ލަންޑަން (ފެބްރުއަރީ 7) - މެންޗެސްޓާ ޔުނައިޓެޑްގެ ކުރީގެ ވިންގް، ޖެސީ ލިންގާޑް، ދެކުނު ކޮރެއާގެ ސޯލް އެފްސީ އަށް ބަދަލުވާން އެއްބަސްވުމަކަށް އަތުވެފައިވާ ކަމަށް އިނގިރޭސި މީޑިއާ ރިޕޯޓްތައް ބުނެފި އެވެ.
ޔުނައިޓެޑްގައި 10 އަހަރު ހޭދަކުރުމަށް ފަހު، ލިންގާޑް، 31، ދާއިމީ ކޮންޓްރެކްޓެއްގައި އެ ޓީމު ދޫކޮށް ބަދަލުވީ، 2022 ވަނަ އަހަރު، ނޮޓިންހަމް ފޮރެސްޓް އަށެވެ.
ނޮޓިންހަމް ފޮރެސްޓްގައި ތިން ވަނަ އަށް އެންމެ މުސާރަ ބޮޑު ކުޅުންތެރިއާގެ ގޮތުގައި، އެއް އަހަރުގެ ކޮންޓްރެކްޓެއްގައި ސޮއިކުރި ލިންގާޑްގެ އެއްބަސްވުން ހަމަވުމުން އޭނާ ދޫކޮށްލަން އެ ކްލަބުން ނިންމި އެވެ.
ލޯން އެއްބަސްވުމެއްގެ ދަށުން ލެސްޓާ ސިޓީ، ބާމިންހަމް ސިޓީ، ބްރައިޓަން އަދި ވެސްޓް ހޭމް ޔުނައިޓެޑަށް ކުޅުނު ލިންގާޑް، ހޯދަން މި ސީޒަން ފެއްޓުމުގެ ކުރިން ސައުދީ ޕްރޯ ލީގުގެ ކްލަބްތަކުން ވެސް ވާހަކަ ދެއްކި އެވެ. އެކަމަކު މަޝްވަރާތައް ކުރިއަށް ނުދިޔަ އެވެ. އޭގެ ފަހުން، ލިންގާޑް ވަނީ އޭނާގެ އޭޖެންޓް މެދުވެރިކޮށް ބާސެލޯނާ އަށް ބަދަލުވާން އަމިއްލަ އަށް ޝައުގުވެރިކަން ފާޅުކޮށްފަ އެވެ. އެކަމަކު، އެ ޑީލް ވެސް ކުރިއަށް ނުދިޔަ އެވެ.
ޔޫރަޕްގެ ރަނގަޅު ލީގެއްގެ ކްލަބެއްގެ އޮފާ ލިންގާޑަށް ނުލިބުމާ އެކު، އޭނާ މިހާރު ނިންމާފައިވަނީ ހަ ފަހަރު ކޮރެއާ ލީގު ތަށި ނަގާފައިވާ ސޯލް ޓީމަށް ބަދަލުވާށެވެ. އެ ޓީމާ ގުޅެން މެޑިކަލް ޓެސްޓް ފުރިހަމަ ކޮށްފައިވާއިރު، ސޮއިކުރާނެ ކަމަށް ރިޕޯޓްތައް ބުނަނީ އެއް އަހަރުގެ ކޮންޓްރެކްޓެއްގަ އެވެ.
