އެމްޕީއެލް އެފްއޭއެމް ދެ ވަނަ ޑިވިޝަން ފުޓުބޯޅަ މުބާރާތުގައި ކުޅުނު ފުރަތަމަ ތިން މެޗުން ވެސް މޮޮޅުވެ، މަސް އޮޑީ ސްޕޯޓްސް ކްލަބް، ބާކީ މެޗެއް އޮއްވައި ކުއާޓާ ފައިނަލުގެ ޖާގައެއް ޔަގީންކޮށްފި އެވެ.
އިއްޔެ ހަވީރު، މަސް އޮޑިން ވަނީ 6-0 އިން ޖޭޖޭ ސްޕޯޓްސް ކްލަބް ބަލިކޮށްފަ އެވެ. މަސް އޮޑިން ފުރަތަމަ ދެ މެޗުން މޮޅުވީ، 4-0 އިންނެވެ. އެއީ މަހިބަދޫ ސްޕޯޓްސް ކްލަބާއި އެލްޓީ ސްޕޯޓްސް ކްލަބް އަތުންނެވެ.
ދެ ވަނަ ޑިވިޝަން ފުޓްބޯޅަ މުބާރާތުގެ، ގްރޫޕް ސްޓޭޖުގެ މެޗުތަކަށް ފަހުު، ކޮންމެ ގްރޫޕަކުން ގަދަ ދެ ޓީމަކަށް ކުއާޓާ ފައިނަލްގެ ފުރުސަތު ދޭއިރު، ކުއާޓާގެ ބާކީ ޖާގަތަށް ދޭނީ ތިން ގްރޫޕުން ތިން ވަނަ އަށް ދާ ޓީމުތަކުގެ ތެރެއިން އެންމެ ރަނގަޅު ދެ ޓީމަކަށެވެ. އެ ގޮތުން، ބަލާއިރު، މަސް އޮޑި އަށް މި ވަނީ ގްރޫޕްގެ ގަދަ ދެ ޖާގައިގެ ތެރެއިން ކުއާޓާ ކަށަވަރުވެފަ އެވެ.
ގްރޫޕް އޭގައި މަސް އޮޑި އަށް ބާކީ އޮތީ ކުޑަހެންވޭރު ޔުނައިޓެޑާ ކުޅޭ މެޗެވެ. މިއީ، ގްރޫޕްގެ އެއް ވަނަ ކަށަވަރުުކުރަން ބަލާއިރު، މަސް އޮޑި އަށް މުހިންމު މެޗެކެވެ. ކުޑަހެންވޭރުން ވަނީ ކުޅުނު ފުރަތަމަ ދެ މެޗުން މޮޅުވެފަ އެވެ.
މަސް އޮޑި ޓީމުގެ ކުޅުންތެރިން ލަނޑެއް ޖެހުމަށް ފަހު އުފާފާޅުކުރަނީ.--- ފޮޓޯ: އަބްދުﷲ އިޔާން/ އަދަދު
މަސް އޮޑި އަށް އިއްޔެގެ މެޗުގައި ފުރަތަމަ ގޯލު ޖަހައިދިނީ ފުރަތަމަ ހާފުގެ އިތުރު ވަގުތުގައި، އައްޒާމް އަބްދުﷲ (އެޑޫ) އެވެ. ކުރިން ޒުވާން ގައުމީ ޓީމުގެ ކެޕްޓަންކަން ކުރި އެޑޫ އަންނަނީ ދެ ވަނަ ޑިވިޝަނުގައި މޮޅު ކުޅުމެއް ދައްކަމުންނެވެ. އެ ގޮތުން، މި ލަނޑު ޖެހީ އަލީ ޝާމިސް (ތޮއްޕޭ) ދިން ބޯޅައަކުން އޭރިއާ ބޭރުން ގޯލުގެ ތިރީ ކަނަށް ބޯޅަ ފޮނުވާލައިގެންނެވެ.
މަސް އޮޑިން ދެ ވަނަ ގޯލު ޖެހީ، 51 ވަނަ މިނިޓްގަ އެވެ. މި ލަނޑު ޖެހީ، އިބްރާހިމް ވަހީދު ހުސެއިން (އިއްބެ) އެވެ، މިއީ އޭރިއާތެެރެއަށް އައި ބޯޅައެއްގައި ބޮލުން ޖެހި ގޯލެކެވެ. އަދި މެޗުގެ 62 ވަނަ މިނިޓްގައި، މަސް އޮޑީގެ ތިން ވަނަ ލަނޑު ޖެހީ ވެސް އިއްބެ އެވެ. އިއްބެ މި ލަނޑު ޖެހީ ތޮއްޕޭ ނެގި ކޯނަރަކުން ބޮލުންނެވެ.
ތޮއްޕޭ، މަސްއޮޑި އަށް ހަތަރު ވަނަ ގޯލު ޖަހައިދިނީ 76 ވަަނަ މިނިޓްގަ އެވެ. މިއީ އިއްބެ ދިން ބޯޅައަކުން ހަމަޖެހިލައިފައި، ގޯލުގެ ކައިރީ ކަނަށް ބޯޅަ ފޮނުވާލައިގެން ތޮއްޕޭ ޖެހި ގޯލެކެވެ. އޭގެ މިނިޓެއް ފަހުން، އެ ޓީމުގެ ފަސް ވަނަ ގޯލު ޖަހައިދިނީ ޖަހޯނޯވް ސަރުދޯރް އެވެ. މިއީ ތޮއްޕޭ ދިން ބޯޅައަކުން ގޯލުގެ ކަނަށް ބޯޅަ ފޮނުވާލައިގެން ސަރްދޯރް ޖެހި ލަނޑެކެވެ.
މެޗުގެ އިތުރު ވަގުތުގައި މަސް އޮޑީ ޓީމުގެ ފަހު ލަނޑު ޖަހައިދިނީ ފީލިކްސް ޗީޑި އެވެ.
މުބާރާތުގައި މިއަދު ކުޅޭ މެޗުގައި ބީޖީ ސްޕޯޓްސް ކްލަބުން ނުކުންނާނީ ދަ ގްރާންޑޭ ސްޕޯޓްސް ކްލަބާ ދެކޮޅަށެެވެ.
