އުރީދޫ މޯލްޑިވްސްގެ މި އަހަރުގެ ކަލަންޑަރާއެކު ތައްޔާރުކުރި ގޭމް، "އަތޮޅު ދުވުން" ކުޅެގެން ސެމްސަންގް ގެލެކްސީ އެންމެ ފަހުގެ އެސް 24 އަލްޓްރާ ފޯނެއް ލިބޭ ޕްރޮމޯޝަނެއް ފަށައިފި އެވެ.
އުރީދޫ ކަލަންޑަރާއެކު ތައްޔާރުކުރި "އަތޮޅު ދުވުން" ގޭމަކީ ރާއްޖޭގެ އުތުރުން ދެކުނަށް ދުވާ ގޭމެކެވެ. މި ގޭމަކީ، ހުރިހާ އުމުރުފުރާއަކަށް ބައިވެރިވެވޭ ގޮތަށް ރާއްޖޭގައި ތައްޔާރުކުރެވިފައިވާ ފުރަތަމަ "އެންޑްލަސް ރަނާ ޖޯންރާ"ގެ ގޭމެވެ.
އުރީދޫއިން މިހާރު ވަނީ އަތޮޅުދުވުން ގޭމުގެ ފެބުރުއަރީ އަޕްޑޭޓާއެކު ލީޑާބޯޑު ތައާރަފުކޮށްފަ އެވެ. މިހާރު އަތޮޅު ދުވުން ކުޅޭ ފަރާތްތަކުގެ މެދުގައި ލީޑާބޯޑު މެދުވެރިކޮށް އެންމެ މަތީ ޕޮއިންޓް ލިބޭ 10 ފަރާތް ފެންނަން ހުންނާނެ އެވެ.
އުރީދޫ އިން މިއަދު ވަނީ އަތޮޅު ދުވުމުގެ ޕާޓްނަރަކަށް ސެމްސަންގް އައިކަން އިއުލާނުކޮށްފަ އެވެ. އަދި މި އެއްބަސްވުމުގެ ދަށުން އަތޮޅު ދުވުމުގައި ފެބްރުއަރީ މަސް ނިމޭއިރު ލީޑާބޯޑުގެ އެއްވަނައަށް ދާ ފަރާތަކަށް ސެމްސަންގް ގެލެކްސީ އެސް 24 އަލްޓްރާ ފޯނެއް ލިބިގެންދާނެ އެވެ.
މިގޭމުގައި 12 ލެވެލް ހިމެނޭއިރު، ކޮންމެ މަހަކު އާލެވެލެއްގައި އާ ރަށަކަށް ދަތުރުކުރެވޭނެ އެވެ. އުރީދޫގެ 2024ގެ ކަލަންޑަރުގައި ސިއްރު އާޓްވޯކް ހިމެނިފައިވާއިރު، މި އާޓްވޯކް ގޭމްގެ ތެރެއިން ހޯދައިގެން ބޯނަސް ލެވެލްއެއް ކުޅުމުގެ ފުރުސަތު ލިބިގެންދާނެއެވެ. ފެބުރުއަރީ މަހު އަތޮޅު ދުވުން ގޭމުން ފެނިގެން ދާނީ ހދ. ކުޅުދުއްފުށިންނެވެ.
