ދެމެހެއްޓެނިވި ތަރައްގީއަށް ސަރަހައްދީ އެއްބާރުލުން އިތުރުކުރަން ޖެހޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް މިއަދު ވިދާޅުވެއްޖެ އެވެ.
އޭޝިއަން ޕާލިމެންޓަރީ ސެޝަންގެ 14 ވަނަ ޕްލެނަރީ ބައްދަލުވުމުގައި ވާހަކަ ދައްކަވަމުން އަސްލަމް ވަނީ ގުޅުން ބަދަހިކޮށް މައުލޫމާތު ބަދަލުކުރުމުގެ ތެރެއިން އަންނަން އޮތް ޖީލުތަކަށް ދުނިޔެ ރައްކާތެރިކަމާ އެކު ފޯރުކޮށްދެވޭނެ ކަމަށް ވިދާޅުވެފަ އެވެ.
"ރާއްޖެއަކީ ދެމެހެއްޓެނިވި ތަރައްގީގެ މަސައްކަތްތަކުގައި އެންމެ ކުރީ ސަފުގައި ހަރަކާތްތެރިވާ ގައުމެއް. ވަސީލަތްތައް މަދު ނަމަވެސް މޫސުމަށް އަންނަ ބަދަލުތަކުން އަރައިގަތުމުގެ ޔަގީންކަން ކަށަވަރުކުރުމަށް ޓަކައި، ރާއްޖެއިން ހިތްވަރުގަދަ، އެކަށީގެންވާ ފިޔަވަޅުތަކެއް އަޅަން ވަނީ ޖެހިފައި," އެމަނިކުފާނު ވިދާޅުވި އެވެ.
އިއާދަކުރަނިވި ހަކަތައިގެ ވަސީލަތްތަކުގެ ތެރެއިން ސޯލާ ހަކަތަ، ކުނި މެނޭޖު ކުރުމުގެ އީޖާދީ ވިސްނުންތަކާއި ކަނޑުގެ ދިރުންތައް ހިމާޔަތް ކުރުމުގައި ރާއްޖޭން ނަމޫނާ ދައްކަމުންދާ ކަމަށް އަސްލަމް ވިދާޅުވި އެވެ. ވޭތުވެދިޔަ ފަސް އަހަރުގެ ތެރޭގައި ރާއްޖޭން ގާނޫނީ އޮނިގަނޑުގެ ތެރެއަށް މޫސުމީ ބަދަލުތަކާ ގުޅޭ ގިނަ ކަންކަން ފައްތާފައިވާކަން އެމަނިކުފާނު ފާހަގަކުރެއްވި އެވެ.
"ސިންގަލް ޔޫސް ޕްލާސްޓިކް ފޭސް އައުޓް ކުރުމާއި ޔޫޓިލިޓީ ހިދުމަތްތައް ރެގިއުލޭޓް ކުރަން ހާއްސަ އިދާރާއެއް ވަނީ ގާއިމުކުރެވިފައި. މި ގާނޫނުތަކުގެ ސަބަބުން ރާއްޖޭގެ ގުދުރަތީ ވަސީލަތްތައް މެނޭޖުކޮށް ބަލަހައްޓަން ފަސޭހަ ވެގެންދާނެ," އަސްލަމް ވިދާޅުވި އެވެ.
ރާއްޖެއަކީ އާމްދަނީގެ ނިސްބަތުން މަތީ މެދު ފަންތީގެ ގައުމެއް ކަމަށްވުމާ އެކު ކްލައިމެޓް ފައިނޭންސިން އަގުހެޔޮކޮށް ހޯދުމަށް ރާއްޖެއަށް ގޮންޖެހުންތަކެއް ހުރި ކަމަށް އަސްލަމް ވިދާޅުވި އެވެ.
"މަލްޓިލޭޓަރަލް އިދާރާތަކުން އެޕްރޫވް ކުރާ ފަންޑުތައް ރާއްޖެއާ ހިސާބަށް ފޯރުމަށް ގިނަ ދުވަސްތަކެއް ހޭދަވޭ. އެ ފައިސާތައް ލިބޭއިރު ރަށްތައް ގިރައި ޕްރޮޖެކްޓުތައް އޮންނަނީ މުޅިން ރީޑިޒައިން ކުރަން ޖެހިފައި. ކަންމިހެން އޮތުމާ އެކު ކްލައިމެޓް އެޑެޕްޓޭޝަންއަކީ ރާއްޖެއަށް ގައުމީ ކަމެއް," އަސްލަމް ވިދާޅުވި އެވެ.
ރާއްޖޭގެ ފަރާތުން ދެމެހެއްޓެނިވި ތަރައްގީއަށް ދެމުންދާ އަހަންމިއްޔަތު އޭޝިއާ ބައްރުގެ އެހެން ގައުމުތަކުން ވެސް ދެމުންދާތަން މިހާރު ފެންނަމުންދާ ކަމަށް އަަސްލަމް ވިދާޅުވި އެވެ. އެގޮތުން, އިންޑިއާ ކަނޑުގައި ކަޅުބިލަމަހުގެ މަސްވެރިކަން ދެމެހެއްޓެނިވި ގޮތެއްގައި ކުރުމަށް ގައުމުތަކުން އެއްބާރުލުން ދެމުންދާ ކަމަށް އަސްލަމް ވިދާޅުވި އެވެ.
އެ ސެޝަން ކުރިއަށްދަނީ އަޒެރުބައިޖާންގެ ބަކޫގަ އެވެ. މިއަހަރުގެ ސެޝަންގެ ތީމަކީ "ފޯސްޓަރިން ރީޖަނަލް ކޯޕަރޭޝަން ފޯ ސަސްޓެއިނަބަލް ޑެވެލޮޕްމަންޓު އިން އޭޝިއާ" އެވެ.
