"ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ގެ މެޗުތައް މިރޭ ފެށިގެންދާއިރު, ކުޅެން ހަމަޖެހިފައިވަނީ ހއ. އަދި ގއ. އަތޮޅުގެ މެޗުތަކެވެ.
މި މުބާރާތުގައި މި ފަހަރު ޖުމްލަ 129 ޓީމު ވާދަކުރާއިރު, 300 އަށް ވުރެ ގިނަ މެޗު މި އަހަރުގެ މުބާރާތުގައި ކުޅޭނެ އެވެ.
މިރޭ ކުޅޭ ފުރަތަމަ މެޗުގައި ގްރައުންޑް އެކެއްގައި ބައްދަލުކުރާނީ ހއ. މާރަންދޫ އަދި ހއ ފިއްލަދޫ އެވެ. އަދި ގްރައުންޑް ދޭއްގައި ހއ. އިހަވަންދޫ އާއި ހއ މުރައިދޫ ކުޅޭނެ އެވެ. މި މެޗުތައް ފަށާނީ 20:00 ގަ އެވެ.
މީގެ އިތުރުން މިރޭ ހއ. ކެލާ ނުކުންނާނީ ހއ. ބާރަށާއި ދެކޮޅަށެވެ. އަދި ހއ. އުތީމުން ނުކުންނާނީ ހއ. ތުރާކުނާ ދެކޮޅަށެވެ. މި މެޗުތައް ކުޅޭނީ މިރޭ 21:00 ގަ އެވެ.
ހއ. އަތޮޅުގެ ހޯރަފުށިން ނުކުންނާނީ ހއ. ތަކަންދޫއާ ދެކޮޅަށެވެ. އަދި ހއ. ދިއްދޫ އިން ނުކުންނަނީ އެ އަތޮޅު ވަށަފަރާ ދެކޮޅަށެވެ. މި މެޗުތައް ކުޅޭނީ 22:00 ގަ އެވެ.
ހއ. އަތޮޅުން މި މުބާރާތުގައި 12 ޓީމު ވާދަކުރާއިރު, އެ އަތޮޅުގެ ޓީމުތައް ވަނީ ތިން ގްރޫޕަކަށް ބަހާލާފަ އެވެ.
މިރޭގެ ފަހު މެޗުތަކުގައި ކުޅޭނީ ގއ އަތޮޅުގެ ޓީމުތަކެވެ. އެގޮތުން ގއ. ގެ ފުރަތަމަ މެޗުގައި ބައްދަލުކުރާނީ ގއ. ގެމަނަފުށި އަދި ގއ. ދާންދޫ އެވެ. އަދި ދެވަނަ މެޗުގައި އެންމެ ފަހުގެ އެ އަތޮޅު ޗެމްޕިއަން މާމެންދޫ ނުކުންނާނީ ގއ. ނިލަންދޫއާ ދެކޮޅަށެވެ.
މި ފަހަރުގެ، ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 މުބާރާތް ފަށާނީ މާދަމާ ރޭ އެވެ. "ގޯލްޑަން ފުޓްސަލް ޗެލެންޖް 2024" މުބާރާތުގަައި 129 ޓީމު ވާދަކުރާނެ އެވެ. އެ ގޮތުން، 320 މެޗު ކުޅޭ ގޮތަށް ހަމަޖެހިފައިވާއިރު، ކުރިއަށް އޮތް މުބާރާތުގައި ރާއްޖޭގެ ހުރިހާ އަތޮޅުން ޓީމުތައް ވާދަކުރާނެ އެވެ. މީގެ ކުރިން، ވ އަތޮޅާއި ނ. އަތޮޅުން މެޗުތަކެއް ނުފެނުނު ނަމަވެސް ކުރިއަށް އޮތް މުބާރާތުގައި އެ އަތޮޅުތަކުގެ މެޗުތައް ވެސް ކުރިއަށްދާނެ އެވެ.
