ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 ގެ ހއ. އަތޮޅު ކުއާޓާ ފައިނަލް މެޗުތައް ކާމިޔާބުކޮށް, ސެމީ ފައިނަލުން އުތީމު، ދިއްދޫ، ބާރަށް އަދި މާރަންދޫ ޖާގަ ހޯދައިފި އެވެ.
ރެހެންދި ފުޓްސަލް ދަނޑުގައި ކުރިއަށްދާ މި މުބާރާތުގައި ރޭ ހަތް މެޗު ވަނީ ކުޅެފަ އެވެ. އެއީ ދ. އަތޮޅުގެ މެޗުތަކާއި ސ. އަތޮޅުގެ މެޗުތަކުގެ އިތުރުން ހއ. އަތޮޅު ކުއާޓާ ފައިނަލް މެޗުތަކެވެ.
ކުއާޓާ ފައިނަލުގައި ހއ. އަތޮޅުގެ ޗެމްޕިއަން އުތީމުން އިހަވަންދޫގެ މައްޗަށް ކުރިހޯދީ 5-2 ގެ ނަތީޖާއަކުންނެވެ. މި މެޗުގައި އުތީމުގެ ތަހާ މުހައްމަދު ދެ ގޯލު ޖެހިއިރު, މުހައްމަދު ރިޝްމީ, މުހައްމަދު ނަބީލް އަދި އަހުމަދު އައިހަމް (ފަތޯ) މިއިން ކޮންމެ ކުޅުންތެރިއަކު ވަނީ ގޯލެއް ޖަހާފަ އެވެ. މި މެޗުގައި އިހަވަންދޫ އިން ކާމިޔާބުކުރި ގޯލުތައް އެ ޓީމަށް ޖަހާދިނީ އިބްރާހީމް ހާމިދު (ހާންޑޯ) އަދި އަހުމަދު ސާޖިދެވެ.
ހއ. ދިއްދޫ އިން ހއ. ފިއްލަދޫގެ މައްޗަށް ކުރިހޯދީ ޕެނަލްޓީގައި 7-8 ގެ ނަތީޖާއަކުންނެވެ. މި މެޗުގެ ފުރިހަމަ ވަގުތު ހަމަވީ, 3-3 ގެ ނަތީޖާއަކުން ދެ ޓީމު އެއްވަރު ވެގެންނެވެ. މި މެޗުގެ ދެވަނަ މިނެޓުގައި ދިއްދޫގެ ކެޕްޓަން ފާއިގް އަހުމަދު ގޯލު ޖަހާ އެ ޓީމަށް ލީޑު ނަގައިދިންއިރު, މެޗުގެ އަށްވަނަ މިނެޓުގައި ދިއްދޫގެ ލީޑު އެ ޓީމަށް ފުޅާކޮށްދިނީ މުހައްމަދު ވިޝާހު އެވެ. އެކަމަކު އޭގެ މިނެޓެއް ފަހުން ފިއްލަދޫގެ އަލީ އަފްރާހު ގޯލު ޖަހާ ފަރަގު ކުޑަކުރި އެވެ. ފުރަތަމަ ހާފު ނިމުމުގެ ކުރިން ދިއްދޫގެ ތިންވަނަ ގޯލު އެ ޓީމަށް ޖަހާދިނީ އިބްރާހީމް ނަވާފް ސައީދެވެ. މި މެޗުގެ ނަތީޖާ ފިއްލަދޫއިން އެއްވަރު ކުރީ ދެވަނަ ހާފުގައި އާދަމް އަބްދުލް ރަހީމް ކާމިޔާބުކުރި ދެ ގޯލުންނެވެ.
ހއ. ވަށަފަރު ކަޓުވާލާ ބާރަށުން ސެމީގެ ޖާގަ ކަށަވަރުކުރީ ޕެނަލްޓީގައި 8-7 ގެ ނަތީޖާއަކުން ކުރިހޯދައިގެންނެވެ. މި މެޗުގެ ފުރިހަމަ ވަގުތު ހަމަވީ 0-0 ގެ ނަތީޖާއަކުން ދެ ޓީމު އެއްވަރު ވެގެންނެވެ. ބާރަށުން އެ ޓީމުން ޖެހި ނުވަ ޕެނަލްޓީގެ ތެރެއިން އަށް ޕެނަލްޓީ ވަނީ ކާމިޔާބު ކޮށްފަ އެވެ. އެ ޓީމުން ނާކާމިޔާބުވީ, އަލީ ސާފީ ޖެހި ޕެނަލްޓީ އެކަންޏެވެ. ވަށަފަރުގެ އަބްދުالله ޝާކިރު ޖެހި ޕެނަލްޓީ ބާރަށުގެ ކީޕަރު ދިފާއުކުރިއިރު, އީމާން ވަހީދު ޖެހި ޕެނަލްޓީ ގޯލާ އަމާޒުނުވެ ދިޔައީ ބޭރަށެވެ.
