އިނގިރޭސިވިލާތުގެ ފެލިކްސްޓޯވްގައި މަސްތުވެގެން ކޮންޓެއިނާ ބޯޓެއް ދުއްވި މީހަކު ޖަލަށް ލުމަށް ހުކުމް ކޮށްފި އެވެ.
އުމުރުން 65 އަހަރުގެ ޕޮލެންޑް ރައްޔިތެއް ކަމަށްވާ ޒްބިގްނިއެވް ޗާވްނިއެސް ޖެނުއަރީ، 15 ގައި މަސްތުވެގެން ބޯޓު ދުއްވަމުން ދަނިކޮށް ފުލުހުން އެ ބޯޓު ހުއްޓުވި އެވެ. އޭނާ ވަނީ ކުށަށް އިއުތިރާފްވެފަ އެވެ.
ބޯޓުން ޒްބިގްނިއެވް ހައްޔަރުކޮށް ކުރި ތަހުގީގުގައި ރަލުގެ ބާވަތެއް ވަރަށް ގިނައިން ބޭނުން ކޮށްގެން ހުރިކަން އެނގުނެވެ.
މި މައްސަލައިގައި ޒްބިގްނިއެވްގެ މައްޗަށް އުފުލި ދައުވާ ސާބިތުވެ އަށް މަސް ދުވަހުގެ ޖަލު ހުކުމެއް ވަނީ އިއްވާފަ އެވެ. އެ ހުކުމް އެއް އަހަރަށް ފަސްކޮށް، 494 ޕައުންޑުން ޖޫރިމަނާ ވެސް ކުރި އެވެ.
ނަމަވެސް މި މައްސަލަ ބެއްލެވި ފަނޑިޔާރު ޑޭވިޑް ވިލްސަން ވަނީ ޒްބިގްނިއެވް އަކީ އަހުލާގު ރަނގަޅު މީހެއްކަން ފާހަގަކޮށް އޭނާގެ ސަބަބުން އާންމުންނަށް ނުރައްކަލެއް ކުރިމަތިވެދާނެ ކަމަށް ނުފެންނަ ކަމަށް ބުނެފަ އެވެ.
މިގޮތުން ޒްބިގްނިއެވްގެ މައްޗަށް އިއްވާފައިވާ ހުކުމް އެއް އަހަރު ދުވަސް ތެރޭގައި އިތުރު ކުށެއް ނުކޮށްފި ނަމަ މައާފް ކުރުމުގެ އިހުތިޔާރު ލިބިގެންވެ އެވެ. ނަމަވެސް ޒްބިގްނިއެވް އިތުރު ކުށެއް ކޮށްފިނަމަ ވަގުތުން އޭނާ ޖަލަށް ލުމުގެ އިހުތިޔާރު އޮންނާނެ އެވެ.
ޒްބިގްނިއެވް ދުއްވި ކޮންޓެއިނަރު ބޯޓު ދަތުރު ކުރަމުންދިޔައީ ބެލްޖިއަމްގެ ޕޯޓަކުން މުދާ ބަރުކޮށްގެން ތުރުކީއަށެވެ.
ބޯޓު ކެޕްޓަނެއްގެ ވަޒީފާ އަދާ ކުރަމުން އައި ޒްބިގްނިއެވްގެ ކެޕްޓަން ކެރިޔަރު މި ހުކުމާއެކު މިވަނީ އެއްކޮށް ނިމިފަ އެވެ.
