ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން، މާލޭ ރައްޔިތުންނަށް ގޯތި ދިނުމަށް ހިންގި "ބިންވެރިޔާ" ސްކީމުން ގޯތި ލިބުނު ފަރާތްތަކުގެ ތެރެއިން، ރަޖިސްޓަރީ ހަވާލު ނުކުރެވިވާ ފަރާތްތަކަށް އިއްޔެ އިން ފެށިގެން ރަޖިސްޓްރީ އާއި ބިން ހަވާލު ކުރަން ފަށައިފި ކަމަށް ހައުސިން މިނިސްޓްރީން ބުނެފި އެވެ.
އެ މިނިސްޓްރީން އިއްޔެ ކުރި އިއުލާނެއްގައި ބުނީ ގޯތީގެ ރަޖިސްޓްރީއާ ހަވާލުވުމަށް ދާން ޖެހޭ ތަނާއި ހާޒިރުވާން ޖެހޭ ގަޑި ގޯތީގެ ވެރިފަރާތަށް އެސްއެމްއެސް އަކުން އަންގާނެ ކަމަށެވެ.
ކުރީގެ ސަރުކާރުން ދޫކޮށްފައިވާ ގޯތީގެ ރަޖިސްޓްރީއެއްގައި މައްސަލައެއް ހުރިކަން ފާހަގަކުރެވިއްޖެ ނަމަ އެކަން އަންގައިދިނުމަށް ވެސް ހައުސިން މިނިސްޓްރީން އެދިފައިވެ އެވެ.
ބިންވެރިޔާ ސްކީމުން ދޫކޮށްފައިވާ 9000 އަށް ވުރެ ގިނަ ގޯތީގެ ތެރޭގައި ހިމެނެނީ, ހުޅުމާލެއިން ދޫކުރާ 1351 ގޯއްޗާއި, ގުޅީފަޅުން ދޫކުރާ 2,219 ގޯތީގެ އިތުރުން ގިރާވަރުފަޅުން ދޫކުރާ 5,433 ގޯއްޗެވެ.
ސަރުކާރު ނިމުނުއިރު، 2000 އަށް ވުރެ ގިނަ ރަޖިސްޓްރީއާ ހަވާލުވުމަށް މީހުން ހާޒިރު ނުވާ ކަމަށް އޭރު ޕްލޭނިން މިނިސްޓްރީން ބުނެފައިވެ އެވެ.
ގޯތީގެ ރަޖިސްޓްރީ ހަވާލުކުރަން މި ފެށީ، މި ސަރުކާރު ވެރިކަމާ ހަވާލުވުމަށް ފަހު އެ ރަޖިސްޓްރީތައް ދޫކުރަން ނުފަށައިގެން، ބަޔަކު އެންޓި ކޮރަޕްޝަން ކޮމިޝަން (އޭސީސީ)އަށް މިދިޔަ އަންގާރަ ދުވަހު ވަދެ މުޒާހަރާ ކޮށްފައިވަނިކޮށެވެ.
އެކަމާއި ގުޅިގެން އެ ދުވަހު ރައީސް ޑރ. މުހައްމަދު މުއިއްޒު ވިދާޅުވީ މި ހަފުތާ އާއި އަންނަ ހަފުތާގެ ތެރޭގައި ރަޖިސްޓްރީ ހަވާލުކޮށް ނިންމާނެ ކަމަށެވެ. ގޯއްޗާއި ފްލެޓުގެ ބައެއް މައްސަލަތައް އެ އޭސީސީއިން ދަނީ ބަލަމުންނެވެ.
