ސޫދާނުގައި ބަނޑުހައި ހޫނުކަމުގައި އެތައް ބަޔަކު މަރުވަމުންދާ ކަމަށް ރިޕޯޓްތައް ލިބެމުންދާ ކަމަށް ޔުނައިޓެޑް ނޭޝަންސްގެ ފުޑް އެޖެންސީން ބުނެފި އެވެ.
އެ އެޖެންސީން ބުނީ، ސޫދާނުގައި މިހާރު ކުރިޔަށްދާ ހަނގުރާމަތަކާ ގުޅިގެން އެ ގައުމަށް ދެމުން އަންނަ އެހީތައް މަދުކުރި ފަހުން ބަނޑުހައި ހޫނުކަމުގައި މަރުވަމުންދާ މީހުންގެ އަދަދު މިދިޔަ އަހަރަށްވުރެ ދެގުނަ އިތުރުވެފައިވާ ކަމަށެވެ.
ވޯލްޑް ފުޑް ޕްރޮގްރާމްގެ ސޫދާން ރިޕްރެޒެޓޭޓިވް އެޑީ ރޯވް ވިދާޅުވީ، ސޫދާނުގައި އިންސާނީ އެހީތެރިކަން ފޯރުކޮށްދިނުމަށް ދިމާވާ ހުރަސްތަކާ ގުޅިގެން އެހީތެރިކަން އެންމެ ބޮޑަށް ބޭނުންވާ ގިނަ މީހުންނަށް ވެސް އެހީތެރިކަން ފޯރުކޮށް ނުދެވޭ ކަމަށެވެ.
ސޫދާނުގެ ގިނަ މީހުން ދުވާލަކު އެއްފަހަރުވެސް ނުކާކަން ފާހަގަކުރައްވާ ވޯލްޑް ފުޑް ޕްރޮގްރާމް ސޫދާންގެ ކޮމިއުނިކޭޝަންސް ހެޑް ލެންޒީ ކިންޒްލީ ވިދާޅުވީ، ބައެއް މީހުން އަންނަނީ އަތުގައި ހުރި ހަރުމުދާތައް ކާއެއްޗެހި ގަތުމަށް ވިއްކަމުން ކަމަށެވެ.
ވޯލްޑް ފުޑް ސެކިއުރިޓީން އަންދާޒާ ކުރާ ގޮތުގައި ސޫދާނުގައި ބަނޑުހައި ހޫނުކަމުގައި އުޅޭ ކޮންމެ 10 މީހެއްގެ ތެރެއިން އެހީ ފޯރުކޮށްދެވެނީ އެންމެ މީހަކަށް ކަމަށް އަންދާޒާ ކުރެވޭ ކަމަށެވެ. އަދި ސިފައިން ކޮންޓްރޯލްކުރާ ސަރަހައްދުތަކަށް އެހީ ފޯރުކޮށްދިނުމަށް އުނދަގޫތައް އަންނަނީ ދިމާވަމުންނެވެ.
މިދިޔަ އަހަރުގެ އެޕްރީލް މަހުން ފެށިގެން ސޫދާނުގައި ކުރިޔަށްދާ ހަނގުރާމައިގައި މިހާތަނަށް 8 މިލިއަނެއްހާ މީހުން އަމިއްލަ ގެތައް ދޫކޮށްލަން ޖެހިފައިވާއިރު، ހަނގުރާމަ ހުއްޓާލަން ކުރަމުންދާ މަސައްކަތް މިހާތަނަށް ކާމިޔާބުވެފައެއް ނުވެއެވެ.
