ޕީއެންސީ/ޕީޕީއެމްގެ "ފިތުނަ އާއި ދޮގުގެ ދޮލަނގު" ވެރިކަމުގެ އެންމެ 52 ދުވަސްތެރޭގައި ކުނިވެ، ނުބައި ވަސް ދުވަން ފަށައިފި ކަމަށް ވިދާޅުވެ، ކުރީގެ ފޮރިން މިނިސްޓަރު އަބްދުﷲ ޝާހިދުގެ ބަހުގެ ހަމަލާތަކެއް ސަރުކާރަށް ފޮނުވާލައިފި އެވެ.
"ބޮލަށް ލައިގެން ހިނގި ފިތުނައިގެ ދޮލަނގުގައި ހުރިއްޔާ ހުރި އެއްޗެއް ކުނިވެ ހަރާބުވެ ފަނި އަޅައި ފަނިފަކުސާއަށް ވެގެން ހިނގެއްޖެ،" މާލޭ ސިޓީގެ މޭޔަރުގެ ބައި އިލެކްޝަނަށް އެމްޑީޕީން ވާދަ ކުރައްވާ އާދަމް އާޒިމުގެ ކެމްޕޭނު ޖަލްސާގައި މިރޭ ވިދާޅުވި އެވެ.
ސަރުކާރުގެ މިހާރު ވެރިން އިދިކޮޅުގައި ތިއްބަވައިގެން ދެއްކެވީ ރާއްޖޭގައި އެތައް ހާސް އިންޑިއާ ސިފައިންނެއް ތިބި ވާހަކަ އާއި އުތުރު ތިލަފަޅުން ވެސް ކޯނދު ލައި އަރާ ވަރަށް ބޭރުގެ ސިފައިން ތިބި ކަމަށެވެ. ނަމަވެސް ވެރިކަމަށް ވަޑައިގެންނެވިތާ 52 ދުވަސް ވެގެން ދިޔައިރު، ރާއްޖޭގައި ތިބި އިންޑިއާ ސިފައިންގެ ސާފު އަދަދު ވިދާޅުވާން ކެރިވަޑައިނުގެންނެވިކަން އޭނާ ފާހަގަ ކުރެއްވި އެވެ.
އެކަން ހާމަކުރަން ކެރިވަޑައިނުގަންނަވަނީ އިދިކޮޅުގައި ތިބެ ފެތުރި ދޮގުން ކަމަށް ޝާހިދު ވިދާޅުވި އެވެ. މި ސަރުކާރުން ފުރަތަމަ ބުނީ ރާއްޖޭގައި ތިބީ 77 އިންޑިއާ ސިފައިން ކަމަށެވެ. އެއަށް ފަހު ފަހު 89 އަށް ބަދަލުވި އެވެ. އެންމެ ފަހުން ބުނީ ރާއްޖޭގައި ތިބީ އިންޑިއާ ސިފައިންގެ 88 ކަމަށެވެ.
"ކީއްވެގެންތޯ ސާފުކޮށް [އިންޑިއާ ސިފައިންގެ އަދަދު] ވިދާޅުނުވިގެން މި އުޅެނީ. މިހާރު ވިދާޅުވާ ވާހަކައަކީ އަދަދު އެއީ އެހާ މުހިއްމު އެއްޗެއް ނޫނޭ. ބަލަ އަދަދަކީ މުހިއްމު އެއްޗެކޭ. ދިވެހިރާއްޖޭގެ ރައްޔިތުންނަށް މުހިއްމު އެއްޗެކޭ. އެއީ ދޮގެއް ވީމަ،" ޝާހިދު ވިދާޅުވި އެވެ.
"ދިވެހިރާއްޔިތުން ކައިރީގައި ސާފު ބަހުން ވިދާޅުވާންވީ ރައީސް އިބްރާހިމް މުހައްމަދު ސޯލިހު ސަރުކާރުން ދައްކަމުދިޔަ ވާހަކައަކީ ތެދޭ. ހަތިޔާރު އެޅި ބޭރުގެ އެއްވެސް މީހަކު ނެތޭ މިރާއްޖެއަކު، ވިދާޅުވާންވީ. އެ ނޫންތޯ ރީތި ގޮތަކީ."
އިންޑިއާއާއެކު 104 އެއްބަސްވުމުން ހަދާފައިވާ ކަމަށް ބުނެފައި ވާއިރު، އެ އެއްބަސްވުން ތަކުން މިނިވަންކަމާއި އިސްތިގުލާލަށް ބުރޫ އަރާ ކަމަށް ވެސް ބުނެފައިވެ އެވެ. އެއީ ހަގީގަތެއް ނަމަ އެކަން ސަރުކާރުން ހާމަ ކުރާނެ ކަމަށް ބުނެފައިވެ އެވެ.
ފޯޅަވައްސާއި ރާއްޖެއާ ދެމެދު އޮތް ކަނޑުގެ ބޮޑު ސަރަހައްދެއް ރައީސް ސޯލިހުގެ ސިޓީއަކުން ދޫކޮށްލި ވާހަކަ މި ސަރުކާރުން ބުނި ނަމަވެސް، މި ވެރިކަމުގައި އާންމުކުރި އެ ސިޓީގައި އޭރު އިދިކޮޅުން ތުހުމަތު ކުރި ވާހަކައެއް ނެތެވެ.
"އަނެއްކާ އަނެއް ކަމަކީ ދިވެހީންގެރާއްޖޭގައި ދިވެހީންގެ ހުރިހާ ކަމެއް ހަވާލު މިކުރައްވަނީ ބޭރު މީހުންނާ. ކޮބައިތޯ ކިޔަވައިގެން ތިއްބެވި ބޭފުޅުން. ކޮބައިތޯ ވަރުވަރުން ސަފު ހަދައިގެން އިންޓަވިއު ދެއްވަން ޕްރެސްއާ ބައްދަލު ކުރެއްވި ފުންނާބު އުސް ވަކީލުން،" ފޯޅަވަހީގެ މައްސަލައަށް އިޝާރާތް ކުރައްވައި ޝާހިދު ވިދާޅުވި އެވެ.
