އިދިކޮޅު ފަރާތްތަކުން ތުހުމަތު ކުރަމުންދާ ގޮތަށް، ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި، އެ ގައުމާއެކު ހދ. މަކުނުދޫ ހިމެނޭ އެއްވެސް އެއްބަސްވުމެއްގައި ސޮއިކޮށްފައިނުވާނެ ކަމަށް ސަރުކާރުން ބުނެފި އެވެ.
މަކުނުދޫއާ ގުޅޭ އަސްކަރީ އެއްބަސްވުމެއްގެ ވާހަކަ އެންމެ ފުރަތަމަ ދެކެވެން ފެށީ ސޯޝަލް މީޑިއާގަ އެވެ. އެއަށްފަހު މި މަހުގެ 11 ގައި އިދިކޮޅު އެމްޑީޕީއިން ބޭއްވި ޖަލްސާއެއްގައި އެ ޕާޓީގެ ޗެއާޕާސަން ފައްޔާޒު އިސްމާއިލް ތުހުމަތުކުރެއްވީ ޗައިނާއާ އެކު ސޮއިކުރީ 20 އެމްއޯޔޫގައި ކަމަށް ސަރުކާރުން ބުނި ނަމަވެސް 30 އެއްބަސްވުމެއްގައި ސޮއިކުރި ކަމަށެެވެ. އޭނާ ތުހުމަތުކުރެއްވި ގޮތުގައި ހދ. މަކުނުދުއާ ގުޅޭ އެއްބަސްވުމެއް އޭގެ ތެރޭގައި ހިމެނެ އެވެ.
"އަޅުގަނޑުމެންގެ ރައްޔިތުން އެނގެން ބޭނުންވޭ މަކުނުދޫ އާއި ބެހޭ ގޮތުން ސޮއިކުރެއްވީ ކޯއްޗެއްތޯ ޗައިނާއާ އެކު. އަޅުގަނޑުމެން ބަލަން ބޭނުންވޭ ފުށިދިއްގަރަށް ބޮޑުތިލަދުންމަތީގެ އެންމެން ގެނެސް އަޅާލައިފައި މަކުނުދޫ ހިސާބު ކޮންބަޔަަކަށް ދޭން، ކީއްކުރަައްވަންތޯ އުޅެނީ،" ފައްޔާޒް އެރޭ ވިދާޅުވި އެވެ.
ފައްޔާޒުގެ އެ ތުހުމަތާ ގުޅިގެން ސުވާލު ކުރުމުން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ވިދާޅުވީ، ޗައިނާއާއެކު ވެވުނު ކޮންމެ އެގްރީމެންޓެއްގެވެސް އަމާޒަކީ ދިވެހިންނާއި ދިވެހިރާއްޖޭގެ ކުރިއެރުން ކަމަށެވެ.
"ވަކި ބަޔަކަށް ވަކި ރަށަކަށް ހާއްސަކުރެވިގެން އެއްވެސް އެގްރީމެންޓެއް ނުކުރެވޭ" ހަލީލު ވިދާޅުވި އެވެ.
މަކުނުދޫއާ ގުޅޭގޮތުން އެއްބަސްވުމެއް ނެތް ކަމަށް ހަލީލު ވިދާޅުވި ނަމަވެސް ރައީސްގެ ދަތުރުފުޅުގެ ތެރެއިން ޑިފެންސް މިނިސްޓަރު ގައްސާނު މައުމޫނު ސޮއިކުރެއްވީ ކޮން އެއްބަސްވުމެއްގައިކަން ސާފުކޮށެއް ނުދެއްވަ އެވެ.
ވިދާޅުވީ އެއްބަސްވުންތަކުގެ ތަފުސީލު ސަރުކާރުން ހާމަ ކުރާނެ ކަމަށާއި ރައީސް ނޫސްވެރިންނާ ބައްދަލުކުރައްވާނެ ކަމަށެވެ. ނަމަވެސް އެ ތަފުސީލުތައް ހާމަކުރާނީ ކޮން އިރަކު ކަމެއް އޭނާ ވިދާޅެއް ނުވެ އެވެ.
