އެކަކަށް ވުރެ ގިނަ މީހުން ކުރިމަތިނުލާތީ، މާޗު 17، ގައި ބާއްވާ ރައްޔިތުންގެ މަޖިލިސް އިންތިހާބުގައި ޑިމޮކްރެޓްސް އިން ވާދަ ކުރާނެ ކެންޑިޑޭޓުން ހޮވުމަށް ޕްރައިމަރީ ބާއްވަން ޖެހުނީ އެންމެ ހަތަރު ދާއިރާއެއްގައި ކަމަށް އެ ޕާޓީން ބުނެފި އެވެ.
ޑިމޮކްރެޓްސްއިން އެކްސްގައި ކުރި ޕޯސްޓެއްގައި ވާ ގޮތުން ޕްރައިމަރީގައި ވާދަ ކުރަން ހުޅުވާލުމުން ކުރިމަތިލީ 41 ދާއިރާއަކަށް 46 ކެންޑިޑޭޓުންނެވެ. އެއް ކެންޑިޑޭޓަކަށް ވުރެ ގިނައިން ކުރިމަތިލީ އެންމެ ހަތަރު ދާއިރާއަށް ކަމަށް ވާތީ ޕްރައިމަރީ ބާއްވަން ޖެހެނީ އެ ދާއިރާތަކުގައި އެކަންޏެވެ. އެ ހަތަރު ދާއިރާއަކީ:
- ކެލާ ދާއިރާ
- ކަނޑިތީމު ދާއިރާ
- ހުޅުމާލެ ދެކުނު ދާއިރާ
- ހެންވޭރު ދެކުނު ދާއިރާ
ޕްރައިމަރީގައި ވާދަކުރުމަށް އެދި، އެންމެ މެމްބަރަކު ކުރިމަތިލާފައިވާ ދާއިރާތަކުގައި، ޕްރައިމަރީއަކާ ނުލާ އެ މެމްބަރަކަށް ޕާޓީގެ ޓިކެޓު ހަވާލު ކުރެވޭނެ ކަމަށް ޕާޓީން ކުރި އިއުލާނުގައި ބުނެފައިވެ އެވެ. އެ މެމްބަރުންގެ ތެރޭގައި މިހާރު ވެސް މަޖިލީހުގައި ޑިމޮކްރެޓްސް ތަމްސީލް ކުރައްވާ މެމްބަރުން ހިމެނެ އެވެ.
ޕްރައިމަރީއަކާ ނުލައި ޓިކެޓު ލިބޭ ބައެއް މެމްބަރުންގެ ތެރޭގައި ހިމެނެނީ އަލީ އާޒިމް (މެދު ހެންވޭރު ދާއިރާ)، އީވާ އަބްދުﷲ (ގަލޮޅު އުތުރު ދާއިރާ)، އިސްމާއިލް ޒަރިޔަންދު (ގަލޮޅު ދެކުނު ދާއިރާ)، ހުސެއިން އަމްރު (މައްޗަންގޯޅި އުތުރު ދާއިރާ)، އިމްތިޔާޒް ފަހުމީ (މާފަންނު އުތުރު ދާއިރާ)، އިބްރާހިމް ރަޝީދު (މާފަންނު މެދު ދާއިރާ)، ހަސަން ލަތީފް (ހެންވޭރު ހުޅަނގު ދާއިރާ) އަދި ފާތިމަދު ހަމްދާ (ހުޅުމާލެ އުތުރު ދާއިރާ) އެވެ.
އެއް ކެންޑިޑޭޓަށް ވުރެ ގިނަ ކެންޑިޑޭޓުން ކުރިމަތިލާފައިވާ ދާއިރާތަކުގައި ބާއްވޭ ޕްރައިމަރީ އޮންނާނީ ފެބްރުއަރީ 3، ވާ ހޮނިހިރު ދުވަހު ކަމަށް އެ ޕާޓީން ހާމަކޮށްފައިވެ އެވެ.
އެ ޕާޓީގެ ޕްރައިމަރީގައި ވޯޓު ދިނުމުގެ ހައްގު ލިބިގެންވާ މެމްބަރުންގެ ވަގުތީ ލިސްޓް އާންމުކޮށް، ޝަކުވާއަށް ވެސް ހުޅުވާލާފައިވެ އެވެ.
