އިސްލާމިކް ޗެރިޓީ ފަންޑުން, ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒަށް 32 ޒަމާނީ ހޮސްޕިޓަލް އެނދު ހަދިޔާކޮށްފި އެވެ.
ޗެރިޓީ ފަންޑުން ގުރައިދޫ މަރުކަޒަށް ހަދިޔާ ކުރި 32 އެނދަކީ ފައިސާގެ ގޮތުން 504,000 ރުފިޔާގެ އަގުހުރި އެނދުތަކެއް ކަމަށް އިސްލާމިކް މިނިސްޓްރީން ބުނެ އެވެ.
އެނދުތައް ހަދިޔާ ކުރަން މިއަދު ބޭއްވި ރަސްމިއްޔާތުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ ގުރައިދޫ މަރުކަޒަށް އެނދު ހަދިޔާ ކުރީ އެ މިނިސްޓްރީއަށް ހައިރާތުގެ ގޮތުގައި ރައްޔިތުން ހަދިޔާކޮށްފައިވާ ފައިސާގެ ތެރެއިން ކަމަށެވެ.
"އިސްލާމިކް މިނިސްޓްރީއަށް ވަރަށް ގިނަ ރައްޔިތުން އެމީހުންގެ ހައިރާތުގެ ފައިސާ ހަވާލު ކުރޭ. މިއީ ޒަކާތު ފަންޑުގެ އިތުރުން މިސްކިތްތަކާ އާންމު ހެޔޮ ކަންކަމަށް ހަރަދު ކުރުމަށް ރައްޔިތުން ހަދިޔާ ކުރާ ސަދަގާތް. ހާއްސަ އެހީއަށް ބޭނުންވާ މީހުންގެ މަރުކަޒަށް މިއަދު އެހީތެރިކަން ދެވިގެން މިދަނީ މިދެންނެވި ހައިރާތުގެ ތެރެއިން،" މިނިސްޓަރު ވިދާޅުވި އެވެ.
ރަސްމިއްޔާތުގައި ވާހަކަ ދައްކަވަމުން މިނިސްޓަރު ޝަހީމް ވަނީ ހައިރާތާއި ސަދަގާތުގެ ގޮތުގައި ރާއްޖެއިން ބޭރަށް ހޭދަކުރާ ކުރުން ރާއްޖޭގެ ކަންކަމަށް ހޭދަ ކުރުމަށް އެދިވަޑައިގެންފަ އެވެ.
އެގޮތުން ނިކަމެތިންނާއި ގުރުއާން ކްލާސްތަކަށާއި ގުރުއާން މުބާރާތްތަކަށާއި ޖަމިއްޔާތަކާއި ރަށްރަށުގެ ލައިބްރަރީތައް ގާއިމް ކުރުމުގެ އިތުރުން ތައުލީމާއި އެހެނިގެން ހެޔޮ ކަންކަމަށް ވެސް ފައިސާ ހަރަދު ކުރެވޭނެކަން އޭނާ ފާހަގަކުރެއްވި އެވެ.
ޝަހީމް ވަނީ ހައިރާތާއި ސަދަގާތުގެ ގޮތުގައި ހޭދަކުރަން ބޭނުންވާ މީހުން އިސްލާމިކް މިނިސްޓްރީ މެދުވެރިކޮށް އެހީވުމަށް އެދިވަޑައިގެންފަ އެވެ. އަދި އެ ސަދަގާތާއި ހައިރާތް ހެޔޮ ކަންކަމަށް ވާސިލުކޮށްދޭން އަމާނާތްތެރިކަމާއެކު މިނިސްޓްރީން މަސައްކަތް ކުރާނެ ކަމަށް އޭނާ ވިދާޅުވި އެވެ.
