މާލެ ސިޓީ ކައުންސިލުގެ ދަށުން ހިންގަމުން ދިޔަ 11 މަޝްރުއޫއެއް ސަރުކާރަށް ބަދަލުކުރި މައްސަލާގައި ޝަކުވާއެއް ނެތްކަން މޭޔަރު އާދަމް އާޒިމް ހާމަކުރައްވައިފި އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ރޭ މޭޔަރުކަމުގެ ހުވާކުރެއްވި އާޒިމް ވިދާޅުވީ ސިޓީ ކައުންސިލުން ރޭވި ޕްރޮޖެކްޓުތަކަކީ، ކައުންސިލުގެ ދަށުން ހިންގާ ޕްރޮޖެކްޓަކަށް ވުން މުހިންމު ނޫން ކަމަށެވެ.
"ސިޓީ ކައުންސިލުން ޕްރޮޖެކްޓެއް ރާވާފައި، އަޅުގަނޑު ހުވާކުރުމުގެ ކުރިން މިނިސްޓްރީގެ ދަށަށް ބަދަލުކުރީ. އަޅުގަނޑު އިހުތިރާމް ކުރަން ސިޓީ ކައުންސިލުގެ ނިންމުމަށް," އާޒިމް ވިދާޅުވި އެވެ.
އާޒިމް ވިދާޅުވީ މުހިންމީ ސިޓީ ކައުންސިލުން ގިނަ ޕްރޮޖެކްޓު ހިންގުން ނޫން ކަމަށާއި، ރައްޔިތުންނަށް ޕްރޮޖެކްޓު ހިންގައިގެން ހިދުމަތް ލިބޭ ނަމަ ސަރުކާރުގެ ކޮންމެ ބަޔަކު އެކަން ކުރުމަކުން މައްސަލައެއް ނެތް ކަމަށެވެ.
"އަޅުގަނޑު ކުރިއެކޭ އެބޭފުޅުން ކުރިއެކޭ ރައްޔިތުންގެ ފައިސާއިން ކުރަނީ. އެހެންވީމަ ރަނގަޅުވާނެ. އެބޭފުޅުން ކޮށްލީމަ ހަމަ އެނިމުނީ އެކަންތައް. އަޅުގަނޑު ކޮންމެހެން އަޅުގަނޑު ކުރިކަމަކަށް ދައްކާކަށް، މިއުޅެނީ ކާކަށްތޯ ގިނަ ކަންތައް ކުރެވެނީ ބަލާކަށް ނޫން," އާޒިމް ވިދާޅުވި އެވެ.
އާޒިމް ވިދާޅުވީ، މަސައްކަތް ކުރައްވަނީ ރައްޔިތުންނަށް އެންމެން ގުޅިގެން "ރައްޔިތުންނަށް އުފާވެރި ދިރިއުޅުމެއް ހޯދައިދޭން" ކަމަށެވެ. ރައްޔިތުންގެ ޓެކްސް ފައިސާއިން ކުރާ މަސައްކަތްތައް ވާން ޖެހޭނީ އިސްރާފު ނުކޮށް ކުރާ ކަންކަމަށްކަން ފާހަގަކުރައްވައި އާޒިމް ވިދާޅުވީ އެފަދަ ކަމެއްގައި ބައިވެރި ނުވާނެ ކަމަށެވެ.
މޭޔަރުކަމަށް އާޒިމް އިންތިހާބުކުރީ މި މަހުގެ 13 ވީ ބުދަ ދުވަހު ބޭއްވި ސިޓީ ކައުންސިލުގެ ބައި އިލެކްޝަނުގަ އެވެ.
އެ ހަފްތާގެ ބުދަ ދުވަހު، ސިޓީ ކައުންސިލުގެ ބައްދަލުވުމެއް ބާއްވައި، ރައީސް އޮފީހުގެ ކޯޕަރޭޓް ޑިވެލޮޕްމަންޓް މިނިސްޓަރު މުހައްމަދު ޝާހިދު (ޝާޑު) ބައިވެރިވެ 100 މިލިއަނަށް ވުރެ އަގުބޮޑު ހުރިހާ މަޝްރޫއެއް ސަރުކާރުގެ މިނިސްޓްރީތަކުގެ ދަށަށް ބަދަލުކުރުމަށް ކަރުދާހެއް ހުށަހަޅައި ފާސްކުރި އެވެ.
އެކަމާ ގުޅިގެން އާޒިމް ވަނީ ކަންބޮޑުވުން ފާޅުކޮށްފަ އެވެ. އޭރު އާޒިމް ވިދާޅުވީ، ގާނޫނާ ހިލާފަށް ރައީސް އޮފީހުގެ ބޭފުޅުން ވަދެ ސިޓީ ކައުންސިލުގެ މަސައްކަތްތައް އަތުލަން ކުރާ މަސައްކަތް ހުއްޓައިލަން ސަރުކާރަށް ގޮވައިލާ ކަމަށެވެ.
