ލައިޕްޒިގު، ޖާމަނީ (ފެބްރުއަރީ 14) - ޔުއެފާ ޗެމްޕިއަންސް ލީގުގެ ގަދަ 16 ބުރުގެ ފުރަތަމަ ލެގުގައި އެންމެ ފަހުގެ ޗެމްޕިއަން، މެންޗެސްޓާ ސިޓީން 3-1 އިން ކޯޕެންހާގެން ބަލިކުރިއިރު، މުބާރާތުގެ އެންމެ ކާމިޔާބު ޓީމު ރެއާލް މެޑްރިޑުން 1-0 އިން އާރްބީ ލައިޕްޒިގު ބަލިކޮށްފި އެވެ.
އަނިޔާގެ ސަބަބުން ޓީމުގެ މުހިންމު ކުޅުންތެރިޔާ، ޖޫޑް ބެލިންހަމް ނުލައި ރެއާލުން ކުޅުނު މި މެޗުގައި، އެ ޓީމުން އެ މަގާމަށް ކުޅުވީ ބްރާހިމް ޑިއާޒް އެވެ. މެޗުގެ ހަމައެކަނި ގޯލު ޖެހީ ވެސް ބްރާހިމް ޑިއާޒް އެވެ. އެއީ ދެ ވަަނަ ހާފުގެ ކުޅުން ފެށިގެން ތިން ވަނަ މިނިޓްގައި، މަތީ ކަނަށް ފޮނުވާލި ބޯޅައަކުންނެވެ.
ލައިޕްޒިގުން ގޯލާ އަމާޒުކޮށް ނުވަ ހަމަލާއެއް ފޮނުވާލި މި މެޗުގައި، ރެއާލްގެ ކީޕަރު އަންޑްރީ ލުނިން ވަނީ މޮޅަށް ކުޅެފަ އެވެ. ރެއާލަށް ދެ ވަނަ ލަނޑެއް ޖަހައިދޭން ވިނީޝިއުސް ޖޫނިއާ ފޮނުވާލި ޝޮޓެއް ވަނީ ދަނޑިއަށް އަމާޒުވެފަ އެވެ.
ރެއާލް ދަނޑުގައި ކުޅޭ ދެ ވަނަ ލެގު އޮންނާނީ އަންނަ މަހުގެ ހަ ވަނަ ދުވަހު އެވެ. ރެއާލުން ފާއިތުވި 14 ސީޒަނުގެ ތެރޭގައި 12 ވަނަ ފަހަރަށް ޗެމްޕިއަންސް ލީގުގެ ކުއާޓާ ފައިނަލުން ފުރުސަތު ހޯދަން ދެ ވަނަ ލެގު އެއްވަރުކޮށްލައިގެން ވެސް ފުއްދައިލެވޭނެ އެވެ.
ރެއާލްގެ ބްރާހިމް ޑިއާޒް ބޯޅައެއް ގޯލަށް ފޮނުވާލަނީ.
ރަށުންބޭރުގައި ކުޅުނު ސިޓީ އަށް 10 ވަނަ މިނިޓްގައި ކެވިން ޑި ބްރޭނާ ވަނީ ލީޑުނަގައިދީފަ އެވެ. މެޗުގެ 35 ވަަނަ މިނިޓްގައި ސިޓީގެ ކީޕަރު އެޑަސަން މޮރާއެސް ހެދި ގޯހެއްގެ ފައިދާނަގައި، ކޯޕެންހާގެންގެ މެގްނަސް މެޓްސަން ވަނީ ގޯލު ޖަހައި، އެ ޓީމަށް އެއްވަރުކޮށްދީފަ އެެވެ. ފުރަތަމަ ހާފު ނިމުމުގެ ކުރިން ސިޓީން ވަނީ ދެ ވަނަ ފަހަރަށް ލީޑުނަގައިފަ އެވެ. މި ލަނޑު ޖެހީ، ޑި ބްރޭނާ ދިން ބޯޅައަކުން ބެނާޑޯ ސިލްވާ އެވެ.
ޑި ބްރޭނާ ދިން ބޯޅައަކުން ދެ ވަނަ ހާފުގައި ސިޓީ އަށް ގޯލެއް ޖަހައިދޭން އާލިން ބްރައުޓް ހާލަންޑަށް ލިބުނު ފުރުސަތުގެ ބޭނުން ނުކުރެވުނެވެ. ސިޓީން ތިން ވަނަ ލަނޑު ޖެހީ މެޗުގެ އިތުރު ވަގުތުގަ އެވެ. މި ލަނޑު ކާމިޔާބުކުރީ، ފިލް ފޯޑެން އެވެ.
