ޕެރޫގައި މަދިރީގެ ޒަރިއްޔާއިން ފެތުރޭ ޑެންގީ ބަލި ފެތުރޭތީ ސިއްހީ ކުއްލި ނުރައްކަލުގެ ހާލަތު އިއުލާނު ކޮށްފި އެވެ.
ޕެރޫ ސަރުކާރުގެ ކެބިނެޓުން ސިއްހީ ކުއްލި ނުރައްކަލުގެ ހާލަތު އިއުލާން ކުރުމަށް ނިންމީ ހޯމަ ދުވަހު ބޭއްވި ބައްދަލުވުމެއްގަ އެވެ.
މިހާތަނަށް ޕެރޫއިން 31،300 ޑެންގީ ކޭސް ފެނިފައިވާއިރު، ބަލީގައި މަރުވި މީހުންގެ އަދަދު ވަނީ 32 އަށް އަރާފަ އެވެ.
ޑެންގީ ޖެހިފައިވާ ބަލި މީހުންނާ އެކު ޕެރޫގެ ހޮސްޕިޓަލްތައް ވަނީ ފުރިފަ އެވެ. އަދި ބަލި ޖެހިގެން ސީރިއަސްވެފައިވާ މީހުންތައްވެސް ގިނަ ކަމަށް އެ ގައުމުގެ ކަމާބެހޭ ފަރާތްތަކުން ބުނެ އެވެ.
ޕެރޫގެ 25 އެޑްމިނިސްޓްރޭޓިވް ސަރަހައްދުގެ ތެރެއިން 20 ސަރަހައްދުގައި ޑެންގީ ވަރަށް ބޮޑަށް ފެތުރެމުން އަންނައިރު، ބަލިން ރައްކާތެރިވުމަށް އަޅަން ޖެހޭ ފިޔަވަޅުތައް އަންނަނީ އެ ގައުމުގެ ސަރުކާރުން އަޅަމުންނެވެ.
މިދިޔަ އަހަރު ޕެރޫއިން ޑެންގީ ބަލީގައި 428 މީހުން މަރުވެފައިވާއިރު، ޖުމްލަ 269،216 މީހުންނަށް ބަލި ވަނީ ޖެހިފަ އެވެ.
ޕެރޫގައި ޑެންގީ ފެތުރެމުން އަންނަނީ މޫސުމަށް އަންނަ ބަދަލުތަކާ ގުޅިގެން އެ ގައުމުގައި ފެންބޮޑުވުން އިތުރުވުމާ ގުޅިގެންނެވެ.
