އޭސީސީން ތަހުގީގު ކުރަމުންދަނީ ބިންވެރިޔާ ސްކީމުގެ ދަށުން ގޯތި ދޫކުރުމުގެ މަރުހަލާ ތެރޭގައި ހިނގާފައި ހުރި ކަންކަން ކަމަށް އެ ކޮމިޝަނުން ބުނެފި އެވެ.
ބިންވެރިޔާ ސްކީމާ ގުޅޭ މައްސަލަތަކެއް ބަލަމުންދާ ކަމަށް އޭސީސީން އެންމެ ފުރަތަމަ ބުނީ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީން މިދިޔަ ބުދަ ދުވަހު ބޭއްވި ބައްދަލުވުމެއްގަ އެވެ.
މެންބަރުންގެ ސުވާލުތަކަށް ޖަވާބު ދެއްވަމުން އޭސީސީގެ ރައީސް އާދަމް ޝާމިލް ވިދާޅުވީ ބިންވެރިޔާ ސްކީމާ ގުޅޭ ގޮތުން ހުށަހެޅި މައްސަލަތަކެއް ބަލަމުންދާ ކަމަށާއި ތަހުގީގަށް ފާހަގަވި ކަންތައްތައް ކޮމެޓީން އެދޭނަމަ ހިއްސާ ކުރާނެ ކަމަށެވެ. ނަމަވެސް އެދުވަހު އެކަމާ ގުޅޭ ތަފުސީލީ ލިޔުންތައް ނެތުމުން ތަހުގީގަށް ފާހަގަވި ކަންކަން ހާމަކޮށްފައެއް ނުވެ އެވެ.
އެކަމާ ގުޅޭގޮތުން "އަދަދު" އިން ކުރި ސުވާލެއްގެ ޖަވާބުގައި އޭސީސީގެ މީޑިއާ އޮފިޝަލް، ހަސަން މަނިކު ވިދާޅުވީ އެ ކޮމިޝަނުން ތަހުގީގު ކުރަމުންދަނީ ގޯތި ދިނުމުގެ މަރުހަލާގެ ތެރޭގައި ހިނގާފައި ހުރި މައްސަލަތަކެއް ކަމަށާއި އެ މަރުހަލާގައި އޭރުގެ މިނިސްޓަރީން އަމަލު ކޮށްފައި ހުރި ގޮތް ކަމަށެވެ.
"އަޅުގަނޑުމެން ބަލަމުން ދަނީ ގޯތި ދިނުމުގެ ޕްރޮސެސްގެ ތެރޭގައި ހިނގާފައި ހުރި ކަންތައްތަކެއް، މިވަގުތަށް ކުރިއަށްދާ މައްސަލައެއް ވީމާ އިތުރު ތަފުސީލެއް ހާމަ ކުރެވޭކަށް ނެތް،" ހަސަން މަނިކު ވިދާޅުވި އެވެ.
ބިންވެރިޔާ ސްކީމުގެ ދަށުން ދޫކުރި ގޯތީގެ މައްސަލަތަކެއް އޭސީސީން ތަހުގީގު ކުރަމުންދާއިރު، ބިންވެރިޔާ ސްކީމުގެ ދަށުން ކުރީ ސަރުކާރުން ދިން ގޯތި ރެޖިސްޓަރީތަކުގެ ސައްހަކަމާމެދު މިހާރުގެ ހައުސިން މިނިސްޓަރު، އަލީ ހައިދަރު ވަނީ ސުވާލު އުފައްދަވައިފަ އެވެ.
މިނިސްޓަރީއާ ހަވާލުވެވަޑައިގަތުމަށްފަހު އެންމެ ފުރަތަމަ ނޫސްވެރިންނާ ކުރެއްވި ބައްދަލުވުމުގައި ހައިދަރު ވިދާޅުވީ ނުހިއްކާ އޮތް ބިމަކުން ގޯތި ނުދެވޭނެ ކަމަށާއި އެކަމުގައި ގާނޫނީ މައްސަލައެއް އުޅޭ ކަމަށެވެ.
