ކޯހޯގޯ، އައިވަރީ ކޯސްޓް (ޖެނުއަރީ 17) - އެފްރިކަން ކަޕް އޮފް ނޭޝަންސްގެ ޗެމްޕިއަންކަން، މީގެ ކުރިން ހޯދާފައިވާ ޓިއުނީޝިއާ އަތުން 1-0 ނެމީބިއާ މޮޅުވެއްޖެ އެވެ.
މިއީ ނެމީބިއާ އިން މި މުބާރާތުގެ ތާރީހުގައި ހޯދި ފުރަތަމަ މޮޅެވެ. މީގެ ކުރިން ތިން ފަހަރު އެފްރިކަން ކަޕްގައި ކުޅެ ނިންމާލަން ޖެހުނީ މޮޅެއް ނުލިބި އެވެ. ދުނިޔޭގެ ރޭންކިންގައި ނެމީބިއާ އޮތީ ޓިއުނީޝިއާ އަށް ވުރެ 87 ދަރަޖަ ފަހަތުގަ އެވެ.
ޓިއުނީޝިއާ އިން 2004 ވަނަ އަހަރުގެ އެފްރިކަން ކަޕް ޗެމްޕިއަންކަން ހޯދިއިރު، މި ފަހުން މުބާރާތްތަކުގައި އެ ޓީމަށް އެކަށޭނެ ނަތީޖާތަކެއް ނުނެރެވުނެވެ. މި ފަހަރުގެ މުބާރާތް ވެސް ފަށަން ޖެހިފައި މި ވަނީ ދަށްކޮށެެވެ.
ނެމީބިއާ އަށް ރޭގެ މެޗުގައި ފެނިގެންދިޔަ ހަމައެކަނި ގޯލު މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައި ވަނިކޮށް ކާމިޔާބުކޮށްދިނީ ޑިއޯން ހޮއްޓޯ ބޮލުންނެވެ. މި މެޗުގައި ލަނޑު ޖަހާނެ ފުރުސަތުތައް ޓިއުނީޝިއާ އަށް ލިބުނު ނަމަވެސް ބޭނުމެއް ނުކުރެވުނެވެ.
މި ގްރޫޕްގެ އަނެއް މެޗުން، މާލީ އިން ވަނީ 2-0 އިން ދެކުނު އެފްރިކާ ބަލިކޮށްފަ އެވެ. މާލީގެ ގޯލުތައް ޖެހީ، ހަމާރީ ޓްރައޯރޭ އާއި ލަސީން ސިނަޔޯކޯ އެވެ.
މި ފަހަރުގެ އެފްރިކަން ކަޕްގައި ވަރުގަދަ ޓީމުތަކަށް ފެށުން ދިޔައީ އެންމެ ބޭނުންވި ގޮތަކަށް ނޫނެވެ. ގްރޫޕް އޭގައި ނައިޖީިރިއާ ވަނީ 1-1 އިން އިކުއޭޓްރަލް ގިނީއާ އެއްވަރުވެފަ އެެވެ. ގްރޫޕް ބީގައި މިސްރުން ވަނީ މޮޒަމްބީކާ ކުޅެ 2-2 އިން އެއްވަރުވެފަ އެވެ. އެ ގްރޫޕްގައި އޮތް ގާނާ ވަނީ 2-1 އިން ކޭޕް ވާޑް އަތުން ބަލިވެފަ އެވެ. ގްރޫޕް ސީގައި ކެމަރޫން އާއި ގިނީ ކުޅުނު މެޗު 1-1 އިން އެއްވަރުވިއިރު، ގްރޫޕް ޑީގައި އެންގޯލާ އިން ވަނީ 1-1 އިން އަލްޖީރިއާއާ އެއްވަރުކޮށްފަ އެވެ.
