ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024 ގެ ޕާޓްނަރަކަށް ލައިފް ސަޕޯޓް ހަމަޖައްސައިފި އެވެ.
މި މަހުގެ 14 ވަނަ ދުވަހު ފަށާ ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތުގެ އެންމެ ފަހުގެ ތައްޔާރީތައް މިހާރު އަންނަނީ ވަމުންނެވެ. އެގޮތުން ގޯލްޑަން އިން ވަނީ މިއަހަރުގެ މުބާރާތުގެ ސްޕޮންސަރުންނާއެކު ސޮއި ކޮށްފަ އެވެ.
އިއްޔެ ކުރިއަށްދިޔަ ރަސްމިއްޔާތެއްގައި ލައިފް ސަޕޯޓްގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު، އަބްދުﷲ ޖާވިދު އެވެ. ގޯލްޑަންގެ ފަރާތުން މި އެއްބަސްވުމުގައި ސޮއި ކުރެއްވީ ގޯލްޑަން ފުޓްސަލް އެސޯސިއޭޝަނުގެ ނައިބު ރައީސް އަހުމަދު ޝަހީމް އެވެ.
ލައިފް ސަޕޯޓަކީ ފުޅާ ދާއިރާއަކަށް ރާއްޖޭގައި ސިއްހީ ހިދުމަތް ފޯރުކޮށްދެމުން އަންނަ ކުންފުންޏެކެވެ. މިއީ ގޯލްޑަން ފުޓްސަލް ޗެލެންޖު މުބާރާތުގެ ޕާޓްނަރެއްގެ ގޮތުގައި ލައިފް ސަޕޯޓް މަސައްކަތް ކުރާނެ ފުރަތަމަ ފަހަރެވެ.
މި މަހު ފަށާ "ގޯލްޑަން ފުޓްސަލް ޗެލެންޖް 2024" މުބާރާތުގަައި 129 ޓީމު ވާދަކުރާނެ އެވެ. އެ ގޮތުން، 320 މެޗު ކުޅޭ ގޮތަށް ހަމަޖެހިފައިވާއިރު، ކުރިއަށް އޮތް މުބާރާތުގައި ރާއްޖޭގެ ހުރިހާ އަތޮޅުން ޓީމުތައް ވާދަކުރާނެ އެވެ. މީގެ ކުރިން، ވ އަތޮޅާއި ނ. އަތޮޅުން މެޗުތަކެއް ނުފެނުނު ނަމަވެސް ކުރިއަށް އޮތް މުބާރާތުގައި އެ އަތޮޅުތަކުގެ މެޗުތައް ވެސް ކުރިއަށްދާނެ އެވެ. ގޯލްޑަން ފުޓްސަލް ޗެލެންޖް ފެށުން އޮތީ ޗެރިޓީ ޝީލްޑް މެޗަކުންނެވެ. މިހާރު ޝެޑިއުލްކޮށްފައިވާ ގޮތުން، ޗެރިޓީ އަށް ކުޅޭ އެ މެޗުގައި އަންނަ މަހު 14 ވަނަ ދުވަހު ބައްދަލުކުރާނީ އެންމެ ފަހުގެ ދެ ޗެމްޕިއަނުން ކަމަށްވާ ތ. ތިމަރަފުށްޓާއި ލ. ގަން އެވެ.
މި މުބާރާތުގެ ޓައިޓަލް ސްޕޮންސަރަކީ ސޮނީ ސްޕޯޓްސް އެވެ. މީޑިއާ ޕާޓްނަރަކަށް ވަން ސްޕޯޓްސް ހަމަޖައްސާފައިވާއިރު، މީޑިއާ/ޕަބްލިކް ރިލޭޝަން (ޕީއާރް) ޕާޓްނަރެއްގެ ގޮތުގައި "އަދަދު" އިން މި ފަހަރު ވެސް މަސައްކަތް ކުރާނެ އެވެ.
މީގެ އިތުރުން ފޮޓޯގްރަފީ ޕާޓްނަރެއްގެ ގޮތުގައި އިމޭޖަސް މަސައްކަތް ކުރާއިރު, އޮފިޝަލް ޖާޒީ ޕާޓްރަކީ ޖާޒިއާ އެވެ.
