މެޑްރިޑް (ޖެނުއަރީ 20) - ބާސެލޯނާގެ ސްޕޯޓިން ޑިރެކްޓަރު، ޑެކޯގެ އެެދުމާ އެކު، އެ ކްލަބުން މެންޗެސްޓާ ސިޓީގެ އިނގިރޭސި މިޑްފީލްޑަރު، ކެލްވިން ފިލިޕްސް ހޯދަން ޝައުގުވެރިކަން ފާޅުކޮށްފި އެވެ.
ޖެނުއަރީ ޓްރާންސްފާގައި މެންޗެސްޓާ ސިޓީ ދޫކޮށްލާނެކަން އިއުލާނުކޮށްފައިވާ އިނގިރޭސި މިޑްފީލްޑަރު، ފިލިޕްސް، 28، ހޯދުމުގެ ރޭހުގައި ބާސެލޯނާ ހިމެނޭ ގޮތަށް ހަ ކްލަބެއް އެބައޮތެވެ. އެއީ، އެތުލެޓިކޯ މެޑްރިޑް، ކްރިސްޓަލް ޕެލަސް، ވެސްޓް ހޭމް ޔުނައިޓެޑް، ނިއުކާސަލް ޔުނައިޓެޑް އަދި ޔުވެންޓަސް އެވެ.
ސިޓީގައި އެކަށީގެންވާ ވަރަށް، ފިލިޕްސް އަށް މެޗު ކުޅެން ނުލިބެނީ އަނިޔާގެ މައްސަލަތަކާ ހުރެ އެވެ. އަދި ފިިލިޕްސް ފިޓްވެެގެން އަޔަސް މެޗުތަކުން ޖާގަ ނުލިބެނީ މަގާމުގެ ވާދަވެރިކަން ބޮޑުވުމުންނެވެ. އެހެންވެ، ފިލިޕްސް ނިންމާފައިވަނީ ދެން ބަދަލުވާ ޓީމަކުން މެޗު ކުޅެން ލިބޭ އަދަދު ކޮންޓްރެކްޓްގައި ހިމަނާށެވެ.
ބާސެލޯނާގެ ޓެކްނިކަލް ޓީމުން ޑެކޯގެ ލަފަޔާ އެކު، މިހާރު އެ ކްލަބްގެ ބޯޑަށް ހުށަހަޅާފައިވަނީ ކުޅުމުގެ ފުރުސަތު ލިބޭ ގޮތަށް ވިޔަސް ފިލިޕްސް އަށް ކޮންޓްރެކްޓެއް ހުށަހެޅުމަށެވެ. އެ ގޮތުން، ބާސެލޯނާ އިން ފުރަތަމަ ދޭން ބޭނުންވަނީ ހަ މަސް ދުވަހުގެ ލޯން އެއްބަސްވުމެއް ކަމަށް ރިޕޯޓްތައް ބުނެ އެވެ.
އެކަމަކު، ސިޓީން ޑިމާންޑްކުރާ ލޯން ފީ ދައްކަން ބާސެލޯނާ އިން ބޭނުމެއް ނުވެ އެވެ. ސިޓީން ލޯން ފީ އަކަށް ނުވަ މިލިއަން ޑޮލަރު ބޭނުންވެ އެވެ. ބާސެލޯނާގެ ވިސްނުމަކީ 5-7 މިލިއަން ޑޮލަރު ދިނުމެވެ.
ޔޫރޯ ފުޓްބޯޅަ މުބާރާތުގައި ކުޅޭ އިނގިރޭސި ޓީމުން ޖާގަ ޔަގީންކުރަން ފިލިޕްސް އަށް އެންމެ ރަނގަޅުވާނީ ޗެމްޕިއަންސް ލީގުގައި ކުޅޭ ޓީމަކަށް ބަދަލުވުން ކަމަށް އިނގިރޭސި ފުޓްބޯޅައިގެ ތަޖުރިބާކާރުންނާ ހަވާލާދީ އެ ގައުމުގެ މީޑިއާ އިން ރިޕޯޓްކޮށްފަ އެވެ.
ލީޑްސް ޔުނައިޓެޑްގެ އެކެޑަމީން ސީނިއާ ޓީމަށް ޕްރޮމޯޓްވެ، އެ ޓީމާ އެކު ޕްރިމިއާ ލީގުގައި ވެސް ކުޅުނު ފިލިޕްސް، ސިޓީ އަށް ސޮއިކުރީ 2022 ވަނަ އަހަރުގެ ޖެނުއަރީ މަހު، ހަ އަހަރުގެ ކޮންޓްރެކްޓެއްގައި، 50 މިލިއަން ޑޮލަރުގެ ޓްރާންސްފާ ފީ އަކަށެވެ.
