ރައްޔިތުންގެ މަޖިލީހުން ރުހުން ނުދިން ތިން ވަޒީރުން އަލުން ވަޒީރުންގެ މަޖިލީހަށް އިއްޔެ އައްޔަންކުރި އެވެ.
އަލުން އައްޔަނު ކުރީ ރުހުން ނެތް ކަމަށް މަޖިލީހުން އިއްޔެ ފާސް ކުރި ބަންޑާރަނައިބު އަހުމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރެވެ.
ވަޒީރުންގެ މަޖިލީހަށް ބަންޑާރަ ނައިބު އުޝާމް އައްޔަނު ކުރުމަށް ފަހު ޖުޑީޝަލް ސާވިސް ކޮމިޝަނަށް ވެސް އޭނާ ވަނީ އަލުން އައްޔަނުކޮށްފަ އެވެ.
ގާނޫނުއަސާސީގެ 129 ވަނަ މާއްދާގެ ނ. ގައި ބުނެފައި ވަނީ "ރައީސުލްޖުމްހޫރިއްޔާގެ ނައިބު ފިޔަވައި، ވަޒީރުންގެ މަޖިލީހަށް އައްޔަންކުރާ އެހެން މެންބަރުން އެ މަޖިލީހަށް އައްޔަންކުރުމަށްފަހު ރައްޔިތުންގެ މަޖިލީހުގެ ރުހުން ހޯދާންވާނެ" ކަމަށެވެ.
ވަޒީރުންނަށް ރުހުން ދިނުން މަޖިލީހުން ފަސްކުރުމަށް ފަހު، ދައުރުން ބޭރުން ޖަލްސާއެއް ބާއްވަން ތާވަލުކުރި ޖަލްސާ އާދީއްތަ ދުވަހު ކުރިއަށް ގެންދަން މަސައްކަތް ކުރި ނަމަވެސް، ސަރުކާރުގެ މެމްބަރުން އެކަމަށް ހުރަސް އަޅައި، މަޖިލީހުގެ ނިޒާމު ގެއްލުވާލައި، ސަރުކާރުގެ މެމްބަރުންނާއި އިދިކޮޅު އެމްޑީޕީގެ މެމްބަރުންގެ މެދުގައި މާރާމާރީ ހިންގުމާ ގުޅިގެން އެ ދުވަހު ޖަލްސާ ނުބޭއްވުނެވެ.
މިކަމެއް ހިނގީ މަޖިލީހުގެ މެޖޯރިޓީ ކޮންޓްރޯލް ކުރާ އެމްޑީޕީ އާއި ދަ ޑިމޮކްރެޓްސްއިން ބައެއް ވަޒީރުންނަށް ރުހުން ނުދޭން ނިންމުމާ ގުޅިގެންނެވެ.
އިއްޔެ ޖަލްސާ ބޭއްވުނީ މަޖިލީހުގެ މާލަމުގައި ވެސް ސަލާމަތީކަންކަން އިތުރަށް ވަރުގަދަކޮށްގެންނެވެ.
ރުހުން ދޭން މިއަދު ބޭއްވި ޖަލްސާގައި އުޝާމަށް ރުހުން ނުދޭން މަޖިލީހުން ފާސްކުރީ ވޯޓުގައި ބައިވެރިވި 64 މެމްބަރުންގެ ތެރެއިން 44 މެމްބަރުން އެގޮތަށް ވޯޓު ދެއްވައިގެންނެވެ. ޑރ. ޝަހީމަށް ރުހުން ދޭން ނުފެންނަ ކަމަށް، 31 މެމްބަރަކު ވޯޓު ދެއްވި އެވެ. އަދި ހައިދަރަށް ރުހުންދޭން ނުފެންނަ ކަމަށް 46 މެމްބަރަކު ވޯޓު ދެއްވި އެވެ.
