ކުޑަ ކުއްޖެއްގެ މަރުގެ މައްސަލައެއްގައި އިޖުރާއަތުތައް ނަހަމަކޮށް ބޭނުންކުރާތީ ދައުލަތުގެ ވަކީލުންނަށް ސިވިލް ކޯޓުން ނަސޭހަތް ދީފި އެވެ.
ސިވިލް ކޯޓުން ނަސޭހަތް ދީފައި ވަނީ ފުވައްމުލަކު ހޮސްޕިޓަލުގެ އިހުމާލުން އުމުރުން ހަ އަހަރުގެ ކުއްޖަކު މަރުވި ކަމަށް ބުނެ ހެލްތު މިނިސްޓްރީގެ މައްޗަށް ފުވައްމުލަކު މީހަކު ކޮށްފައިވާ ދައުވާގައި ދައުލަތުގެ ވަކީލުން އިޖުރާއަތްތައް ނަހަމަ ގޮތުގައި ބޭނުންކުރާ ކަމަށް ބުނެ އެވެ.
ސިވިލް ކޯޓުން މި މައްސަލައިގައި ކޯޓުގެ އިހުތިސާސްއާ މެދު ނިންމާފައިވާ ގޮތް ހާމަ ކުރަމުން ބުނީ، މި ދައުވާ ކުރިޔަށް ގެންދިޔުމުގެ އިހުތިސާސް އެ ކޯޓަށް ލިބިގެންވާ ކަމަށާއި މަދަނީ އިޖުރާއަތުގެ ގާނޫނުގެ އާންމު މަގްސަދާއި މަދަނީ އިޖުރާއަތުގެ ގާނޫނުގެ އެންމެ އަސާސީ މަގުސަދުތަކަށް އަދި ޝަރީއަތުގެ ހުރިހާ މަރުހަލާއެއްގައި ވެސް އެ މައްސަލައިގެ ހަސްމުން އަމަލުކުރަންވާނީ ހެޔޮ ނިޔަތުގައި ކަމުގައި ބަޔާންކޮށްފައިވާ އެ އުސޫލުތައް ނެގެހެއްޓުމަށް ދައުލަތަށް ނަސޭހަތްތެރިވާ ކަމަށެވެ.
މަދަނީ އިޖުރާއަތުގެ ގާނޫނުގެ 110 ވަނަ މާއްދާގެ ހ. އިން ދައުވާ ލިބޭ ފަރާތަށް ކޯޓުގެ އިހުތިސާސްއާ މެދު އިއުތިރާޒްކޮށް މައްސަލަ ހުށަހެޅުމުގެ ހައްގު ލިބިފައިވީ ނަމަވެސް، އެ ހައްގަކީ އެއްވެސް ހުދޫދެއް ނެތް ގޮތަށް ބޭނުން ކުރުމަށް ދޫކޮށްލެވިފައިވާ ހައްގެން ނޫންކަން އެނގޭ ކަމަށް ވެސް ސިވިލް ކޯޓުން ބުނެ އެވެ.
"ދައުވާ ލިބޭ ފަރާތަށް ލިބިދީފައިވާ ހައްގު ބޭނުން ކުރުމުގައި ދައުވާ ލިބޭ ފަރާތުން ވެސް މަދަނީ އިޖުރާއަތުގެ ގާނޫނުގެ އާންމު މަގްސަދާއި މަދަނީ އިޖުރާއަތުގެ ގާނޫނުގެ އެންމެ އަސާސީ މަގުސަދުތަކަށް އަދި ޝަރީއަތުގެ ހުރިހާ މަރުހަލާއެއްގައި ވެސް އެ މައްސަލައިގެ ހަސްމުން އަމަލު ކުރަންވާނީ ހެޔޮ ނިޔަތުގައި ކަމުގައި ބަޔާންކޮށްފައިވާ އުސޫލުތަކުގެ ތަރަހައިގެ ތެރެއިން އަމަލު ކުރަން ޖެހޭނެ،" ސިވިލް ކޯޓުން ބުނެ އެވެ.
މިގޮތުން ސިވިލް ކޯޓުން ބުނީ، އެއްވެސް އަސާސެއްނެތް ބޭކާރު އިޖުރާއީ ކަންކަން ނަގައި މައްސަލަ ލަސް ކުރުމުގެ ބޭނުމުގައި ކޯޓުގެ އިހުތިސާސާމެދު ސުވާލު އުފެއްދުމަކީ އެއްވެސް ހާލަތެއްގައި މަދަނީ އިޖުރާއަތުގެ ގާނޫނު ތަސަރައްވަރު ކޮށްފައިވާ ގޮތް ނޫން ކަމަށެވެ.
މިއީ މިކަން ކުރެވިގެންވާނެ ގޮތް ނޫންކަން ފާހަގަކޮށް ސިވިލް ކޯޓުން ބުނީ، ހާއްސަކޮށް އާންމު ރައްޔިތަކާ ހިލާފަށް، މަދަނީ އިޖުރާއަތުގެ ގާނޫނު ބުނެވުނު އަސާސްތައް ނެގެހެއްޓުމުގެ ޒިންމާ ދައުލަތުގެ މައްޗަށް ބޮޑުވާނެ ކަމަށެވެ.
