ރާއްޖޭގެ ކުޅިވަރުގެ ވެޓަރަންސުންގެ އަގުވަޒަންކޮށް ބޮޑު ފުރުސަތުތަކެއް ފަހިވާ ގޮތަށް، ނެޝަނަލް ސްޕޯޓްސް ވެޓަރަންސް އެމްބެސެޑާސްގެ ދަފްތަރުގައި ރަޖިސްޓަރީވުމުގެ ފުރުސަތު ރަސްމީކޮށް ހުޅުވާލައިފި އެވެ.
މިއަދު އެކަމަށް ހާއްސަކޮށް ހެންވޭރު ބޯޅަގޭ ސެމިނާ ރޫމުގައި ބޭއްވި ނޫސްވެރިންގެ ބައްދަލުވުމުގައި ބައިވެރިވީ ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) އާއި ކޮމިޝަނާ އޮފް ސްޕޯޓްސް، މުހައްމަދު ތޮލާލް އެވެ.
ރާފިއު އާއި ތޮލާލް ވަނީ، ރައީސުލްޖުމްހޫރިއްޔާ، ޑރ. މުހައްމަދު މުއިއްޒުގެ ސަރުކާރުގެ ފުރަތަަމަ 100 ދުވަސް ތެރޭގައި މުހިއްމު ކަމެއްގެ ގޮތުގައި ދެކިގެން، ކުރީގެ ކުޅުންތެރިން/އެތުލީޓުން/ކުޅިވަރުގެ ހިދުމަތްތެރިންނަށް އެބަސަޑަރުންގެ ގޮތުގައި ކަންކަން ފަހިކޮށްދޭން ނިންމި ނިންމުމަށް މަރުހަބާ ކިޔައިފަ އެވެ.
"އަޅުގަނޑުމެންގެ ތެރެއިން ކުޅިވަރަށް އެތަން ގޮތަކުން، އަމިއްލަ ފައިސާ އިން ކުޅިވަަރަށް ހަރަދުކޮށް، އަމިއްލަ ހަޔާތް ކުޅިވަރު ތެރޭގައި، އެތުލީޓެއްގެ ގޮތުގައި އެ ނޫނަސް ކުޅިވަރުގެ ހިދުމަތެއްގެ ތެރޭގައި އުޅުނު އެތައް ފަރާތްތަކެއް އެބަތިބި، އެއް ބައި މީހުން ދުނިޔެ ދޫކޮށް ގޮސްފި، އަޅުގަނޑުމެން ބޭނުންވަނީ މި ފަދަ ހިދުމަތްތެރިންގެ މި ކަންކަން ރަނގަޅު ގޮތުގައި ކުރިއަރުވާ ކަންކަން ދިރުވަން،" ރާފިއު ވިދާޅުވި އެވެ.
ރާފިއު ވިދާޅުވީ، ކުޅިވަރު މިނިސްޓްރީގެ ޕޯޓަލް އިން، ނެޝަނަލް ސްޕޯޓްސް ވެޓަރަންސް އެމްބެސެޑާސްގެ ދަފްތަރުގައި ރަޖިސްޓަރީވުމަށް ހުޅުވާލެވިފައިވާނެ ކަމަށެވެ.
ކުޅިވަރު ލެޖެންޑުންގެ މި ދަފުތަރު އެކުލަވާލާނީ 2015 ވަނަ އަހަރުން ފެށިގެން އަމަލުކުރަމުން އަންނަ ކުޅިވަރާ ބެހޭ ގާނޫނުގެ 13 ވަނަ މާއްދާ އިން ބާރު ލިބިގެން ހަދާފައިވާ އުސޫލެއްގެ ތެރެއިންނެވެ.
