ގަވާއިދާ ހިލާފު އަމަލުތައް ކުރާ މީހުންނާ މެދު ފިޔަވަޅު އަޅައި, ކުރި ކުށް އެނގޭނެ ގޮތަށް އެމީހެއްގެ ވަނަވަރު އާންމު ކުރަން ގއ. ކޮނޑޭ ކައުންސިލުން ނިންމައިފި އެވެ.
ކުށް ކުރާ މީހުންގެ ވަނަވަރު ހާމަ ކުރަން ކޮނޑޭ ކައުންސިލުން ނިންމީ އެ ކައުންސިލުން ބުރާސްފަތި ދުވަހު ގެޒެޓު ކުރި އުސޫލެއްގެ ދަށުންނެވެ. އެ އުސޫލުގައިވާ ގޮތުން, އެ ގަވާއިދުތަކާ ހިލާފުވާ މީހަކަށް ނޯޓިސް ފޮނުވުމާއި ޖޫރިމަނާ ކުރުމުގެ އިތުރުން ކުށްކުރާ މީހާގެ ވަނަވަރު އަދި އޭނާ ކުރި ކުށް އެނގޭނެހެން ތަނުގެ ފޮޓޯ އާންމު ކުރާނެ އެވެ. އޭގެ ފަހުން ވެސް އިސްލާހު ނުވެއްޖެނަމަ, ކޮންމެ މަހަކު އެއްފަހަރު ޖޫރިމަނާ ކުރާނެ ކަމަށް ވެސް ކޮނޑޭ ކައުންސިލުން ބުނެ އެވެ.
ކޮނޑޭ ކައުންސިލުގެ ސެކެޓްރީ ޖެނެރަލް އާމިރު ސައީދު މިއަދު ވިދާޅުވީ އެ ކައުންސިލުން އާންމު ކުރި އުސޫލަކީ ކައުންސިލުން މަގުމަތި ކުނި ކެހުމާއި ފުރާޅުން އަންނަ ފެން ހިންދުމާއި އާންމު ތަންތަނަށް ކުނި ނޭޅުން ފަދަ ކަންކަމާ ގުޅޭ ގޮތުން ހަދާފައިވާ ގަވާއިދުތަކަށް އަމަލު ނުކުރާ ނަމަ އަޅާނެ ފިޔަވަޅުތައް ކަމަށެވެ. އަދި އެ އުސޫލު އާންމުކުރީ ފިޔަވަޅު އަޅާނެ ތަރުތީބެއް އާންމުންނަށް އެނގިފައި އޮތުން މުހިންމު ކަމަށް ފެންނާތީ ކަމަށް އޭނާ ވިދާޅުވި އެވެ.
އާމިރު ވިދާޅުވީ މީހަކަށް ދޫކޮށްފައިވާ ގޯއްޗެއް ސާފުނުކޮށް ނުވަތަ ގޭގެ ދޮރުމަތި ސާފު ނުކޮށް ހުރުމުން ނޯޓިސް ފޮނުވާ, ޖޫރިމަނާ ކުރުމުން ވެސް އެކަން އިސްލާހު ނުކޮށްފި ނަމަ, އެ ގެއެއްގެ ފޮޓޯ ނަގާ, މީހާގެ މައުލޫމާތާއެކު އާންމު ކުރާނެ ކަމަށެވެ. އަދި އެއީ ކުށެއް ކަން އަންގާ އިއުލާނު ކުރުމުގެ ބޭނުމަކީ ކަންކަން އިސްލާހު ކުރުމަށް ބާރު އެޅުން ކަމަށް އޭނާ ވިދާޅުވި އެވެ.
"ގާނޫނަކުން ނުކުރެވޭނެ ކަމަކަށް ވެސް ނޯންނާނެ. މައުލޫމާތު ހާމަ ކުރުމަކީ،" އާމިރު ވިދާޅުވި އެވެ.
މިކަމާ ގުޅޭގޮތުން ކައުންސިލްތައް ޒިންމާދާރުކޮށް, މޮނިޓާ ކުރުމުގެ މަސްއޫލިއްޔަތުު މަތިވެފައިވާ ލޯކަލް ގަވަމަންޓް އޮތޯރިޓީ (އެލްޖީއޭ) އިން ބުނީ, ގާނޫނުގެ ދަށުން ގަވާއިދުތައް ހެދުމުގެ ބާރު ކައުންސިލްތަކަށް ލިބިދޭ ކަމަށެވެ. ނަމަވެސް އެފަދަ ކަންކަން ކުރަންވާނީ އެލްޖީއޭއާ މަޝްވަރާ ކުރުމަށްފަހު ކަމަށް ބުންޏެވެ.
އެލްޖީއޭގެ ސީއީއޯ ޑރ. މަރިޔަމް ޒުލްފާ ވިދާޅުވީ ކޮނޑޭ ކައުންސިލުން ގަވާއިދު ނުވަތަ އުސޫލު ހެދީ އެލްޖީއޭއާ މަޝްވަރާ ކުރުމެއް ނެތި ކަމަށެވެ. އަދި ފޮޓޯ އާއި ވަނަވަރު އާންމު ކުރާނެ ކަމަށް އޮތް މާއްދާ ފިޔަވައި, އެ އުސޫލުގައިވާ ކަންކަން ރަނގަޅުކަން އޭނާ ފާހަގަކުރެއްވި އެވެ.
"ފޮޓޯ ޖެހުމުގެ ތަންކޮޅު ކުޑަކޮށް ޑްރަސްޓިކް ވާތީ, އެތަންކޮޅު ކަނޑާލަން އަޅުގަނޑު އިލްތިމާސް ކުރަން،" ޒުލްފާ ވިދާޅުވި އެވެ.
އޭނާ ވިދާޅުވީ ކައުންސިލުގެ ބާރުތައް ހަނިކުރަން މަސައްކަތް ނުކުރައްވާނެ ކަމަށާއި މިނިވަންކަަމާއެކު މަސައްކަތް ކުރުމުގެ ފުރުސަތު ކައުންސިލްތަކަށް އޮންނާނެ ކަމަށެވެ. އަދި ގަވާއިދުތަކަށް އަމަލު ނުކުރާނަމަ ފިޔަވަޅު އެޅުމަށް ކޮނޑޭ ކައުންސިލުން ނެގީ ނަމޫނާ އިސްނެގުމެއްކަން ޒުލްފާ ފާހަގަކުރެއްވި އެވެ.
