ދިވެހި ފިލްމީ ދާއިރާގައި މިހާރު އެންމެ ހޫނުކޮށް ދެކެވެމުންދާ އެއް ވާހަކައަކީ މިދިޔަ ސެޕްޓެމްބަރު މަހުގެ 26 ވަނަ ދުވަހު ޕްރިމިއާ ކުރި ސުޕަނެޗުރަލް ބިރުވެރި ފިލްމު "ދެވި" ގެ ވާހަކަ އެވެ. އެކި ފަރާތްތަކުގެ ފާޑުކިޔުންތައް އަމާޒުވަމުންދިޔަ ނަމަވެސް، ފިލްމު ބަލަން ވަންނަ ބެލުންތެރިންގެ އަދަދު ދުވަހެއް ދުވަހަކަށް އަންނަނީ އިތުރުވަމުންނެވެ.
ސޯޝަލް މީޑިއާގެ ފޯރިން ފެށިގެންގޮސް ސިނަމާގެ ސްކްރީނާ ހަމައަށް، "ދެވި" ވަނީ ބެލުންތެރިންގެ މެދުގައި ބޮޑު ޝައުގުވެރިކަމެއް އުފައްދާފަ އެވެ.
އައްޒަގެ ޑަބަލް ރޯލު އަދި ޕްރޮޑިއުސަރެއްގެ ގޮތުގައި ފުރަތަމަ ފިޔަވަޅު
ދިވެހިންގެ މެދުގައި ބޮޑު މަގުބޫލުކަމެއް ހޯދާފައިވާ ކުޅަދާނަ އެކްޓްރެސް މަރްޔަމް އައްޒަ ޕްރޮޑިއުސަރެއްގެ ގޮތުގައި ނުކުންނަ ފުރަތަމަ ފިލްމަށް ވުމާއެކު، މިއީ އޭނާގެ ކާމިޔާބު ކެރިއަރުގެ ފާހަގަކޮށްލެވޭ އުފެއްދުމެކެވެ.
ފިލްމުގައި ދައްކުވައިދެނީ އައްޒަގެ އާއިލާއަށް ދިމާވާ ރޫހާނީ ނުރައްކާތެރި ކަންތައްތަކަކުން ސަލާމަތްވުމަށް ކުރާ ބިރުވެރި މަސައްކަތްތަކެކެވެ. މި ފިލްމުގައި އެންމެ ބޮޑަށް ފާހަގަކުރެވެނީ "މާޝީ" އަދި "މާހީ" ގެ ގޮތުގައި އައްޒަ ދައްކައިދިން މުޅިން ތަފާތު ދެ ސިފައެވެ.
އެކަކު އަނެކަކާ މުޅިން ތަފާތު ދެ ކެރެކްޓަރެއްގެ ގޮތުގައި އައްޒަ ދެއްކި ހުނަރަކީ ބެލުންތެރިންގެ އެންމެ ބޮޑު އެއް ވާހަކަ އެވެ.
ސޭންޑީގެ ފަންނުވެރިކަން
މަޝްހޫރު ފެޝަން ޑިޒައިނަރު ހުސެން ހާޒިމް (ސޭންޑީ) އަދި ޝަހުދު ގުޅިގެން ސްކްރީންޕްލޭ ލިޔެ، ސޭންޑީ ޑައިރެކްޓްކޮށްފައިވާ މި ފިލްމަކީ އުފެއްދުންތެރިކަމުގެ އިންތައް ފަހަނައަޅައިދިޔަ މަސައްކަތެކެވެ. ވީއެފްއެކްސް، ޕްރޮސްތެޓިކް މޭކަޕް، ސައުންޑް ޑިޒައިން އަދި ޕޯސްޓް-ޕްރޮޑަކްޝަންގައި ފަންނީ ބޮޑެތި ގޮންޖެހުންތަކަކާ ކުރިމަތިލައިގެން އުފެއްދި މި ފިލްމުން ސޭންޑީގެ ބިރުވެރި ތަސައްވުރު ވަރަށް ފުރިހަމައަށް ބޮޑު ސްކްރީނަށް ވަނީ ގެނެސްދީފަ އެވެ. އެކި ސަރަހައްދުތަކުގައި ފިލްމުގެ ޓީމުން ކުރި ބުރަ މަސައްކަތް ފިލްމުގެ ކޮންމެ މަންޒަރަކުންވެސް ފެނިގެންދެ އެވެ.
ބެލުންތެރިންގެ ޝުއޫރުތަކުން ފެންނަނީ މުޅިން ތަފާތު މަންޒަރެއް
"ދެވި" އާ ގުޅޭގޮތުން ދިވެހި ފިލްމީ ދާއިރާގައި ބޮޑު ބަހުސެއް އުފެދިފައިވީ ނަމަވެސް، ބެލުންތެރިންގެ ޝުއޫރުތަކުން ފެންނަނީ މުޅިން ތަފާތު މަންޒަރެކެވެ. ފިލްމުގެ ރަސްމީ ޕޭޖުގައި އާންމުކޮށްފައިވާ ހަގީގީ ވީޑިއޯ ޓެސްޓިމޯނިއަލްތަކުން ފެންނަނީ ފިލްމަށް އޮތް ބޮޑު ތަރުހީބެވެ. ޓްރެއިލާއިން ފެނުނު ބިރުވެރިކަމާއި ލޯބީގެ މަންޒަރުތަކުގެ ފުރިހަމަކަން ފިލްމުން ފެނި، ގިނަ ބަޔަކު އަންނަނީ މިއީ ކަމުދިޔަ، ތަފާތު ފިލްމެއްކަމަށް ބުނެ ތައުރީފުކުރަމުންނެވެ.ފިލްމު އެޅިތާ ދުވަސްކޮޅެއް ވެފައިވީނަމަވެސް ޓިކެޓްތައް އަދިވެސް ވަރަށް ބާރުބޮޑެވެ. ހަލުވިކަމާއެކު ޓިކެޓް ވިކެމުންދާއިރު، "ދެވި" އަކީ ދިވެހި ސިނަމާގައި ކޮންމެހެންވެސް ބަލާލަންޖެހޭ ފިލްމެއްކަން މިވަނީ ސާބިތުވެފައެވެ.
