މި އަހަރު ބާއްވާ 20 ވަނަ ރައްޔިތުންގެ މަޖިލީހުގެ އިންތިހާބުގައި ދަ ޑިމޮކްރެޓްސްގެ ޓިކެޓުގައި ވާދަކުރާނެ ކެންޑިޑޭޓުން ކަނޑައަން ބާއްވާ ޕްރައިމަރީގައި ވާދަކުރަން ބޭނުންވާ ފަރާތްތަކަށް ފުރުސަތު ހުޅުވާލައިފި އެވެ.
ޑިމޮކްރެޓްސް ގެ މަޖިލިސް ޕްރައިމަރީ ބާއްވަން ހަމަޖެހިފައިވަނީ އަންނަ ފެބްރުއަރީ 17، ވަނަ ދުވަހު އެވެ.
އެ ޕާޓީން މިއަދު ނެރުނު ބަޔާނެއްގައި ބުނީ ޕާޓީގެ މަޖިލިސް ޕްރައިމަރީއަށް ކުރިމަތިލިމުށް އެދޭ މެމްބަރުންނަށް އެ ފުރުސަތު، މިއަދުން ފެށިގެން ފެބްރުއަރީ 4، ގެ ހަވީރު 16:00 ނިޔަލަށް ހުޅުވާލާފައިވާ ކަމަށެވެ.
އިއުލާނުގައި ބުނެފައިވާ ގޮތުން މި ޕްރައިމަރީއަށް ކުރިމަތިލުމަށް އެދޭ ޑިމޮކްރެޓްސްގެ މެމްބަރުންނަކީ ފެބްރުއަރީ 4، 2024 ވާ އާދިއްތަ ދުވަހުގެ ހަވީރު 16:00 ނިޔަލަށް އެ ޕާޓީގެ ދަފްތަރުގައި ޖެހިފައިވާ މެމްބަރަކަށް ވާންޖެހޭ އެވެ.
ވާދަ ކުރަން ހުށަހަޅާ މެންބަރުންނަކީ، ގާނޫނުއަސާސީގެ 73 ވަނަ މާއްދާ އާއި ރައްޔިތުންގެ މަޖިލީހުގެ އިންތިހާބުގެ ގާނޫނުގެ އަށް ވަނަ މާއްދާގައިވާ ގޮތުގެމަތިން ރައްޔިތުންގެ މަޖިލީހުގެ އިންތިހާބަށް ކުރިމަތިލާ މީހެއްގެ ކިބައިގައި ހުންނަންޖެހޭ ކަމަށް ބަޔާންކުރާ އެންމެހާ ޝަރުތުތައް ފުރިހަމަ މެމްބަރަކަށް ވާން ޖެހޭނެ ކަމަށް އެ ޕާޓީން ބުންޏެވެ.
އޭގެ އިތުރުން އެ ޕްރައިމަރީގައި ވޯޓު ލެވޭނީ ފެބްރުއަރީ 4، 2024 ވާ އާދިއްތަ ދުވަހުގެ ހަވީރު 16:00 ނިޔަލަށް އެ ޕާޓީގެ ދަފްތަރުގައި ޖެހިފައިވާ މެމްބަރުންނަށް ކަމަށް ވެސް ޑިމޮކްރެޓްސްއިން ބުންޏެވެ.
ޑިމޮކްރެޓްސް އިން ބުނީ ވޯޓު ދިނުމުގެ ހައްގު ލިބޭ މެމްބަރުންގެ ވަގުތީ ލިސްޓް އާންމުކޮށް، ޝަކުވާއަށް ހުޅުވާލެވޭނީ ފެބްރުއަރީ 6، ވާ އަންގާރަ ދުވަހު ކަމަށެވެ. އަދި ޝަކުވާ ހުށަހެޅުމުގެ އެންމެ ފަހު ގަޑިއެއް ކަމަށް ކަނޑައެޅިފައިވަނީ ފެބްރުއަރީ 10، ވަނަ ދުވަހުގެ ހަވީރު 16:00 ކަމަށާއި ވޯޓު ދިނުމުގެ ހައްގު ލިބިގެންވާ މެމްބަރުންގެ ދާއިމީ ލިސްޓް އާއްމުކުރާނީ ފެބްރުއަރީ 11، ވާ އާދިއްތަ ދުވަހު ކަމަށް ވެސް އެ ޕާޓީން ބުންޏެވެ.