މި އުސޫލުގެ މަގްސަދުތަކަށް ބަލާއިރު، މައިގަނޑު ތިން ކަމެއް ހިމެނެ އެވެ. އެއީ، ގައުމީ ނުވަތަ ބައިނަލްއަގުވާމީ ފެންވަރުގައި ކުޅިވަރު ކުޅެ، ކުޅިވަރުގެ ރެކޯޑް ހަދައި، މެޑަލް ހޯދައި، ގިނަގުނަ ކާމިޔާބީ ކުޅިވަރުގެ ތެރެއިން ހޯދާފައިވާ ފަރާތްތަކާއި އަދި ކުޅިވަރާ ގުޅުންހުރި ދާއިރާގެ ތެރޭގައި ހަރަކާތްތެރިވަމުންދާ ފަރާތްތަކުގެ އަގުވަޒަންކޮށް، އެ ފަރާތްތަކަށް ހިތްވަރުދީ އަދި ކުޅިވަރުގެ މާހައުލުގައި ދެމިތިބުމުގެ ޝައުގުވެރިކަން އުދެއްދުމެެވެ. ދެން، ހިމެނެނީ، ޒުވާން ކުޅުންތެރިން ވަކި ސަބަބަކާ ހުރެ ކުޅިވަރުން ވަކިވެގެންދާއިރު ކުރިމަގުގައި އެ ކުޅުންތެރިންނަށް ކުޅިވަރުގެ ތެރެއިން ކުރެވޭނެ ކަންތައްތައް ފަހިކޮށްދިނުމާއި ކުޅިވަރު ދާއިރާ އަށް ވަންނަން ބޭނުންވާ ފަރާތްތަކަށް މައުލޫމާތު ފޯރުކޮށްދިނުން ހިމެނެ އެވެ.
ދަފްތަރުގައި ރަޖިސްޓްރީވުމަށް ހުށަހަޅާއިރު، ނުވަ ޝަރުތެއް ފުރިހަމަވާން ޖެހެ އެވެ.
titledesc
އެމްބަސަޑަރުންގެ ގޮތުގައި ނަން ހުށަހެޅުމުގެ ޝަރުތަކާ ބެހޭގޮތުން، ރާފިއު ވިދާޅުވީ، ކޮންމެ ފަރާތަކުން ވެސް ޕޯޓަލް މެދުވެރިކޮށް މައުލޫމާތު ފޮނުވާއިރު، އެ ހިމަނާ ކަންކަން ސައްހަތޯ ކަނޑައެޅުމުގެ ކަންކަން ކުރާނީ ކޮމިޓީ އަކުންނާއި އެސޯސިއޭޝަންތަކުގެ އެހީގައި ކަމަށެވެ.
"މި ވެޓެރަންސް ނޫނީ ލެޖެންޑުންގެ މައުލޫމާތުތަކަކީ ކޮންމެ ގޮތެއް ވިޔަސް ވަރަށް މުހިންމު އެއްޗެއް. އަޅުގަނޑުމެން ނޫން ބަޔަކު މި ތަނުގައި (މިނިސްޓްރީގައި) ތިއްބަސް، އެ ތަން ޒަމާންތަކެއް ވަންދެން މި މައުލޫމާުތުތައް ހުންނާނެ،" ރާފިއު ވިދާޅުވި އެވެ.
ގައުމީ ކުޅިވަރު އެމްބަސަޑަރުންގެ ދަފްތަރު އެކުލަވާލާ ކޮމިޓީގައި ހިމެނޭނީ ސްޕޯޓްސް މިނިސްޓަރު ރާފިއު އައްޔަނުކުރާ ފަސް މެމްބަރުންނެވެ. އެ ކޮމިޓީން ހުރިހާ ކަންކަމެއް ބަލައި ސާފުކޮށް، އެމްބަސަޑަރުންގެ ގޮތުގައި ހޮވާ ފަރާތްތަކާ އެކު، ހާއްސަ އިގުރާރެއްގައި ސޮއިކުރެވޭނެ އެވެ.
