އަބީޖާން، އައިވަރީ ކޯސްޓް (ޖެނުއަރީ 15) - އައިވަރީ ކޯސްޓްގައި މި ފަހަރު ކުރިއަށްދާ އެފްރިކަން ކަޕް އޮފް ނޭޝަންސްގެ ޗެމްޕިއަނުންނަށް ދޭ ފައިސާގެ އިނާމް ކުރިން ފަހަރަށް ވުރެ ބޮޑުކޮށްފައިވާ ކަމަށް ކޮންފެޑެރޭޝަން އޮފް އެފްރިކަން ފުޓްބޯލް (ކާފް) އިން ބުނެފި އެވެ.
ކެމަރޫންގައި 2021 ވަނަ އަހަރު ބޭއްވި އެފްރިކަން ކަޕްގެ ޗެމްޕިއަންކަން ހޯދި ސެނެގާލް އަށް ދީފައިވަނީ ފަސް މިލިއަން ޑޮލަރެވެ. ރަނަރަޕަށް ދިޔަ މިސްރު ޓީމަށް 2.5 މިލިއަން ޑޮލަރު ދިނެވެ.
ކާފް އިން މި ފަހަރުގެ އެފްރިކަން ކަޕްގެ އިނާމް ފައިސާ އަށް ހަމަޖައްސާފައިވަނީ 14.8 މިލިއަން ޑޮލަރުގެ ބަޖެޓެކެވެ. އެ ގޮތުން، ޗެމްޕިއަނުންނަށް މި ފަހަރު، ހަތް މިލިއަން ޑޮލަރުގެ އިނާމް ފައިސާއެއް ދޭއިރު، މިއީ 40 ޕަސެންޓް ކުރިއެރުމެކެވެ. ރަނަރަަޕަށް ދާ ޓީމަކަށް، މި ފަހަރު، 4 މިލިއަން ޑޮލަރު ދޭނެ އެވެ.
މީގެ އިތުރުން، ސެމީ ފައިނަލަށް ދަތުރުކޮށް ބަލިވާ ޓީމަކަށް މި ފަހަރު، 2.5 މިލިއަން ޑޮލަރު ދޭނެ އެވެ. މީގެ ކުރިން ލިބުނީ 2.2 މިލިއަން ޑޮލަރެވެ. މި ފަހަރު ކުއާޓާ ފައިނަލަށް ދަތުރުކުރާ ޓީމަކަށް ވެސް މަދުވެގެން، 1.3 މިލިއަން ޑޮލަރު ކަށަވަރުކުރެވޭނެ އެވެ.
އެފްރިކަން ކަޕްގައި ރޭ .މިސްރު ކުޅުނު މެޗުގައި އިތުރު ވަގުތު މުހައްމަދު ސަލާހު ޖެހި ޕެނަލްޓީން ވަނީ މޮޒަމްބީކްއާ 2-2 އިން އެއްވަރުވެފަ އެވެ. ނައިޖީރިއާ އާއި އިކުއޭޓްރަލް ގިނީ ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ. މި ގްރޫޕްގައި ފުރަތަމަ މެޗުން، އައިވަރީ ކޯސްޓުން ވަނީ 2-0 އިން ގިނީ ބިސޯ ބަލިކޮށްފަ އެވެ.
މި ފަަހަރު ބާއްވާ ޔޫރޯ ފުޓްބޯޅަ މުބާރާތުގެ ޗެމްޕިއަންކަން ހޯދާ ޓީމެއް ހުރިހާ މެޗަކުން މޮޅުވެއްޖެނަމަ، 31 މިލިއަން ޑޮލަރު ލިބޭނެ އެވެ. އަދި ރަނަރަޕަށް 28 މިލިއަން ޑޮލަރު ހޯދުމުގެ ފުރުސަތު އެބައޮތެވެ. މިއީ ބައްރެއްގެ މުބާރާތެއްގައި ލިބޭ އެންމެ ބޮޑު އިނާމް ފައިސާ އެވެ.
ދެކުނު އެމެރިކާގެ ގައުމުތަކަށް ބާއްވާ ކޮޕަ އެމެރިކާ ފުޓްބޯޅަ މުބާރާތުގެ ޗެމްޕިއަންކަން މި ފަހަރު ހޯދާ ޓީމަކަށް، 10 މިލިއަން ޑޮލަރުގެ އިނާމް ފައިސާއެއް ހަމަޖައްސާފައިވާއިރު، ރަނަރަޕަށް ލިބޭނީ، ފަސް މިލިއަން ޑޮލަރެވެ. މިހާރު، ގަތަރުގައި ކުރިއަށްދާ އޭޝިއަން ކަޕްގެ ޗެމްޕިއަން ޓީމަށް ދޭނީ ފަސް މިލިއަން ޑޮލަރެވެ. އަދި ރަނަރަޕަށް ތިން މިލިއަން ޑޮލަރު ދޭނެކަމަށް ވަނީ އިއުލާނުކޮށްފަ އެވެ.
