ލަންކާގެ ކަނޑުގެ ސަރަހައްދަށް ޗައިނާގެ ރިސާޗު އުޅަނދުތައް ވަނުން އެ ގައުމުގެ ސަރުކާރުން އެއް އަހަރު ދުވަހުގެ މުއްދަތަށް މަނާކޮށްފި އެވެ.
ޗައިނާ އާއި ލަންކާއާ ދެމެދު ވެފައިވާ އެއްބަސްވުންތަކުގެ ދަށުން ދިރާސާތައް ކުރިއަށްގެންދިޔުމަށް ރިސާޗު އުޅަނދުތައް މިދިޔަ އަހަރުތަކުގެ ތެރޭގައި ކޮލަމްބޯގައި ބަނދަރުކުރި އެވެ.
އެކަމަކު އެކަމާ ގުޅިގެން އިންޑިއާގެ ކަންބޮޑުވުން އަބަދުވެސް އޮވެ އެވެ. އިންޑިއާއިން ދެކޭ ގޮތުގައި މި އުޅަނދުތަކަކީ އެ ސަރަހައްދު މޮނީޓާ ކުރުމަށް ދިރާސާ ކުރުމުގެ ނަމުގައި ދަތުރުކުރާ އުޅަނދުތަކެކެވެ.
ލަންކާ އޮންނަނީ ދުނިޔޭގެ އެންމެ ބާރުބޮޑު އެއް ޝިޕިން ރޫޓުގައި ކަމަށްވާއިރު އެ ސަރަހައްދުގައި ޗައިނާގެ ބާރުގަދަ ކުރުމަށް އެ ގައުމުން ދަނީ މަސައްކަތް ކުރަމުންނެވެ.
އެޕްރީލް 2022, ގައި ލަންކާގެ މުޅި އިގްތިސާދު ފުނޑިގެންދިޔުމުގެ ކުރިން އެ ގައުމުން ޗައިނާއިން ގިނަ އަދަދެއްގެ ލޯނުތައް ނެގި އެވެ. ލަންކާގެ ދަރަނީގެ ޖުމުލަ 10 އިންސައްތައަށްވުރެ ގިނައިން ހިއްސާކުރަނީ ޗައިނާއިން ނަގާފައިވާ ލޯނުތަކެވެ. އޭގެ ތެރެއިން ބައެއް ލޯނުތައް ނުދެއްވި ހަމްބަންޓޯޓާގައި އޮންނަ ބަނދަރު މިހާރު ކޮންޓްރޯލް ކުރަނީ ޗައިނާއިންނެވެ.
އެމެރިކާއިން އަންދާޒާކުރާ ގޮތުގައި 2019 އިން ފެށިގެން ޗައިނާގެ ސައިންޓިފިކް ރިސާޗުގެ 48 އުޅަނދެއް އިންޑިއާ ކަނޑުގެ ސަރަހައްދުގައި ހަރަކާތްތެރިވެފައިވެ އެވެ.