މިއަދުގެ އިވެންޓްގެ ތެރެއިން މިނިސްޓަރު ރާފިއު ވާހަކަ ދައްކަވަނީ.--- ފޮޓޯ: އަބްދުﷲ އިޔާން / އަދަދު
ނެޝަނަލް ސްޕޯޓްސް ވެޓަރަންސް އެމްބެސެޑާސްގެ ދަފްތަރުގައި ރަޖިސްޓަރީވުމުގެ ފުރުސަތު ވަކިވަކި އެތުލީޓުންނަށް އޮތްގޮތަށް، އެސޯސިއޭޝަނަކުން ބޭނުންވެއްޖެ ހިނދެއްގައި އެ އެސޯސިއޭޝަނަކަށް ވެސް އެތުލީޓުން ރަޖިސްޓްރީ ކުރުމުގެ ފުރުސަތު އޮންނާނެ ކަމަށް ކޮމިޝަނާ އޮފް ސްޕޯޓްސް ތޮލާލް ވަނީ ވިދާޅުވެފަ އެވެ.
މި ގޮތަށް އިންތިޒާމްތައް ހަމަޖެއްސުމުގެ އެންމެ ބޮޑު ބޭނުމަކީ، ކުޅިވަރަށް އަގުނުކުރެވޭ އެތައް ހިދުމަތްތަކެއް ކޮށްދީފައިވާ ގިނަ ފަރާތްތަކެއް ތިބިއިރު، މިހެން އަގުވަޒަންކޮށް، ކުރިމަގަށް ކަމެއް ރަނގަޅުކުރަން ކުރެވޭ ކަމެއްގައި އެންމެންނަށް ފުރުސަތު އޮންނާނެ އިންތިޒާމްތަކެއް ހަަމަޖެއްސުމަށް ކަމަށް ތޮލާލް ވިދާޅުވެފައިވެ އެެވެ.
ނެޝަނަލް ސްޕޯޓްސް ވެޓަރަންސް އެމްބެސެޑާސްގެ ދަފްތަރުގައި ރަޖިސްޓަރީވުމުގެ އުސޫލު މާދަމާ ގެޒެޓްކުރާނެ އެވެ. އެހާ ހިސާބުން ރަސްމީކޮށް، އުސޫލުގެ ކަންކަން ހުރިހާ ފަރާތަކަށް ވެސް ފެންނާނެ އެވެ.
އެ ގޮތުން، އުސޫލުގައިވަނީ ވެޓެރަންސް އެމްބަސަޑަރުންގެ ޒިންމާތަކާއި ލިބޭ މަންފާތަކެއް ވެސް ހިމަނައިފަ އެވެ.
ޒިންމާތަކަށް ބަލާއިރު، މުޖުތަމައު ބަލައިގަންނަ ފައިދާހުރި ހިދުމަތްތަކެއް ކުރުމާއި ކުޅިވަރުގެ ދާއިރާ ތަރައްގީކޮށް، ކުރިއެރުވުމަށް މަސައްކަތްކުރުމާއި ކުޅިވަރުގެ ދާއިރާ ކުރިއެރުވުމުގައި އެކުލަވާލެވޭ ސިޔާސަތުތައް ކަނޑައެޅުމުގައި އެ ފަރާތްތަކުގެ އެހީތެރިކަން ފޯރުކޮށްދިނުން ހިމެނެ އެވެ. އަދި އެ ފަރާތަކަށް ލިބިފައިވާ ހުނަރާއި ތަޖުރިބާގެ އަލީގައި ކުޅިވަރުގެ ދާއިރާ ކުރިއެރުވުމަށް މަސައްކަތްކޮށްދޭން ވަގުތު ދިނުމާއި އިންސާނީ ހައްގުތައް ރައްކާތެރިކުރުމާ އެކު، އެއްވެސް ފަރާތެއް ބާކީނުކޮށް ހުރިހާ ފަރާތަކަށް ވެސް އިންސާފުވެރިކަމާއި ހަމަހަމަ އުސޫލުތަކުން މަސައްކަތްކުރުން ހިމެނެ އެވެ.
