ލަންޑަން (ފެބްރުއަރީ 6) - އިނގިރޭސި ޕްރިމިއާ ލީގުގެ އެންމެ ފަހުގެ ޗެމްޕިއަން، މެންޗެސްޓާ ސިޓީން އެ ޓީމުގެ ތަރި، ފިލް ފޯޑެންގެ ހެޓްރިކުން 3-1 އިން ބްރެންޓްފޯޑް ބަލިކޮށް، ލީގުގެ ދެ ވަނަ އަށް ޖެހިލައިފި އެވެ.
ރޭގެ މޮޅާ އެކު ސިޓީ ލީގުގެ ދެ ވަނަ އަށް އެރީ ކުރިން އެ މަގާމުގައި އޮތް އާސެނަލާ އެއްވަރަށް ޕޮއިންޓް ހޯދައި، ލަނޑުގެ ތަފާތުންނެވެ. އެއް ވަނައިގައި އޮތް ލިވަޕޫލަށް 23 މެޗުން 51 ޕޮއިންޓް ލިބިފައިވާއިރު، ދެ ވަނައިގައި އޮތް ސިޓީ އާއި ތިން ވަނައިގައި އޮތް އާސެނަލަށް ވަނީ 49 ޕޮއިންޓް ލިބިފަ އެވެ. ސިޓީން 22 މެޗު ކުޅުނުއިރު، އާސެނަލުން ވަނީ 23 މެޗު ކުޅެފަ އެވެ. މެޗު ހަމަކުރާއިރު، ސިޓީ އަށް އެއް ވަނަ އަށް އެރުމުގެ ފުރުސަތު އެބައޮތެވެ.
ބްރެންޓްފޯޑުން ވަނީ 21 ވަނަ މިނިޓްގައި ލީޑުނަގައިފަ އެވެ. އެ ޓީމުގެ ކީޕަރު މާކް ފްލެކެން ތަނަވަސްކޮށްދިން ފުރުސަތެއްގައި މި ލަނޑު ޖެހީ ނީލް މޯޕޭ އެވެ.
ސިޓީގެ އެޓޭކްތައް ހުއްޓުވަން ފްލެެކެން ގިނަ ހަމަލާތަކެއް ހުއްޓުވި މި މެޗުގައި، ސިޓީން އެއްވަރުކުރީ ފުރަތަމަ ހާފުގެ އިތުރު ވަގުުތުގެ ތިން ވަނަ މިނިޓްގައި ފޯޑެން ޖެހި ގޯލުންނެވެ. ދެ ވަނަ ހާފްގެ ކުޅުން ފެށިގެން، އަށް މިނިޓް ތެރޭ ސިޓީން ލީޑުނެގި އެެވެ. ފޯޑެން މި ލަނޑު ޖެހީ ކެވިން ޑި ބްރޭނާ ދިން ބޯޅައަކުންނެވެ.
މެޗު ނިމެން 20 މިނިޓަށް ވެފައި ވަނިކޮށް، އާލިން ބްރައުޓް ހާލަންޑް ދިން ބޯޅައަކުން، ފޯޑެން ވަނީ ތިން ވަަނަ ލަނޑު ޖަހައި، އޭނާގެ ހެޓްރިކް ފުރިހަމަކޮށްފަ އެވެ. މިއީ ސީނިއާ ކެރިއަރުގައި ފޯޑެންގެ ދެ ވަނަ ހެޓްރިކް އެވެ.
ސިޓީގެ ކޯޗު ޕެޕް ގާޑިއޯލާ ބުނީ، މިއީ ފޯޑެންގެ ކެރިއަރުގައި މިހާތަނަށް އޭނާ އެންމެ އާދަޔާހިިލާފު ފޯމެއްގައި ކުޅެމުން އަންނަ ސީޒަން ކަމަށެވެ. އަދި ޓީމަށް ފޯޑެންގެ މުހިންމުކަން މެޗަކަށް ފަހު މެޗެއް ބޮޑުވަމުން އަންނަ ކަމަށް ވެސް ގާޑިއޯލާ ބުނެފައިވެ އެވެ.
