ނެމީބިއާގެ ރައީސް ހޭޖް ޖީންގޮބް ކެންސަރަށް ފަރުވާ ހޯއްދަވަމުން ދަނިކޮށް އަވަހާރަވެއްޖެ އެވެ.
އުމުރުން 82 އަހަރުގެ ޖީންގޮބް އަވަހާރަވީ ގެމީބިއާގެ ވެރިރަށް ވިންދޮއެކްގެ ލޭޑި ޕޮހަމްބާ ހޮސްޕިޓަލުގައި ފަރުވާ ހޯއްދަވަމުން ދަނިކޮށް މިއަދުގެ ވަގުތެއްގަ އެވެ.
އެމަނިކުފާނު އަވަހާރަވީ ކެންސަރަށް ފަރުވާ ހޯއްދަވަމުންދާ ކަން އެ ގައުމުގެ ސަރުކާރުން ހާމަކުރިތާ ތިން ހަފްތާ ނުވަނީސް އެވެ.
ނެމީބިއާގެ ވަގުތީ ރައީސްގެ މަގާމާ ހަވާލުވެވަޑައިގެންފައިވާ އެ ގައުމުގެ ނައިބް ރައީސް ނެންގޯލޯ އެމްބުމާ ވިދާޅުވީ، އެ ގައުމަށް ގެއްލިގެން ދިޔައީ އަގުހުރި ހިދުމަތް ކޮށްދީފައިވާ ދަރިއެއް ކަމަށާއި، މި ދަނޑިވަޅުގައި ގައުމުގެ ރައްޔިތުން ހަމަޖެހިގެން ތިބުމަށް އެދޭ ކަމަށެވެ.
ނެމީބިއާގެ ތިންވަނަ ރައީސް ޖީންގޮބް ވެރިކަމާ ހަވާލުވެ ވަޑައިގެންފައި ވަނީ 2015 ވަނަ އަހަރެވެ. އަދި އެމަނިކުފާނު ފުރުއްވަމުން ގެންދެވީ އެ ގައުމުގެ ރައީސްކަމުގެ ދެވަނަ ދައުރެވެ.
އޭގެއިތުރުން އެމަނިކުފާނަކީ ނެމީބިއާގެ ފުރަތަމަ ޕްރައިމް މިނިސްޓަރެވެ. މިގޮތުން އެމަނިކުފާނު ވަނީ އެ ގައުމުގެ ޕްރައިމް މިނިސްޓަރުގެ މަގާމު 1990 އިން ފެށިގެން 2002 ވަނަ އަހަރުގެ ނިޔަލަށް އަދި 2012 އިން 2015 ވަނަ އަހަރުގެ ނިޔަލަށް ފުރުއްވާފަ އެވެ.
ކުރިން ޖަރުމަނުގެ ކޮލޮނީއެއް ކަމަށްވާ ނެމީބިއާ 1990 ގައި މިނިވަންކަން ހޯދާފައިވާއިރު، އެ ގައުމަށް ރައީސަކު ހޮވުމަށް ބާއްވާ އިންތިހާބު އޮންނާނީ އަންނަ ނޮވެމްބަރު މަހު އެވެ.
