މާލެ ސިޓީ ކައުންސިލުން ހިންގަމުން ދިޔަ މަޝްރޫއުތަކުގެ ތެރެއިން އަގު ބޮޑެތި މަޝްރޫއުތައް އިންފްރާސްޓްރަކްޗާ މިނިސްޓްރީން ހިންގާ ގޮތަށް، އެ މިނިސްޓްރީއަށް ބަދަލު ކުރަން ސިޓީ ކައުންސިލުން މިއަދު ފާސްކޮށްފި އެވެ.
މިއަދު ބޭއްވި ސިޓީ ކައުންސިލް ބައްދަލުވުމުގައި ރައީސް އޮފީހުގެ ކޯޕަރޭޓް ޑިވެލޮޕްމަންޓް މިނިސްޓަރު މުހައްމަދު ޝާހިދު (ޝާޑު) ބައިވެރިވެވަޑައިގަތެވެ. އޭނާއަކީ މީގެ ކުރިން ސިޓީ ކައުންސިލްގެ މުވައްޒަފެކެވެ. ކައުންސިލުން ހިންގި ޕްރޮޖެކްޓްތަކުގެ އިދާރީ ބައެއް ކަންކަން ބައްލަވަމުން ގެންދެވީ އޭނާ އެވެ.
"އަޅުގަނޑު މި ހުށަހަޅަނީ މި ޕްރޮޖެކްޓުތަކަށް ކައުންސިލުން އެއްބަސްވެފައި ހުރި ޓާމްތަކަށް އެއްވެސް ބަދަލެއް ނުގެެނސް މި ޕްރޮޖެކްޓުތައް އަވަސް ކުރުމަށްޓަކައި މިކަމާ ގުޅޭ ވުޒާރާއަށް މި ޕްރޮޖެކްޓުތައް ވަގުތީ ގޮތުން މެނޭޖް ކުރުމަށް ހަވާލު ކުރުމަށް. އެ ވުޒާރާއެއްގެ ގޮތުގައި އަޅުގަނޑު މި ހުށަހަޅަނީ މިނިސްޓްރީ އޮފް އިންފްރާސްޓްރަކްޗާ،" ޝާހިދު ވިދާޅުވި އެވެ.
ސިޓީ ކައުންސިލް ބައްދަލުވުމަށް އޭނާ ކަރުދާހެއް ހުށަހެޅުއްވި އެވެ. އެ ކަރުދާހުގައި ވަނީ 100 މިލިއަން ރުފިޔާއަށް ވުރެ އަގު ބޮޑު ބައެއް މަޝްރޫއުތައް ސަރުކާރަށް ދިނުމަށެވެ. ކައުންސިލުން މިއަދު ނިންމީ، އެ ޕްރޮޖެކްޓުތައް ސަރުކާރަށް ބަދަލު ކުރި ނަމަވެސް ހަ މަސް ދުވަހުގެ ތެރޭގައި މަސައްކަތް ނުފެށިއްޖެ ނަމަ އަލުން އެ ޕްރޮޖެކްޓުތައް ކައުންސިލަށް ބަދަލު ކުރެވޭނެ ގޮތަށެވެ.
"އަޅުގަނޑުމެން ހުށަހަޅަނީ ޕްރޮޖެކްޓުތަކުގެ ވެލިއުއަށް ބަލާފަ، ކޮންމެ ޕްރޮޖެކްޓަކީ ވެސް އުސޫލެއްގެ ގޮތުން އިވެލުއޭޝަނެއް ހަދާކަމަށްވެއްޖެއާ ގާތްގަނޑަކަށް 100 މިލިއަން ރުފިޔާއަށްވުރެ މައްޗަށް އަރާ ޕްރޮޖެކްޓުތަކެއް. ކައުންސިލުން ހަރަދު ނުކުރި ނަމަވެސް މިވަރުގެ ޕްރޮޖެކްޓުތަކެއް ހިންގާއިރު މީގައި ޓެކްނިކަލީ ވަރަށް ގިނަ ކަންތައްތަކެއް ބަލަންޖެހޭނެ،" ޝާހިދު ވިދާޅުވި އެވެ.
ވެރިކަންކުރާ ޕީއެންސީ/ޕީޕީއެމްގެ މެޖޯރިޓީ އޮތް ކައުންސިލުގެ މިއަދު ބައްދަލުވުމުގައި ބައިވެރިވެވަޑައިގަތް ކައުންސިލަރުންގެ އިއްތިފާގުން ފާސްކުރީ ކަރުދާހުގައިވާ ގޮތަށް ކުރިއަށް ދިޔުމަށެވެ.
ބަދަލު ކުރަން ނިންމީ މަސްމާރުކޭޓާއި ލޯކަލް މާރުކޭޓް އަދި ޕާކިން ބިލްޑިންތަކުގެ މަަޝްރޫއު އެވެ.
ސިޓީ ކައުންސިލުން ހިންގަމުން ދިޔަ ބޮޑެތި މަޝްރޫއުތަކެއް ސަރުކާރަށް ދިނުމަށް މި ނިންމީ، އިންތިހާބީ މޭޔަރު އާދަމް އާޒިމް ހުވާކުރެއްވުމަށް ފަސް ދުވަހަށް ވެފައި އޮއްވަ އެވެ. އާޒިމަކީ އިދިކޮޅު އެމްޑީޕީގެ ބޭފުޅެކެވެ.
މޭޔަރުގެ މަގާމުގައި މިދިޔަ ދެ އަހަރު ދުވަހު ހުންނެވީ މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
