ރައްޔިތުންގެ މަޖިލީހުގެ ރައީސް މުހައްމަދު އަސްލަމް, ރަސްމީ ދަތުރެއްގައި މިއަދު ސްރީލަންކާއަށް ފުރާވަޑައިގެންފި އެވެ.
އަސްލަމް ސްރީލަންކާއަށް ވަޑައިގެންނެވީ އެގައުމުގެ ގާނޫނު ހަދާ މަޖިލީހުގެ ރައީސްގެ މަހިންދަ ޔަޕަ އަބޭވަރްދޭނާގެ ދައުވަތަކަށެވެ. މިއީ މިއަދުން ފެށިގެން މިމަހުގެ 19 ވަނަ ދުވަހުގެ ނިޔަލަށް ކުރައްވާ ދަތުރުފުޅެކެވެ.
ރައްޔިތުންގެ މަޖިލީހުގެ އިދާރާއިން ބުނި ގޮތުގައި އަސްލަމްގެ މި ދަތުރުގައި ލަންކާގެ ގާނޫނު ހަދާ މަޖިލީހަށް ޒިޔާރަތްކުރައްވާ, އެތަނުގެ ވެރިންނާ ބައްދަލުކުރައްވާ ގާނޫނު ހަދާ މަޖިލީހުގެ މަސައްކަތް ބައްލަވާލައްވާނެ އެވެ.
އެ ދަތުރުގައި ތެރެއިން ލަންކާގެ ހާރިޖީ ވަޒީރާއި ސަރުކާރުގެ ބައެއް އިސްވެރިންނާ ވެސް މަޖިލީހުގެ ރައީސް ބައްދަލު ކުރައްވާނެ ކަމަށް އެ އިދާރާއިން ބުނެ އެވެ.
އެ ދަތުރުގައި މަޖިލީހުގެ ރައީސްގެ އަރިހުގައި ހުޅުމާލޭ ދާއިރާގެ މެންބަރު އަލީ ނިޔާޒާއި ހެންވޭރު ދެކުނު ދާއިރާގެ މެންބަރު ހުސައިން ޝަހީމް އާއި މެދު ހެންވޭރު ދާއިރާގެ މެންބަރު އަލީ އާޒިމްގެ އިތުރުން މަޖިލީހުގެ އަމީންއާންމު ފާތިމަތު ނިއުޝާ ވެސް ބައިވެރިވެވަޑައިގަންނަވެ އެވެ.
