ބާސެލޯނާ (ފެބްރުއަރީ 1) - ސްޕެނިޝް ލީގުގައި ބެންޗުން އަރައި ވިޓޯ ރޮކޭ ޖެހި ގޯލުން ބާސެލޯނާ އިން 1-0 އިން އޮސަސޫނާ ބަލިކޮށްފި އެވެ.
މިއީ މި ސީޒަނަށް ފަހު ބާސެލޯނާގެ ކޯޗުކަން ދޫކޮށްލާނެ ކަމަށް ޒަވީ ހެނާންޑޭޒް ހާމަކުރި ފަހުން އެ ޓީމު ކުޅުނު ފުރަތަމަ މެޗެވެ.
މި މެޗުގައި ބާސެލޯނާ މޮޅުކޮށްދިން ގޯލު ޖެހީ ރޮކޭ، 18، އަކީ ބްރެޒިލްގެ އެތުލެޓިކޯ ޕަރަނައެންސޭ ދޫކޮށް މި މަހުގެ ކުރީކޮޅުގައި ބާސެލޯނާ އަށް ބަދަލުވި ކުޅުންތެރިއެކެވެ. ކުޅެން އެރިތާ މިނިޓެއްގެ ތެރޭގައި، މެޗުގެ 63 ވަނަ މިނިޓްގައި ރޮކޭ މި ލަނޑު ޖެހީ ހަވިއޭ ކަންސޭލޯ ނެގި ހުރަހަކުން ބޮލުންނެވެ. މިއީ ރޮކޭ ބާސެލޯނާ އަށް ޖަހައިދިން ފުރަތަމަ ގޯލެވެ.
ބާސެލޯނާ އަށް ފުރަަތަމަ ހާފުގައި ލީޑުނަގައިދޭން ޖޫލްސް ކޫންޑޭ އަށް ރަނގަޅު ފުރުސަތުތަކެއް ލިބި ބޭނުމެއް ނުކުރެވުނެވެ.
ރޮކޭ އަށް ކުރި ފައުލަކަށް މެޗުގެ 67 ވަނަ މިނިޓްގައި އޮސަސޫނާގެ އުނާއީ ގާސިއާ އަށް ވަނީ ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ. އޮސަސޫނާ އިން ނަތީޖާ ހަމަހަމަކުރަން ކުރި މަސައްކަތުގައި ކުރި އެޓޭކްތައް ހުއްޓުވުމުގައި ބާސެލޯނާގެ ކީޕަރު އިނާކީ ޕެންޔާ ވަނީ މޮޅު ކުޅުމެއް ދައްކައިފަ އެވެ.
ލީިގުގައި ރޭ އެތުލެޓިކޯ މެޑްރިޑް ކުޅުނު މެޗުން ވަނީ 2-1 އިން ރަޔޯ ވަޔެކާނޯ ބަލިކޮށްފަ އެެވެ. އެތުލެޓިކޯ އިން ރެއިނިލްޑޯ މަންޑާވާގެ ގޯލުން ލީޑުނަގާފައިވަނިކޮށް ރަޔޯ އަށް އެއްވަރުކޮށްދިނީ އަލްވާރޯ ގާސިއާ ރިވޭރާ އެވެ. މެޗުގެ 90 ވަނަ މިނިޓްގައި އެތުލެޓިކޯ މޮޅުކޮށްދިނީ މެޕްފިސް ޑިޕާއި އެވެ.
ލީގުގެ އެއް ވަނައިގައި 22 މެޗުން 55 ޕޮއިންޓާ އެކު އޮތީ ޖިރޯނާ އެވެ. ދެ ވަނައިގައި 21 މެޗުން 54 ޕޮއިންޓާ އެކު ރެއާލް މެޑްރިޑް އޮތްއިރު، ތިން ވަަނައިގައި އޮތް އެތުލެޓިކޯ އާއި ހަތަރެއްގައި އޮތް ބާސެލޯނާ އަށް 22 މެޗުން ވަނީ 47 ޕޮއިންޓް ލިބިފަ އެވެ.
