ދިވެހި ގައުމުގެ އެންމެ ވެލިފުކަކަށްވެސް ގެއްލުންވާފަ އެއްބަސްވުމެއްގައި ނިމިދިޔަ އެމްޑީޕީގެ ސަރުކާރުން އިންޑިއާއާއެކު ސޮއިކޮށްފާ ނުވާނެ ކަމަށާއި އެއްބަސްވުންތައް ހާމަކުރަން ނުކުރޭ ސަބަބަކީވެސް އެއީ ކަމަށް ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
މާލޭ މޭޔަރު ކެމްޕޭނުގެ ތެރެއިން މިރޭ ބޭއްވި ޖަލްސާއެއްގައި ވާހަކަދައްކަވަމުން ޝާހިދު އިތުރަށް ވިދާޅުވީ، ޕީއެންސީއިން ރިޔާސީ ކެމްޕޭނުގައި އިންޑިއާއާއެކު އޭރުގެ ސަރުކާރުން ގައުމަށް ގެއްލުންވާފަދަ އެއްބަސްވުންތަކެއް ހަދާފައިވާ ކަމަށް ބުނި ނަމަވެސް ވެރިކަން ލިބުމުން އެ އެއްބަސްވުންތައް ހާމަކޮށްފައި ނުވާ ކަމަށެވެ.
"ރައްޔިތުންގެ ހިތުގައި ބިރުވެރިކަން އިތުރު ކުރުމަށްޓަކާ ދެން ވިދާޅުވި ވާހަކައަކީ ސަތޭކަ އެތައް އެގްރީމެންޓެއް އެބައޮތޭ އިންޑިއާއާ އެކީގައި ވެފަ، އޭގަ އެބަހުއްޓޭ އެތައް މާއްދާތަކެއް، މިނިވަންކަމާއި ސިޔާދަތައް ގެއްލުން ލިބޭ، އެހެންވީމަ އެ އެއްޗެހި މި ދަނީ ދިރާސާ ކުރަމުންނޭ"
އެގްރީމެންޓުތައް "ދިރާސާ" ކުރުމުގެ ސްޕީޑާ ބެހޭގޮތުން ޝާހިދު ވަނީ ސަރުކާރަށް މިވީ 55 ދުވަސް ތެރޭގައި ދުވާލަކު ދެ އެގްރީމެންޓު ކިޔާލި ނަމަވެސް އެ މާއްދާތައް މިހާރު ދިރާސާ ވެފައިވާނެ ކަމަށް ވިދާޅުވެ މަލާމާތުގެ ރާގެއްގައި ފާޑުވިދާޅުވެފަ އެވެ.
"ނޯންނާނެއޭ، މި ދިވެހިރާއްޖޭގެ އެންމެ ވެލިފުކަކަށްވެސް، އެންމެ ވެލިފުކަކަށްވެސް ގެއްލުން ލިބިދާފަދަ އެގްރީމެންޓެއް އެމްޑީޕީގެ ސަރުކާރުގަ، ރައީސް އިބްރާހިމް މުހައްމަދު ސޯލިހުގެ ސަރުކާރުގެ ވެވަޑައިގެންފައެއް ނޯންނާނެ" ޝާހިދު ވިދާޅުވި އެވެ.
އެމްޑީޕީގެ ސަރުކާރުން އިންޑިއާއެކު 100 އަށްވުރެ ގިނަ އެއްބަސްވުން ހަދާފައިވާ ކަމަށް ރައީސް އޮފީހުގެ އަންޑާ ސެކެރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް ވިދާޅުވީ މި ސަރުކާރުގެ ދެވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގަ އެވެ.
"މި އަދަދުގެ ތެރޭގައި އަޅުގަނޑު މި ފާހަގަ ކުރަނީ ޕްރޮޖެކްޓުތައް ހިންގުމަށް ވެވިފައި ހުރި އެއްބަސްވުންތައް ނުހިމަނައި، ޕްރޮޖެކްޓުތައް ހިންގަން ވެވިފައި ހުރި އެއްބަސްވުންތައް ނުހިމަނައި 100 އަށްވުރެ ގިން އެއްބަސްވުން އިންޑިއާއާ އެކު ވެވިފައިވޭ މި ވޭތުވެދިޔަ ފަސް އަހަރުގެ ތެރޭގައި، ދެން މިއީ ވަރަށް ބޮޑު އަދަދެއް ކަން ފާހަގަ ކޮށްލަން،" ފިރުޒުލް އެ ދުވަހު ވިދާޅުވި އެވެ.
މިހާތަނަށް އިންޑިއާއާއެކު ކުރީގެ ސަރުކާރުން ހެދި ހައިޑޮގްރަފީ އެއްބަސްވުން އާނުކުރުން ފިޔަވާ އެއްބަސްވުންތަކާ ބެހޭ އެއްވެސް ފިޔަވަޅެއް މި ސަރުކާރުން އަޅާފައެއް ނުވެ އެވެ. އާނުކުރާން ނިންމި އެއްބަސްވުންވެސް މިހާތަނަށް ހާމަކޮށްފައެއް ނުވެ އެވެ.
