ބޮއާކޭ، އައިވަރީ ކޯސްޓް (ޖެނުއަރީ 24) - އެފްރިކަން ކަޕް އޮފް ނޭޝަންސްގައި ރޭ މޮރިޓޭނިއާ އަތުން 1-0 އިން ބަލިވެ، އަަލްޖީރިއާ މުބާރާތުން ކެޓިއިރު، ފޯރިގަދަ މެޗަކަށް ފަހު ގެމްބިއާ އަތުން 3-2 އިން މޮޅުވެ، ކެމަރޫން މުބާރާތުގެ ގަދަ 16 އިން ފުރުސަތު ހޯދައިފި އެވެ.
އެފްރިކަން ކަޕްގެ ތަށި 2019 ވަނަ އަހަރުގެ މުބާރާުތުގައި އުފުލާލި އަލްޖީރިއާ މުބާރާތުން ކެޓީ ގްރޫޕް ޑީގައި ކުޅުނު ތިން މެޗުގެ ތެރެއިން ދެ މެޗު އެއްވަރުވެ، އެއް މެޗުން ބަލިވުމާ އެކު، ގްރޫޕްގެ ފުލަށް ދިއުމުންނެވެ. މި ގްރޫޕްގެ އެއް ވަނަ ދިޔައީ ހަތް ޕޮއިންޓް ހޯދި އެންގޯލާ އެވެ. ދެ ވަނަ އަށް ދިޔަ ބުރްކީނާ ފާސޯ އަށް ވަނީ ހަތަރު ޕޮއިންޓް ލިބިފަ އެވެ. އަދި މޮރިޓޭނިއާ އިން އަލްޖީރިއާ ބަލިކޮށް ހޯދި ތިން ޕޮއިންޓާ އެކު ވަނީ ތިން ވަނަ އަށް ގޮސްފަ އެވެ.
އެފްރިކަން ކަޕްގައި މޮރިޓޭނިއާ އިން ހޯދި ފުރަތަމަ މޮޅު ހާސިލްކޮށްފައި މި ވަނީ މުބާރާތުގެ ވަރުގަދަ ބާރެއް ކައިރިންނެވެ. އަލްޖީރިއާ ކޮޅަށް މޮރިޓޭނިއާގެ ހަމައެކަނި ގޯލު ޖަހާފައިވަނީ، މެޗުގެ 37 ވަނަ މިނިޓްގައި އެ ޓީމުގެ ޑިފެންޑަރު ޔަލީ ދެލާހީ އެވެ.
އަލްޖީރިއާ އިން ލަނޑެއް ޖޭހޭތޯ ކުރި މަސައްކަތް ކާމިޔާބެއްނުވި އެވެ.
ގްރޫޕް ސީގައި އެންމެ ފަހުގެ ޗެމްޕިއަން، ސެނެގާލުން ވަނީ ކުޅުނު ތިން ވަނަ މެޗުން ވެސް މޮޅުވެފަ އެވެ. އެ ގޮތުން، ގިނީގެ މައްޗަށް ސެނެގާލުން ކުރިހޯދީ 2-0 އިންނެވެ. ސެނެގާލުން ވަނީ ނުވަ ޕޮއިންޓް ހޯދައިފަ އެވެ. ދެ ވަނަ އަށް ދިިޔަ ކެމަރޫން އާއި ތިން ވަނައިގައި ނިންމި ގިނީ އަށް ލިބުނީ ހަތަރު ޕޮއިންޓެވެ. ފުލަށް ދިޔަ، ގެމްބިއާ އަށް ޕޮއިންޓެއް ނުލިބެ އެވެ.
ކެމަރޫނުން ކާލް ޓޯކޯ އެކަމްބީގެ ލަނޑުން ލީޑުނަގާފައިވަނިކޮށް ގެމްބިއާ އިން ވަނީ އަބްލީ ޖެލޯ ޖެހި ލަނޑުން އެއްވަރުކޮށްފަ އެވެ. ގެމްބިއާ އިން މެޗުގެ 85 ވަަނަ މިނިޓްގައި އެބްރީމާ ކޯލީގެ ގޯލުން ލީޑުނެގި އެވެ. އެކަމަކު، ދެ މިނިޓް ފަހުން ގެމްބިއާގެ ޖޭމްސް ގޯމޭޒް އަތުން ބައިކޮޅަށް ވަން ގޯލުން އެއްވަރުވި އެވެ. ކެމަރޫން މޮޅުވި ގޯލު ޖެހީ މެޗުގެ އިތުރު ވަގުތުގައި، ކްރިސްޓޮފާ ވޫ އެވެ.
ރޭގެ މެޗުގައި ކެމަރޫނުން ކުޅުނީ އެއް ވަނަ ކީޕަރު އަންދްރޭ އޮނާނާ ބެންޗުގައި ބައިންދައިގެންނެވެ.
