އެންޓާޓިކާއިން ފުރަތަމަ ފަހަރަށް ދޫނި ރޯނގާ ފެނިފައިވާކަން އިއުލާނު ކޮށްފި އެވެ.
އާދީއްތަ ދުވަހު ސްޕެއިންގެ މިނިސްޓްރީ އޮފް ސައިންސް އިން ބުނީ އެންޓާޓިކާއިން ދޫނި ރޯގާ ފެނިފައިވާ ކަމަށާއި، މިކަމާ ގުޅިގެން ކާރިސާއެއް ދިމާވެދާނެތީ ސައިންސްވެރިން ކަންބޮޑުވުން ފާޅުކޮށްފައިވާ ކަމަށެވެ.
ދޫނި ރޯގާ އެންޓާޓިކާއިން ފެނުނީ މަރުވެފައި އޮތް ދެ ދޫނިން ނެގި ސާމްޕަލްތައް ބައްޔަށް ޕޮޒިޓިވްވުމުންކަން ފާހަގަކޮށް މިނިސްޓްރީން ބުނީ އެންޓާޓިކާއިން ދޫނިތައް މަރުވަމުން އަންނަނީ ބަލި ފެތުރޭތީ ކަމަށް ލަފާ ކުރެވޭ ކަމަށެވެ.
ދޫނި ރޯނގާ އެންމެ ފުރަތަމަ އެންޓާޓިކް އިން ފެނިފައި ވަނީ މިދިޔަ އަހަރުގެ އޮކްޓޫބަރުގައި ކަމަށްވާއިރު، އެއީ އެންޓާޓިކާއާ 1،000 މޭލު ދުރުގައި އޮންނަ ސަރަހައްދެކެވެ. ނަމަވެސް މިހާރު އެ އަންނަނީ މުޅި އެ ސަރަހައްދުގައި ފެތުރެމުންނެވެ.
މިދިޔަ އަހަރު ސައިންސްވެރިން ހެދި ދިރާސާއެއްގައި ބުނީ ދޫނި ރޯގާ އެންޓާޓިކާގައި ފެތުރިއްޖެނަމަ، ވެގެންދާނީ މުޅި އެ ސަރަހައްދުގައި ހިނގާނެ އެންމެ ބޮޑު އެކޮލޮޖިކަލް ކާރިސާއަށް ކަމަށެވެ.
ދޫނި ރޯގާއަކީ އެއް ދޫނިން އަނެއް ދޫންޏަށް އަރާ ބައްޔަކަށްވާއިރު، މި ބަލި އިންސާނުން ގައިންވެސް ވަނީ ފެނިފަ އެވެ. އަދި ބަލީގެ އާ ވޭރިއަންޓެއް އުފެދި އިންސާނުން ގައިން ގަޔަށް އެރުމުގެ ބިރުވެސް އެބަ އޮތް ކަމަށް ސައިންސްވެރިން ބުނެ އެވެ.
ފާއިތުވެދިޔަ ދުވަސްތަކުގައި ދެކުނު އެމެރިކާއިން އެތައް ހާސް ސީލަޔަން އަދި އެހެނިހެން ޖަނަވާރުތައްވެސް ވަނީ ދޫނި ރޯނގާގައި މަރުވެފަ އެވެ.
