މެންޗެސްޓާ (ފެބްރުއަރީ 6) - މެންޗެސްޓާ ޔުނައިޓެޑަށް ކުޅެމުން އަންނަ އާޖެންޓީނާގެ ޑިފެންޑަރު، ލިސަންދްރޯ މާޓީނޭޒްގެ ކަކުލަށް ލިބިފައިވާ އަނިޔާއާ ހެދި ދެ މަހެއްހާ ދުވަހަށް ކުޅުމާ ދުރަށް ދާން ޖެހިއްޖެ އެވެ.
ޔުނައިޓެޑުން އެންމެ ފަހުން ކުޅުނު މެޗުގައި ވެސްޓް ހޭމްއާ ދެކޮޅަށް މާޓިނޭޒް، 26، ގެ ކަކުލަށް ލިބުނު އަނިޔާއަކާ ހެދި ފަރުވާ އަށް ފަހު ދަނޑުން ބޭލި އެެވެ.
އަނިޔާގެ ތަފްސީލް ދެނެގަންނަން ހެދި ޓެސްޓްތަކުން އެނގުނީ، އަށް ހަފްތާ އަށް ކުޅުމާ ދުރަށް ދާން ޖެހޭނެ ކަމަށެވެ. އެކަމަކު، އޮޕަރޭޝަނެއް ކުރަން ނުޖެހޭނެ އެވެ.
ތިން މަހެއްހާ ދުވަހު އަނިޔާގައި ހޭދަކުރުމަށް ފަހު، މާޓީނޭޒް ކުޅުމަށް އެނބުރި އައީ މިދިޔަ މަހުގެ 14 ވަނަ ދުވަހު އެވެ. އެކަމަކު، ލީގުގައި ތިން ވަަނަ މެޗު ކުޅެމުން ދަނިކޮށް މި ވަނީ އަނެއްކާ ވެސް ސީރިއަސް އަނިޔާއެއް ކުރިމަތިވެފަ އެވެ.
މިދިޔަ ސީޒަނުގެ ފަހު ކޮޅުގައި، ފައިތިލަ އަށް ލިބުނު އަނިޔާއަކާ ހެދި، މެޗުތަކެއް ގެއްލުނު މާޓީނޭޒްގެ އެ އަނިޔާގެ ކަންކަން މި ސީޒަން ފެށުނުތަނާ ތަކުރާރުވި އެވެ. މި ސީޒަނުގައި ލިބުނު ފުރަތަމަ އަނިޔާއާ ހެދި މާޓީނޭޒަށް 22 މެޗު ގެއްލުނެވެ.
މި ފަހަރު ލިބުނު އަނިޔާއިން ރަނގަޅުވެގެން، މާޓީނޭޒަށް ކުޅުމަށް އެނބުރި އާދެވޭނީ އަންނަ އޭޕްރީލް މަހު އެވެ.
