ކުއްލި ހާލަތުގައި މީހަކު އުފުލަން ޖެހިއްޖެ ނަމަ ޝެޑިއުލް ފްލައިޓުތަކަށް ވުރެ އެ ބަލި މީހާ އުފުލުމަށް އިސްކަންދޭ ގޮތަށް ގައުމީ އެއާލައިން، މޯލްޑިވިއަންގެ އުސޫލު ބަދަލުކޮށްފި އެވެ.
ޓްރާންސްޕޯޓް މިނިސްޓަރު މުހައްމަދު އަމީން އެކްސްގައި ކުރެއްވި ޕޯސްޓެއްގައި ވިދާޅުވީ އިއްޔެ ފެށިގެން ބަލި މީހުން އުފުލުމަށް މޯލްޑިވިއަން އިން އެކުލަވާލާފައިވާ އުސޫލަށް ބަދަލު ގެނެސްފައިވާ ކަމަށެެވެ. ހޮސްޕިޓަލަކުން އިމަޖެންސީ ކޭސްއެއްގެ މައުލޫމާތު ލިބިއްޖެ ނަަމަ މޯލްޑިވިއަނުން އެންމެ އިސްކަންދޭ ކަމަކަށް ވާނީ އިމަޖެންސީގައި އުފުލަން ޖެހޭ ބަލިމީހާ އުފުލުން ކަމަށް ވެސް އޭނާ ވިދާޅުވި އެވެ.
"މިއަދުން ފެށިގެން މޯލްޑިވިއަންގެ އުޞޫލަށް ބަދަލުގެނެވި، އިމަޖެންސީ ކޭސްއެއް އަތުވެޖެނަމަ، ފްލައިޓް ޝެޑިއުލުން އެންމެ އިސްކަމެއް ދީގެން އިމަރޖެންސީކޮށް އުފުލަންޖެހޭ ފަރާތް އުފުލާގޮތަށް މިހާރުވަނީ ހަމަޖައްސާފައި،" މިނިސްޓަރ އަމީން ލިޔުއްވި އެވެ.
ޓްރާންސްޕޯޓް މިނިސްޓަރު މިހެން ވިދާޅުވެފައި މިވަނީ ގއ. ވިލިނގިލީގައި 13 އަހަރުގެ ކުއްޖަކަށް ސްޓްރޯކެއް ޖެހި، 16 ގަޑިއިރު ވީއިރު ވެސް މާލެ ގެނެވޭނެ ގޮތެއް ހަމަޖައްސައި ނުދެވުމުން ސަރުކާރަށް ފާޑުކިޔުންތައް އަމާޒުވެފައި ދަނޑިވަޅެއްގަ އެވެ. މާލެ ގެނައި ފަހުން އެކުއްޖާ ވަނީ ނިޔާވެފަ އެެވެ.
އެއާ އެމްބިޔުލާންސް ގެ ހިދުމަތް މާޗު ފުރަތަމަ ދުވަހުން ފެށިގެން ލިބޭނެ ކަމަށް ރައީސް ޑރ މުހައްމަދު މުއިއްޒު ވިދާޅުވެފައިވެ އެވެ.
"ބަލިމީހުން އުފުލަން އެއާ އެމްބިއުލެންސް، މާޗު 1, ގައި އިރާދަކުރެއްވިއްޔާ އުދުހެން ފަށާނެ. ހެލިކޮޕްޓަރެއް ނޫން، ޑޯނިއާއެއް ނޫން، ޑޭޝް 8 ގެ އަޅުގަނޑުމެންގެ އޮތް މަތިންދާބޯޓު މިހާރު ބަދަލުކުރުމުގެ މަސައްކަތް އެވަނީ ފެށިފައި. އެއިން އެތައް ފައިދާއެއް އެބަވޭ. އެންމެ އުތުރުން، ނޫނީ އެންމެ ދެކުނުން މާލެއަށް ކުޑައިރުކޮޅަކުން އާދެވުމުގެ އިތުރަށް، ކުއްލިއަކަށް ރާއްޖެއިން ބޭރަށް ތައިލެންޑާ ހަމައަށް ގެންދަން ވިޔަސް، އެ ޑޭޝް 8 ގައި ދާނެ." އެމަނިކުފާނު ވިދާޅުވި އެވެ.
މިނިސްޓަރު އަމީން ގެ ޕޯސްޓުގެ ރައީސްގެ އެ ނިންމެވުން ތަކުރާރުކުރެއްވި އެވެ.
