މާޗު 17، ގައި ބޭއްވުމަށް ތާވަލުކޮށްފައިވާ ރައްޔިތުންގެ މަޖިލީހުގެ އިންތިހާބުގައި އިދިކޮޅު އެންމެ ބޮޑު ޕާޓީ، އެމްޑީޕީގެ ކެމްޕެއިން ތަރުޖަމާނުގެ ގޮތުގައި މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސާ ހަމަޖައްސައިފި އެވެ.
އެމްޑީޕީގެ އެކްސްގެ ރަސްމީ އެކައުންޓުން އާއްމުކުރި ލިއުމެއް މެދުވެރިކޮށް އެ ޕާޓީން ވަނީ މިއަދު އެ ކަން ހާމަކޮށްފަ އެވެ.
އެމްޑީޕީގެ ކެމްޕެއިން ތަރުޖަމާނަކަށް އީސަ ހަމަޖެއްސިއިރު، އަންނަ އިންތިހާބުގައި އޭނާ ވާދައެއް ނުކުރައްވަ އެވެ. އީސައަކީ، ސަތާރަވަނަ ރައްޔިތުންގެ މަޖިލީހުގައި ވެސް ކެނދިކުޅުދޫ ދާއިރާ ތަމްސީލް ކުރެއްވި މެންބަރެވެ. އަށާރަވަނަ މަޖިލީހަށް ވެސް ވާދަކުރެއްވި ނަމަވެސް އެ ފަހަރު އިންތިހާބުން ނާކާމިޔާބުވި އެވެ.
ރައްޔިތުންގެ މަޖިލީހުގެ މެޖޯރިޓީ މި ވަގުތު އޮތް އެމްޑީޕީން މި އަންނަ އިންތިހާބުގައި 89 ދާއިރާއަކަށް ވާދަ ކުރެ އެވެ. އެމްޑީޕީން ވާދަނުކުރަނީ ހަތަރު ދާއިރާއަކަށެވެ.
އެންމެ ފަހުން ބޭއްވި ރައްޔިތުންގެ މަޖިލިހުގެ އިންތިހާބުގައި އެމްޑީޕީން ބޮޑު ކާމިޔާބީއެއް ހޯދާފައިވެ އެވެ. 2019 ވަނަ އަހަރު ބޭއްވި އެ އިންތިހާބުގައި އެ ޕާޓީން ވަނީ 87 ދާއިރާގެ ތެރެެއިން 65 ދާއިރާ ކާމިޔާބުކޮށްފަ އެވެ. އެއީ އެއް ޕާޓީއަކަށް އެހާ ބޮޑު މެޖޯރިޓީއެއް ލިބުނު ހަމައެކަނި ފަހަރެވެ.
ބައިލައްކައެއްހާ މެންބަރުން ތިބި އަދި އިންތިހާބުތައް ކާމިޔާބު ކުރުމުގެ ރެކޯޑު މި ވަގުތަށް އެންމެ ރަނގަޅަށް އޮތް އެމްޑީޕީއަށް މިދިޔަ ރިޔާސީ އިންތިހާބުން ލިބުނު ނާކާމިޔާބީއާއެކު މިއީ އެ ޕާޓީއަށް ވަރަށް ވެސް މުހިންމު އިންތިހާބެކެވެ.
އެ ޕާޓީން ވަނީ މިހާތަނަށް ބޭއްވި ތިން ކައުންސިލް އިންތިހާބަކާއި، މިހާތަނަށް ބޭއްވި ހަތަރު ރިޔާސީ އިންތިހާބުގެ ތެރެއިން ދެ ރިޔާސީ އިންތިހާބު ކާމިޔާބުކޮށްފަ އެވެ. މަލްޓިޕާޓީ ޑިމޮކްރެޓިކް ނިޒާމު އައި ފަހުން، އެންމެ ފުރަތަމަ ރިޔާސީ އިންތިހާބު ވެސް ކާމިޔާބުކުރީ އެ ޕާޓީންނެވެ.
