އެމެރިކާގެ ހޯމްލޭންޑް ސެކިއުރިޓީ ސެކްރެޓަރީ އަލިހާންޑްރޯ މަޔޯކާސް މަގާމުން ވަކި ކުރަން އެ ގައުމުގެ ގާނޫނު ހަދާ މަޖިލީހުގެ ތިރިގެ ހައުސް އޮފް ރިޕްރެޒެންޓޭޓިވްސް އިން ނިންމައިފި އެވެ.
ހައުސް އޮފް ރިޕްރެޒެންޓޭޓިވްގައި ނެގުނު ވޯޓުގައި އަލިހާންޑްރޯ ވަކި ކުރަން 214 މެމްބަރުން ވޯޓު ދިންއިރު، 210 މެމްބަރުން ވޯޓު ދިނީ އޭނާ ވަކި ކުރުމާ ދެކޮޅަށެވެ.
އެލެހާންޑްރޯ މަގާމުން ވަކި ކުރަން ހައުސް އޮފް ރިޕްރެޒެންޓޭޓިވްސް އިން ނިންމާފައި ވަނީ އެމެރިކާ-މެކްސިކޯ ބޯޑަރުން ގަވައިދާ ހިލާފަށް ގިނަ ބަޔަކު އެމެރިކާއަށް އެތެރެވެފައިވާ މައްސަލައިގައި އެކަށީގެންވާ ފިޔަވަޅެއް ނާޅާތީ، ބޯޑަރުތައް ބެލެހެއްޓުމުގައި އޭނާ އިހުމާލުވެފައިވާ ކަމަށް ތުހުމަތުކޮށްފަ އެވެ.
ދިރާސާތައް ދައްކާގޮތުން 2021 ވަނަ އަހަރުން ފެށިގެން 6.3 މިލިއަން މީހުން ވަނީ ގަވައިދާ ހިލާފަށް އެމެރިކާއަށް ވަދެފަ އެވެ.
އިދިކޮޅު ރިޕަބްލިކަން ޕާޓީން ކޮންޓްރޯލު ކުރާ ތަޅުމުން ނެގުނު ވޯޓުގައި އެލެހާންޑްރޯ ވަކި ކުރަން ނިންމާފައިވާއިރު، ދެން މި މައްސަލަ ދާނީ ޑިމޮކްރެޓިކުންގެ މެޖޯރިޓީ އޮންނަ ސެނަޓަށެވެ. ލަފާކުރެވެނީ ސެނެޓުން މި މައްސަލަ ފާސް ނުވާނެ ކަމަށެވެ.
އެމެރިކާގެ ރައީސް ޖޯ ބައިޑެން އެލެހާންޑްރޯ ދިފާއު ކުރައްވާ ވިދާޅުވީ އޭނާ މަގާމުން ވަކި ކުރަން ނިންމީ ސިޔާސީ ބޭނުމަށް ކަމަށް ކަމަށާއި، މިހާތަނަށް އަލިހާންޑްރޯ އޭނާގެ ވަޒީފާ ރަނގަޅަށް އަދާ ކޮށްފައި ކަމަށެވެ.
ނަމަވެސް ރިޕަބްލިކަންގެ ސްޕީކާ އޮފް ދަ ހައުސް މައިކް ޖޯންސަން ވިދާޅުވީ މަޔޯކަސް ވަކި ކުރީ އެކަން ކުރަން ޖެހިގެން ކަމަށާއި، އޭނާގެ މައްޗަށް ސީރިއަސް ތުހުމަތުތަކެއް ކުރެވޭ ކަމަށެވެ.
މިއީ އެމެރިކާގެ ކެބިނެޓު ސެކެޓްރީއަކު ވަކިކުރަން ފާސްކުރި ދެވަނަ ފަހަރެވެ. އެންމެ ފަހުން ކެބިނެޓް ސެކްރެޓަރީއެއް ވަކިކުރީ 1876 ވަނަ އަހަރު އޭރުގެ ސެކްރެޓަރީ އޮފް ވާ ވިލިއަމް ބެލްކްނަޕް އެވެ.