ހއ. ހޯރަފުށީގެ މައްޗަށް ހއ. މާރަންދޫ އިން ކުރިހޯދީ ޕެނަލްޓީގައި 6-3 ގެ ނަތީޖާއަކުންނެވެ. މި މެޗުގެ ފަސްވަނަ މިނެޓުގައި ހޯރަފުށީގެ ހަސަން އިރުޝާދު ކާމިޔާބުކުރި ގޯލުން އެ ޓީމު ލީޑު ނެގި އެވެ. އެކަމަކު ދެވަނަ ހާފު ފަށައިގެން 12 ވަނަ މިނެޓުގައި މާރަންދޫގެ ހަމްދޫން އަބްދުލް ލަތީފް ކާމިޔާބުކުރި ގޯލުން އެ ޓީމުން ނަތީޖާ ހަމަހަމަ ކުރިއެވެ. އެކަމަކު މެޗު ނިމެން ތިން މިނެޓައް ވެފައިވަނިކޮށް ހޯރަފުށީގެ ކެޕްޓަން އަބްދުالله ޔާމީން (ޔާނު) ގޯލު ޖަހާ އަލުން އެ ޓީމަށް ލީޑު ނަގައިދިނެވެ. އެކަމަކު މެޗުގެ ފަހު ސިކުންތުކޮޅުގެ ތެރޭގައި މާރަންދޫ އަށް ލިބުނު ހިލޭ ޖެހުމެއްގެ ފައިދާ ނަގާ ހަމްދޫން ގޯލު ޖަހާ ނަތީޖާ ހަމަހަމަ ކުރި އެވެ.
ހއ. މާރަންދޫ އާއި ހއ. ހޯރަފުށި ބައްދަލުކުރި މެޗުގެ ތެރެއިން - ފޮޓޯ: އަބްދުالله އިޔާން / އަދަދު
މީގެ އިތުރުން ރޭ ވަނީ ދ. އަތޮޅުގެ މެޗުތަކެއްވެސް ކުރިއަށް ގޮސްފަ އެވެ. ދ. އަތޮޅުގެ އެންމެ ފަހުގެ ޗެމްޕިއަން ދ. ކުޑަހުވަދޫ އިން އެ އަތޮޅު މީދޫގެ މައްޗަށް ކުރިހޯދީ ފަސޭހަކަމާއެކު 4-1 ގެ ނަތީޖާއިންނެވެ. މި މެޗުގައި ކުޑަހުވަދޫގެ ޖުމައިލް ޖަމީލް (ޖުމްބެ) ދެ ގޯލު ޖެހިއިރު, ހާރޫން އިބްރާހީމް އަދި ހުސެއިން އިފްހާމް ގޯލެއް ޖެހި އެވެ. މި މެޗުގައި މީދޫން ކާމިޔާބުކުރި ހަމައެކަނި ލަނޑު އެ ޓީމަށް ޖަހާދިނީ ޝާއިމް ޝިޔާމް އެވެ.
ދ. ކުޑަހުވަދޫ އާއި ދ. މީދޫ ބައްދަލުކުރި މެޗުގެ ތެރެއިން - ފޮޓޯ: އަބްދުالله އިޔާން / އަދަދު
ސ. އަތޮޅު މަރަދޫ އާއި މަރަދޫ ފޭދޫ ބައްދަލުކުރި މެޗު 0-0 ގެ ނަތީޖާއަކުން އެއްވަރުވިއިރު, އެ އަތޮޅު ފޭދޫ އާއި ހިތަދޫ ބައްދަލުކުރި މެޗު 2-2 ގެ ނަތީޖާއަކުން ވަނީ އެއްވަރުވެފަ އެވެ. މި މެޗުގެ 10 ވަނަ މިނެޓުގައި ހިތަދޫގެ މުހައްމަދު ދާނިޝް އިބްރާހީމް ގޯލު ޖަހާ އެ ޓީމަށް ލީޑު ނަގައިދިން ނަމަވެސް އޭގެ އެއް މިނެޓު ފަހުން ފޭދޫގެ ކެޕްޓަން ހުސެއިން ގައްސާން ލަބީބް ވަނީ އެ ޓީމަށް ނަތީޖާ ހަމަހަމަ ކޮށްދީފަ އެވެ. އަދި ފުރަތަމަ ހާފު ނިމުމުގެ ކުރިން ހަސަން އަޒްވާން ފޭދޫ އަށް ލީޑު ނަގައިދިނެވެ. އެކަމަކު ދެވަނަ ހާފު ފަށައިގެން ދެވަނަ މިނެޓުގައި ހިތަދޫގެ މުހައްމަދު އިންޝާލް ވަނީ ގޯލު ޖަހާ ނަތީޖާ ހަމަހަމަ ކޮށްދީފަ އެވެ.
ސ. ހިތަދޫ އާއި ސ. ފޭދޫ ބައްދަލުކުރި މެޗުގެ ތެރެއިން - ފޮޓޯ: އަބްދުالله އިޔާން / އަދަދު
ގޯލްޑަން ފުޓްސަލް ޗެލެންޖުގައި މިރޭ ވެސް އަށް މެޗު ކުޅޭނެ އެވެ. އެއީ ގއ. އަތޮޅުގެ މެޗުތަކުގެ އިތުރުން ހދ. އަތޮޅުގެ މެޗުތަކެވެ.
ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް:
- ގއ. މާމެންދޫ - ގއ. ކޮނޑޭ : 20:00 (ގްރައުންޑް 1)
- ގއ. ދާންދޫ - ގއ. ނިލަންދޫ : 20:00 (ގްރައުންޑް 2)
- ގއ. ކޮލަމާފުށި - ގއ. ދެއްވަދޫ : 21:00 (ގްރައުންޑް 1)
- ގއ. ކަނޑުހުޅުދޫ - ގއ. ވިލިނގިލި : 21:00 (ގްރައުންޑް 2)
- ހދ. ހަނިމާދޫ - ހދ. ނޭކުރެންދޫ : 22:00 (ގްރައުންޑް 1)
- ހދ. ނައިވާދޫ - ހދ. މަކުނުދޫ : 22:00 (ގްރައުންޑް 2)
- ހދ. ވައިކަރަދޫ - ހދ. ނޮޅިވަރަން :23:00 (ގްރައުންޑް 1)
- ހދ. ނެއްލައިދޫ - ހދ. ނޮޅިވަރަންފަރު : 23:00 (ގްރައުންޑް 2)