އަދި، ކުޅިވަރު ދާއިރާއާ ގުޅުންހުރި ފަރާތްތަކުގެ (ސްޓޭކްހޯލްޑަރުން)ގެ މަސްލަހަތާއި ބޭނުންތަކަށް ރިއާޔަތްކޮށް ހަމަހަމަ އިންސާފުވެރި އުސޫލުތަކުން، ހައްލުތައް ހޯދައިދިނުމާއި ކުޅިވަރު ހަރަކާތްތަކުގެ ތެރޭގައި ހިނގާ ރަނގަޅާއި ނުރަނގަޅު ކަންތައްތައް ފާހަަގަކޮށް ގައުމީ ކުޅިވަރު މަޖިލީހަށް ހުށަހެޅުމުގެ އިތުރުން، ކުޅިވަރުގެ ދާއިރާ އާއި ގުޅުންހުރި ފަރާތްތައް ކަމަށްވާ ކުޅިވަރާ ބެހޭ ވުޒާރާ އާއި މޯލްޑިވްސް އޮލިމްޕިކް ކޮމިޓީ، ކޮމިޝަނާ އޮފް ސްޕޯޓްސް، ގައުމީ ކުޅިވަރު ޖަމިއްޔާތައް، ކުޅިވަރު ކްލަބްތައް އަދި އެކެޑަމީއާ ގުޅިގެން ކުޅިވަރު ކުރިއެރުވުމަށް މަސައްކަތް ކުރުން ހިމެނެ އެވެ.
އެމްބަސަޑަރުންނަށް ލިބޭ މަންފާތަކަށް ބަލާއިރު، ގައުމީ/ބައިނަލްއަގުވާމީ ފެންވަރުގައި ބޭއްވޭ ކުޅިވަރުގެ ހަރަކާތްތަކުގައި ވެޓެރަންސް އެމްބެސަޑަރެއްގެ ގޮތުގައި ބައިވެރިވުމުގެ ފުރުސަތުދިނުމާއި ހަރަދުތައް ހަމަޖައްސައިދިނުމުގެ އިތުރުން، އެބަސަޑަރެއްގެ ޝަރަފުގައި ދޭ މެޑަލް/ބެޖް އެރުވުން ހިމެެނެ އެވެ. އަދި އެ މެޑަލް/ބެޖް، ކުޅިވަރުުގެ އެކި ހަފްލާތަކުގައި ބޭނުންކުރުމުގެ އިހުތިޔާރުދޭން ނިންމާފައިވާއިރު، ސްޕޯޓްސް މެޑިކަލް އިންޝިއުރަންސް ހަމަޖައްސައިދީ މާލީ އިދާރާތަކުން ލިބެން ހުންނަ އެހީތެރިކަން ވެސް ހޯދައިދިނުން ހިމެނެ އެވެ.
އެމްބަސަޑަރެއްގެ ގޮތުގައި ހަމަޖެއްސުމަށް ފަހު، ނަން އުނިކުރެވޭ ތިން ހާލަތެއް ވެސް ވަނީ އުސޫލުގައި ހިމަނައިފަ އެވެ. އެއީ، ކޯޓަކުން ނޫނީ ޓްރައިބިއުނަލް އަކުން އެ މީހެއްގެ މައްޗަށް ޖިނާއީ ނުވަތަ މަދަނީ މައްސަލައެއް ސާބިތުވެ ހުކުމް އިއްވުމާއި ނަޒާހަތްތެރިކަން ގެއްލޭފަދަ އެއްވެސް އަމަލެއް ކުރުމުގެ އިތުރުން، އަމިއްލަަ އަށް އެދިގެން ނަން އުނިކުރުން ހިމެނެ އެވެ.
