތެރިންގެ ލިސްޓުގެ ކުރީގައި އޮތީ، މީގެ އެއް އަހަރު ކުރިން ބޮޑު އަގުގައި އެ ޓީމަށް ގެނައި ބްރެޒިލްގެ ވިންގް، އެންތަނީ ކަމަށް ރިޕޯޓްތައް ބުނެފި އެވެ.
މީގެ 18 މަސް ދުވަސް ކުރިން، އަޔަކްސް ދޫކޮށް ޔުނައިޓެޑަށް އެންތަނީ ބަދަލުވީ، 109 މިލިއަން ޑޮލަރުގެ ޑީލެއްގަ އެވެ. އެކަމަކު، އެ ޓީމާ އެކު އެކަށީގެންވާ ވަރުގެ ކުޅުމެއް އެންތަނީ އަށް ނުދެއްކެ އެވެ. މި ސީޒަނުގައި އެންމެ ގޯލެއް ޖެހުނު އެންތަނީ އަށް، ޕްރިމިއާ ލީގުގައި ކުޅުނު 20 މެޗުން ވެސް ގޯލެއް ނުޖެހުނުއިރު، ގޯލެއް ޖަހަން ފުރުސަތު ވެސް ހޯދައިނުދެވުނެވެ.
މި ސީޒަނުގައި އެންތަނީ އަށް ޖެހުނު ހަމައެކަނި ލަނޑު ކާމިޔާބުކުރީ އެފްއޭ ކަޕްގައި އިނގިރޭސި ދަށް ޑިވިޝަނުގެ ކްލަބް، ނިއުޕޯޓް ކައުންޓީ ކޮޅަށެވެ.
އުމުރުން 24 އަހަރުގެ އެންތަނީ، 2027 ވަނަ އަހަރުގެ ޖޫން މަހުގެ ނިޔަލަށް ޔުނައިޓެޑްގެ ކޮންޓްރެކްޓްގައި ހުރި ނަމަވެސް، މި ސީޒަނަށް ފަހު، ޔުނައިޓެޑްގެ ޓީމުގެ ކަންކަން ހިންގުމާ ހަވާލުވެހުރި، އިނިއޯސް ކުންފުނިން ގެންނަ ބަދަލުތަކުގެ ތެރެއިން އެންތަނީ ވިއްކާލާނެ ކަމަށް ރިޕޯޓްތައް ބުނެ އެވެ.
ޓްރާންސްފާ ބާޒާރުގައި މި ވަގުތު އަގުތައް ހުރި ގޮތުން، ޔުނައިޓެޑަށް އެންމެ އަގުބޮޑުކޮށް ވެސް އެންތަނީ ވިއްކާލެވެން އޮތީ، 30 މިލިއަން ޑޮލަރަށެވެ.
އިނގިރޭސި މަހުޖަނު، ޖިމް ރެޓްކްލިފްގެ ކުންފުނި އިނިއޯސް އިން ޔުނައިޓެޑްގެ ހިންގުމުގެ ކަންކަމަށް މިހާރު ބަދަލު ގެންނަމުން އަންނައިރު، ޓީމާ ގުޅޭ ކަންކަމުގައި ބޮޑެތި ބަދަލުތަކެއް ގެންނަން ނިންމާފައި އޮތީ މި ސީޒަން ނިމުމުންނެވެ. އޭގެ ތެރޭގައި ޔުނައިޓެޑްގެ ކޯޗު، އެރިކް ޓެން ހާގްގެ މުސްތަގުބަލާ މެދު ގޮތެއް ނިންމުން ވެސް ހިމެނެ އެވެ.
