މެންޗެސްޓާ (ޖެނުއަރީ 31) - މެންޗެސްޓާ ސިޓީގެ ކެޕްޓަން، ކައިލް ވޯކާގެ ޒާތީ ދިރިއުޅުމުގައި ހިނގަމުން އަންނަ ކަމަކާ ހެދި އޭނާ އަށް ގިނަ ފާޑުކިޔުންތަކެއް އަމާޒުވި ނަމަވެސް، އޭނާ އަތުން ސިޓީގެ ކެޕްޓަން ބޭންޑް ނުނަގަން އެ ޓީމުގެ ކޯޗު، ޕެޕް ގާޑިއޯލާ ނިންމައިފި އެވެ.
ވޯކާގެ އަނބިމީހާ، އެނީ ކިލްނާ، ހަތަރު ވަނަ ދަރިއަކަށް ބަލިވެއިންއިރު، މި ހަފްތާގައި މީޑިއާގައި އާންމުވި ވާހަކަ އަކީ، އިނގިރޭސި މޮޑެލް، ލައުރީން ގުޑްމަންއާ އެކު ވޯކާގެ ދެ ދަރިން ތިބި ކަމެވެ. އަދި ކައިވެނިން ބޭރުން ވޯކާ އާއި ލައުރީން ގުޅުން ބާއްވަމުން އޮންނަތާ އެތައް އަހަރެއް ވެފައިވާ ކަމެވެ.
މި މައްސަލައިގައި ވޯކާ މިހާރު ދިރިއުޅެނީ އަނބިމީހާ، ކިލްނާއާ ވަކިން ކަމަށް ވެސް މީޑިއާތަކުން ވަނީ ރިޕޯޓްކޮށްފަ އެވެ.
އިނގިރޭސި ގައުމީ ޓީމުގެ ވެސް މުހިންމު ކުޅުންތެރިޔާ، ވޯކާ، އަކީ ކްލަބް ކެޕްޓަނެއް ފަދަ ރޯލް މޮޑެލް އެއް ކަމަށް ގިނަ ބަޔަކު ދެކޭނެ މަގާމެއްގައި ހުރި ކުޅުންތެރިއެކެވެ. އޭނާގެ ފަރާތުން މި ފަދަ ކަންކަމެއް ފެނުމަކީ، ސިޓީގެ ކެޕްޓަނެއްގެ ގޮތުގައި އޭނާ ބެހެއްޓުން ރަނގަޅު ވަގުތެއް ނޫން ކަމަށް ބުނެ، އެ ކްލަބްގެ ސަޕޯޓަރުން އަންނަނީ ޝުއޫރު ފާޅުކުރަމުންނެވެ.
މި ކަމާ ގުޅޭގޮތުން، ނޫސްވެރިން ގާޑިއޯލާއާ ސުވާލުކުރުމުން، އޭނާ ބުނީ ވޯކާ ކެޕްޓަނަކަށް ހަމަޖެއްސުމަކީ މުޅި ކްލަބްގެ ނިންމުމެއް ކަމަށެވެ.
"އޭނަ (ވޯކާ) ކެޕްޓަނަކަށް ނެގީ މުޅި ޓީމުން. އެހެންވީމަ އެ ނިންމުން ބަދަލުކުރުމުގެ އިހުތިޔާރު އޮތީ ވެސް ޓީމަށް،" ގާޑިއޯލާ ބުންޏެވެ.
"އަހަރެން އޭނަ އަށް ވެސް އޭނަގެ އާއިލާ އަށް ވެސް އިހުތިރާމް ކުރަން، އެ މީހުންގެ ޒާތީ ދިރިއުޅުމާ ބެހޭގޮތުން އަހަރެން އެންމެ ބަހެއް ވެސް ނުބުނާނަން،"
ސިޓީގެ ކެޕްޓަނުން ކަނޑައަޅަނީ ކްލަބްގެ ހުރިހާ ކުޅުންތެރިންގެ ވޯޓަކުންނެވެ. މިދިޔަ އޮގަސްޓް މަހު ނެގި ވޯޓުން، ވޯކާ އަށް ކުރި ލިބުނީ، ކެވިން ޑި ބްރޭނާ، ރޮޑްރީ، ރުބެން ޑިއާސް އަދި ބެނާޑޯ ސިލްވާއާ ވާދަކޮށެވެ.
ވޯކާގެ މި މައްސަލައިގައި ގިނަ އިނގިރޭސިން އަންނަނީ އެކި ޕްލެޓްފޯމްތަކުގައި ޝުއޫރު ފާޅުކުރަމުންނެވެ. މީގެ ކުރިން މި ފަދަ ކަންކަމުގައި އިނގިރޭސި ކްލަބްތަކުން ވަނީ ކުޅުންތެރިންނަށް ފިޔަވަޅު އަޅައިފަ އެވެ.
