ނެޝަނަލް އެތުލީޓުންނަށް ހަފްތާއަކު ތިން ދުވަހު ތެރަޕީ ނެގޭނެ ގޮތް ހަދައިފި އެވެ.
މިކަން އިއުލާނު ކުރީ މިރޭ ސޯޝަލް ސެންޓަރުގައި ބޭއްވި ގައުމީ އަދި ބައިނަލްއަގްވާމީ ކުޅިވަރު މުބާރާތްތައް ބާއްވާ ތަންތަނުގައި ހުރުން ލާޒިމު ސިއްހީ ހިދުމަތްތައް އެކުލަވާލުމުގެ ރަސްމިއްޔާތުގައި ވާހަކަ ދައްކަވަމުން ސްޕޯޓްސް މިނިސްޓަރު އަބްދުالله ރާފިއު އެވެ.
މިނިސްޓަރު ރާފިއު ވިދާޅުވީ ކުޅިވަރު ކުޅޭ ތަންތަނުގައި ހުންނަން ލާޒިމު ސިއްހީ ހިދުމަތްތައް ގާއިމު ކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެއް ކަމަށާއި, އެ ވައުދުފުޅު މިރޭ ފުދިގެން ދާ ކަމަށެވެ.
"މި ހިދުމަތް ސިންދަފާތު ކުރުމަޓަށްކައި މި މިންގަނޑު އެކުލަވާލުމުގެ އިތުރުން އެއް ގިޔަރު އިތުރަށް ޖައްސާލާފައި. އެއީ މިއަދުން ފެށިގެން އެކަން އަމަލީ ގޮތުން ކުރެވޭނެ ގޮތް ވެސް ރައީސް މުއިއްޒު ހަމަޖައްސަވައިދެއްވާފައި ވާތީ،" މިނިސްޓަރު ވިދާޅުވި އެވެ.
މިނިސްޓަރު ރާފިއު ވިދާޅުވީ ކުޅިވަރު ކުޅޭ ސްޓޭޑިއަމްތަކުގައި މެޑިކަލް ރޫމް ހެދި, އެތަންތަނަށް ބޭނުންވާ އާލާތްތައް ފުރިހަމަ ކުރެވިފައިވާ ކަމަށެވެ. އަދި އެ ފެސިލިޓީތަކުގައި ބޭނުންވާ ފަސްޓް ދޭނެ މީހުން ވެސް ތަމްރީނުކޮށްފައިވާ ކަމަށް ރާފިއު ވިދާޅުވި އެވެ.
"ނެޝަނަލް އެތްލީޓުންނަށް ހަފްތާއަކު ތިން ދުވަހު ތެރަޕީ ނެގޭނެ ގޮތް ވެސް މާދަމައިން ފެށިގެން ހަމަޖެހިގެން ދާނެ،" މިނިސްޓަރު ވިދާޅުވި އެވެ.
މީގެ އިތުރުން މި ހިދުމަތްތަކަށް ހާއްސަ ވެބްސައިޓެއް ވެސް މާދަމާ އިފްތިތާހު ކުރުމަށް ހަމަޖެހިފައި ވާއިރު އެތްލީޓުންގެ ތެރަޕީއަށް އެޕްލިކޭޝަނެއް މެދުވެރިކޮށް އެޕޮއިންޓްމަންޓް ހެދޭނެ އިންތިޒާމު މި ހަފްތާގައި ތައާރަފު ކުރާނެ ކަމަށް ވެސް އޭނާ ވިދާޅުވި އެވެ.
"މި އަސާސީ ހިދުމަތަކީ ކުޅިވަރު ކުރިއެރުވުމަށް މި ސަރުކާރުން ވިސްނުންތެރިކަމާއެކު ކުޅިވަރު ކުޅޭ ފަރާތްތަކުގެ ހުރިހާ ބޭނުންތަކެއް ދެނެގަނެ, އެކަންކަމަށް އަވަސް ހައްލެއް ހޯދުމަށް ކުރާ މަސައްކަތްތަކުގެ އަލިގަދަ ހެއްކެއް،" ރާފިއު ވިދާޅުވި އެވެ.
އޭނާ ވިދާޅުވި ގޮތުގައ މިއަދު ތައާރަފުކުރި ހިދުމަތަކީ ބޭނުންޖެހި, ނަމަވެސް ކުރިން އާޅާނުލެވި އޮތް ކަމެކެވެ. އަދި އެ ހިދުމަތުގެ ސަބަބުން ކުޅިވަރު ދާއިރާއިން ބޮޑު އިންގިލާބީ ބަދަލެއް ފެނިގެން ދާނެ އެވެ.