"އޭގައި އެބަ އުޅޭ ވަރަށް ބޮޑު ގާނޫނީ މައްސަލައެއް. ރެޖިސްޓްރީއެއް ދުލެއް ނުކުރެވޭނެ އިން ކަނޑަނޭޅޭ ތަނަކުން. މޫދަކުން ދޭ ބިމަކަށް ރެޖިސްޓްރީ ކަނޑަނޭޅޭނެ. އެއީ ގަވާއިދު އޮތް ގޮތް," މިދިޔަ ނޮވެމްބަރު 20 ގައި އޮތް ނޫސްވެރިންގެ ބައްދަލުވުމުގައި ހައިދަރު ވިދާޅުވި އެވެ.
ހައިދަރު އެހެން ވިދާޅުވި ނަމަވެސް ކުރީ ސަރުކާރުން ގޯތިތަކުގެ ރެޖިސްޓަރީ ދޫކޮށްފައި ވަނީ "ބަންޑާރަ ގޯއްޗާއި އަމިއްލަ ގޯއްޗާއި އެފަދަ ގޯތީގައި ހަދާ އިމާރާތް ރެޖިސްޓަރީ ކުރުމާބެހޭ ގަވާއިދު" އަށް އިސްލާހެއް ގެނެސްގެންނެވެ. މިދިޔަ އަހަރުގެ އޯގަސްޓު 26 ގައި ގެނައި އެ އިސްލާހުގައި ބުނެފައި ވަނީ ގޯތި ދޫކުރާއިރު، ނުހިއްކައި ނުވަތަ އިން ނުކަނޑާ އޮތް ތަނަކުން ވެސް ގޯތި ދޫކުރެވިދާނެ ކަމަށެވެ.
"އެކަމަކު ގަވާއިދު ބަދަލުކޮށްގެން ލިޔުމެއް ދޫކުރެވޭ ގޮތަށް އޮތީ ހަދާފައި, އެއީ ރެޖިސްޓްރީއަކަށް ނުވާނެ. އެއީ އެކަމާ ބެހޭ ގޮތުން އޮތް ގޮތަކީ, އެހެންވީމާ އޭގެ ވެލިޑިޓީއާ ބެހޭ ގޮތުން ޖެހޭނީ ގާނޫނީ ލަފައެއް ހޯދަން. އެއީ ކިހާވަރެއްގެ ބުރަދަނެއް އޮތް ލިޔުމެއްތޯ," އޭނާ ވިދާޅުވި އެވެ.
ބިންވެރިޔާ ސްކީމުގެ ދަށުން ގޯއްޗަށް އެދި ހުށަހެޅި 97 ޕަސެންޓު މީހުންނަށް ގޯތި ދިނުމަށް ރައީސް އިބްރާހިމް މުހައްމަދު ސޯލިހުގެ ސަރުކާރުން ނިންމި އެވެ. އެއީ 18،955 މީހުންނަށް 9003 ގޯއްޗެވެ.
ބިންވެރިޔާ ސްކީމުގެ ދަށުން ފުރަތަމަ ބުރުގައި ދޫކުރާ 9003 ގޯތީގެ ތެރޭގައި ހިމެނެނީ, ހުޅުމާލެއިން ދޫކުރާ 1351 ގޯއްޗާއި, ގުޅީފަޅުން ދޫކުރާ 2,219 ގޯތީގެ އިތުރުން ގިރާވަރުފަޅުން ދޫކުރާ 5,433 ގޯއްޗެވެ. އެކަމަށް ހުޅުމާލެއިން 26 ހެކްޓަރު, ގުޅީފަޅުން 42 ހެކްޓަރު އަދި ގިރާވަރުފަޅުން 73 ހެކްޓަރުގެ ބިން ބޭނުންވެ އެވެ.
